Биз «интайин қиммәт баһалиқ бир мәрвайитни» таптуқ

Винстон бурадәр, Худани қандақ издигәнлигиңиз тоғрилиқ ейтип берәләмсиз?

Мән Австралияниң Квинсленд штатидики фермада чоң болдум. Бизниң аилимиз диндар әмәс еди. Биз адәмләрдин жирақ йәрдә яшиғанлиқтин, мән өйдикиләрдин башқа һечким билән арилашмидим десәмму болиду. 12 йешимдин тартип мән Худани издәшкә башлидим. Мән Униңға дуа қилип, Өзи тоғрилиқ һәқиқәтни ечип беришини соридим. Кейин мән өйдин кетип, Австралияниң җәнубидики Аделаида шәһиридә иш таптим. 21 йешимда Сидней шәһиригә дәм елишқа барғинимда Пэм дегән қиз билән тонушуп қалдим. У маңа британ-израиль дәп аталған диний еқим һәққидә ейтип бәрди. Бу еқимдикиләр британиялиқлар Исраилниң йоқ болуп кәткән қәбилилиридин чиққан дәп ишинидекән. Улар бу қәбилиләр б.м.и. 740-жили қуллуққа елип кетилгән Шималий Исраил падишалиғиниң он қәбилиси дәп ейтиду. Мән Аделаидиға қайтип барғанда, бир хизмәтдишим билән шу тоғрилиқ сөзлишишкә башлидим. У Йәһва гувачилири билән Муқәддәс китапни үгинишни башлиған екән. Униң билән асасән Йәһва гувачилириниң немигә ишинидиғанлиғи тоғрилиқ бир нәччә саат сөзләштуқ. Шу чағда мән бала чеғимдики дуалиримға җавап алғанлиғимни чүшәндим. Мән Яратқучи вә Униң Падишалиғи тоғрисида һәқиқәтни билдим! Шундақ қилип «интайин қиммәт баһалиқ бир мәрвайитни» таптим! (Мәт. 13:45, 46).

Пэм қериндаш, сизму «мәрвайитни» кичигиңиздин издәшни башлидиңиз. Сиз уни қандақ таптиңиз?

Мән Йеңи Җәнубий Уэльс штатидики Кофс-Харбор дегән кичик шәһәрдә чоң болдум. Өйдикилирим динға бәк йеқин болған еди. Ата-анам вә бова-момам британ-израиль еқиминиң тәлимлирини чиң тутатти. Улар инимни, һәдәмни, мени вә башқа қериндашлиримни Худа пәқәт ата-бовилири британиялик болған кишиләрни яхши көриду дәп үгәткән. Бирақ мән буниңға анчә ишинип кәтмидим. Худа тоғрилиқ билимгә муһтаҗ болуп жүргәнликтин, 14 йешимда мән һәр түрлүк чирколарға бардим. Англикан, баптист вә йәттинчи күн адвентистлири дегәнләрниң чирколириға берип көрдүм. Бирақ уларниң һечқайсиси Худани билишимгә ярдәм берәлмиди.

Кейинирәк биз Сиднейға көчтуқ. Шу йәрдә мән Винстон билән тонуштум. У Сиднейға дәм елиш үчүн кәлгән екән. Өзи ейтқандәк, иккимиз дин тоғрилиқ сөзлишип, ахирида у Гувачилар билән Муқәддәс китапни үгинишкә башлиған. Буниңдин кейин, униң маңа язған һәрбир хети Муқәддәс китап айәтлиригә толған еди. Растини ейтқанда, бешида мән азирақ әнсиридим, һәтта аччиқландим. Бирақ вақит өтүп мән һәқиқәтни тапқанлиғимни чүшәндим.

1962-жили мән Винстонға йеқинирақ болуш үчүн Аделаидиға көчүп бардим. У Томас вә Джанис Слоуман дегән Гувачи әр-аялниң өйидә турушумға келишип қойған екән. Бурун улар Папуа-Йеңи Гвинеядә миссионер болуп хизмәт қилған. Шу чағда мән 18 яшқа әнди киргән яш қиз едим. Слоуманлар аилиси маңа интайин меһрибан болған вә Йәһва тоғрилиқ көпирәк билишимгә ярдәм бәргән. Мәнму Худа Сөзини үгинишни башлап, көп өтмәй һәқиқәтни тапқинимға көз йәткүздүм. Винстон иккимиз баш қошқандин кейин, дәрһал Йәһваға толуқ вақитлиқ хизмәт қилишни башлидуқ. Биз көплигән қийинчилиқларға дуч кәлсәкму, хизмитимиз көп бәрикәтләрни елип кәлгән. Биз қиммәт баһалиқ мәрвайит, йәни һәқиқәтни, техиму көпирәк қәдирләйдиған болдуқ.

Винстон бурадәр, Йәһваға хизмәт қилған дәсләпки жиллириңлар һәққидә ейтип бәрсиңиз.

Пэмға өйләнгәндин кейин көп өтмәй, Йәһва Худа алдимизда хизмәтниң «йоған ишиклирини» ечишқа башлиди (Кор. 1-х. 16:9). Биринчи ишик кичиккинә җамаитимизни зиярәт қилған наһийилик назарәтчиси болуп хизмәт қилған Джек Портер бурадәр арқилиқ ечилди. Һазир у Австралазиядики филиал комитетиниң әзаси. Джек вә униң аяли Розлин бизни пионер болуп хизмәт қилишқа дәвәт қилған. Пэм иккимиз бәш жил пионер болуп, бу хизмәттин чоң хошаллиқ алдуқ. Мән 29 яшта болғанда, бизни шу чағда Фиджидики филиалниң йетәкчилиги астидики Җәнубий Тинч океан араллирида наһийилик хизмәт қилишқа тәклип қилди. Шу аралларға Самоа, Америка Самоаси, Кирибати, Науру, Ниуэ, Токелау, Тонга, Тувалу һәм Вануату киргән.

Шу чағда жирақта җайлашқан бәзи араллардики адәмләр Йәһва гувачилириға гуман билән қариған. Шуниң үчүн биз еһтиятчан вә сәзгүр болушимиз керәк еди (Мәт. 10:16). Шу йәрләрдики җамаәтләр бәк кичик болғанлиқтин, бизгә қонидиған җай тепиш қийин болатти. Шуңа биз йеза ичини арилап, йәрлик кишиләрниң өйидә қонаттуқ. Улар бизни һәрқачан қучақ йейип қарши алатти.

Сизниң тәрҗимә ишиға қизиқидиғанлиғиңизни билимиз. Буниңға немә сәвәп болған?

Шу вақитларда тонга тилида пәқәт бирнәччә варақчә билән китапчилар болған. Қериндашлар вәз хизмитидә «Мәңгү һаятқа йетәкләйдиған һәқиқәт» китавиниң инглизчә нусхисини ишләткән. Шуңа ақсақаллар үчүн төрт һәптилик бир мәктәп өткүзүлгәндә, үч ақсақал шу китапни тәрҗимә қилишқа мақул болған. Улар ақсақаллар мәктивидә оқуватсиму вә инглизчини яхши билмисиму, бу ишқа тәйярлиқ билән киришти. Қолда йезилған мәзмунни Пэм хәт бесиш машинисида йезип, уни Қошма Штатлардики басмиханиға әвәттуқ. Китапни баштин аяққичә тәрҗимә қилишқа сәккиз һәптидәк вақит кәтти. Тәрҗимимизниң сүпити анчә яхши болмисиму, бу китап тонга тилида сөзләйдиған көплигән адәмләргә һәқиқәтни тонушқа ярдәм бәрди. Буниңдин авал Пэм иккимиз һечқачан тәрҗимә ишиға қатнашмиған. Бирақ бу вақиә тәрҗимә ишиға қизиқишимизни ойғатти.

Пэм қериндаш, аралдики турмуш билән Австралиядики турмушниң чоң пәрқи барму?

Әлвәттә! Асман билән йәрдәк пәрқи бар! Қайси аралда болғинимизға бағлиқ, қаплап кәткән пашилар, чидиғусиз иссиқ яки нәм һава райи вә һәрхил кесәлләрдин қийинилаттуқ. Бәзидә қосиғимиз ач жүрәттуқ. Амма һәр күни кәчқурун фаледин океанға қариғанда, өзгичә раһәтлинәттуқ. Самоалиқлар «фале» дәп төрт тәрипи очуқ, өгүзи қомуш яки самандин ясалған өйни ейтиду. Айдиң кечиләрдә кокос дәрәқлири бәк ениқ көрүнәтти. Ай шолиси чүшкән суниң долқунлири җанға арамбәхш берәтти. Шундақ чирайлиқ мәнзириләр бизни чоңқур ойлинишқа һәм дуа қилишқа вә сәлбий әмәс, иҗабий нәрсиләр һәққидә ойлашқа үндигән.

Биз балиларни бәк яхши көрүп қалдуқ. Улар шунчилик омақ еди. Балилар үчүн биз, ақ тәнлик чәт әлликләр, интайин қизиқ болдуқ. Бир күни Ниуэ арилида болғинимизда, бир кичик бала Винстонниң жуңлуқ қолини көрүп: «Пәйлириң қалтисқу!»— дәп қолини сийпап қойди. У шунчилик түклүк қолни һечқачан көрмигәнликтин, уни қандақ тәсвирләшниму билмигән охшайду.

Адәмләрниң начар турмушини көргәндә, жүригимиз ағриған. Улар җәннәттәк әҗайип чирайлиқ мәнзиридә яшисиму, ичидиған сүйи йетишмигән вә тиббий давалашқа еришәлмигән. Бирақ қериндашлар үчүн бу адәттики турмуш болғанлиқтин, уларниң роһи чүшмигән. Улар бариға шүкүр қилип, бала-чақиси йенида, Худаға ибадәт қилидиған орни һәм Йәһвани мәдһийиләш мүмкинчилиги болғанлиғиға хошал болған. Уларниң үлгиси бизгиму һаятта немә муһимлиғини унтумай, аддий һаят кәчүрүшкә ярдәм бәрди.

Ят йәрниң шараитлири тамамән башқичә болсиму, бәзидә қудуқтин су тартишқа, тамақни тәйярлашқа тоғра келипту. Шу тоғрилиқ көпирәк ейтип берәләмсиз?

Дадам маңа от йеқип, отта тамақ тәйярлашни вә йоқни бар қилишни үгәткән еди. Шуңа униңға бәк миннәтдармән. Бир қетим Кирибатиға барғанда, өгүзи қомуш билән йепилған кичик өйдә тохтидуқ. Шу өйниң поли марҗандин, тамлири бамбуктин ясалған еди. Тамақни етиш үчүн мән кичиккинә йәрни оюп, очақ ясаттим, отунниң орниға кокос қасирақлирини ишлитәттим. Су елип келиш үчүн мән қудуқ бешиға берип, йәрлик аяллар билән новәттә тураттим. Улар суни икки метр узун таяқ билән тартип чиқиратти. Бу таяқ қармаққа охшатти, лекин ағамчиға илмәкниң орниға қәләй қача бағланған. Новити кәлгәндә һәрбир аял ағамчиға бағланған қачини суға ташлап, қолини дәрру бурап, қачини суға толдурувалатти. Бир қаримаққа бу бәк оңай болған, лекин новәт маңа кәлгәндә, қолумни қанчә буримисамму, қачам суға чөкмәй, ләйләп туратти. Һәммиси күлүшүп тохтиғандин кейин, бир аял маңа ярдәмләшти. Йәрлик аяллар һәрқачан ярдәм беришкә тәйяр вә меһрибан еди.

Иккилиңлар араллардики хизмәтни яхши көрүп қалдиңлар. Есиңларда қалған қизиқарлиқ вақиәләрни ейтип берәләмсиләр?

Винстон бурадәр: Йәрлик урп-адәтләргә адәтлиниш үчүн бираз вақит керәк болди. Мәсилән, қериндашлар бизни меһман қилғанда, адәттә дәстиханға һәммә тамақлирини қоятти. Уларғиму қалдурушимиз керәклиги оюмизғуму кирип чиқмапту, алдимизға қоюлған һәммини йәвитәттуқ. Әлвәттә, урп-адәтлирини чүшинивалғандин кейин, ундақ қилмайдиған болдуқ. Көп нәрсиләрни билмәй хаталиқ қилсақму, қериндашлар бизни чүшинишкә тиришқан. Һәр алтә айда җамаәтләргә барғанда, улар бизни қучақ йейип қарши алатти. Йәрлик қериндашлар биздин башқа ят дөләттин кәлгән Гувачиларни көрмигән.

Һәр түрлүк җамаәтләргә барғанда, шу йезилардики кишиләргә яхши гувалиқ бәргән едуқ. Улар Йәһва гувачилири дуниявий тәшкилат әмәс, йәрлик қериндашлар чиқиривалған дин дәп ойлиған. Лекин улар чәт әлдин кәлгән қериндашларни көргәндә, өз көзқаришини өзгәртти. Хәлиқара тәшкилат екәнлигимизни билип улар һәйран қалди.

Пэм қериндаш: Маңа чоңқур тәсират қалдурған Кирибатидики бир вақиә есимдә. Шу йәрдә пәқәт бирнәччә қериндаш бар еди. Синикай Матера дегән ялғуз ақсақал һәрқачан бизгә ғәмхорлуқ қилған. Бир күни у бизгә келип: «Бу силәргә»,— дәп бир севәтни тутқузди. Ичидә бир тал тоху тухуми бар екән. Шу чағда тухум кам учратти. Униң бу кичик болсиму мәртлиги бизни бәкму һаяҗанға салған.

Пэм қериндаш, бу вақиәләрдин бирнәччә жил кейин балиңиз чачирап кетипту. Бу еғир синаққа бәрдашлиқ беришиңизгә немә ярдәм бәрди?

1973-жили биз Тинч океан араллирида хизмәт қилғанда, иккиқат болуп қалдим. Шу сәвәптин, биз Австралиягә қайтишни қарар қилдуқ. Бирақ төрт айдин кейин балимиз чачирап кәтти. Винстон иккимизниң жүригимизгә пичақ санчилғандәк болди. Вақит өтүп дәрдимиз азайсиму, техи пүтүнләй бесилмиған еди. «Күзитиш мунариниң» (рус) 2009-жил, 15-апрель санидики «Әгәр техи туғулмиған бала чачирап кәтсә, униң тирилиш үмити барму?» дегән мақалә чиққан. Шу мақалидә йезилғанлар бизгә тәсәлли берип, буни Йәһваниң Өзи адил бир тәрәп қилидиғанлиғиға ишәндүрди. Йәһва Худа жүрәк ярилиримизни сақайтиду вә Оғли Әйса арқилиқ «Иблисниң ишлирини бузиду» яки пүтүнләй йоқ қилиду (Йоһ. 1-х. 3:8). Бу мақалини оқуп, Йәһваниң хәлқи сүпитидә егә болған «мәрвайитимизни» техиму қәдирләйдиған болдуқ. Падишалиққа үмүтимиз болмиса, биз немә қилаттуқ?!

Балимиздин айрилғандин кейин, биз қайтидин толуқ вақит хизмәт қилишни башлидуқ. Бирнәччә ай Австралиядики Бәйтәлдә хизмәт қилдуқ, кейин җамаәтни зиярәт қилиш хизмитимизгә қайттуқ. Йеңи Җәнубий Уэльс Штати вә Сиднейда төрт жил хизмәт қилдуқ. 1981-жили қайтидин Бәйтәлгә чақирилдуқ вә мошу кәмгичә бу йәрдә хизмәт қиливатимиз.

Винстон бурадәр, һазир сиз Австралазия филиал комитетиниң әзаси болуп хизмәт қиливатисиз. Җәнубий Тинч океан араллирида топлиған тәҗрибиңиз сизгә ярдәм берәмду?

Әлвәттә, көп ярдәм бериду. Авал Самоа билән Америка Самоаси Австралия филиалиниң қаримиғида болди. Кейинирәк Австралия филиали билән Йеңи Зеландия филиали қошулуп, Австралазия филиали дәп аталди. Һазир бу филиал территориясигә Австралия, Самоа билән Америка Самоаси, Кук араллири, Йеңи Зеландия, Ниуэ, Тимор-Лесте, Токелау вә Тонга кириду. Мән бу дөләтләрниң көпинчисигә филиал вәкили сүпитидә барған. Араллардики садиқ қериндашлар билән хизмәт қилип топлиған тәҗрибәм маңа зор пайда елип келиду. Һазир Бәйтәлдә хизмәт қилип, уларға ярдәм берәләймән.

Сөзүмниң ахирида бир нәрсини ейтқум кәлди: Худани пәқәт чоң кишиләрла издимәйдекән. Бизниң һаятимиз буни испатлайду. Өй-ичидикиләр һәқиқәткә қизиқмисиму, яшлар «интайин қиммәт баһалиқ бир мәрвайитни» издәйдекән (Пад. 2-яз. 5:2, 3; Тар. 2-яз. 34:1—3). Шәк-шүбһисизки, меһир-муһәббәткә толған Худайимиз Йәһва қери-яш, чоң-кичик һәммисиниң мәңгү һаятқа еришишини халайду!

Пэм иккимиз әллик жил бурун һәқиқәтни издәшни башлиғанда, бу йолниң қаяққа йетәкләйдиғанлиғини билмигән едуқ. Һәқиқәтән, Падишалиқ тоғрисидики һәқиқәт — қиммәтбаһа мәрвайит! Бу мәрвайитни чиң тутушқа бәл бағлидуқ.