Аддий соалниң күчи

Мэри вә униң йолдиши Джонa яшайдиған җайда Филиппиндин кәлгән нурғун ишчилар бар. Уларниң көпинчиси хуш хәвәрни хошаллиқ билән қобул қилиду. COVID-19 пандемияси вақтида Мэри пәқәт өзи яшайдиған җайда әмәс, башқа дөләтләрдики кишиләр биләнму үгиниш дәрисини башлиған. У буни қандақ қилған?

Мэри қизиққучилардин: «Муқәддәс китапни үгинишни халайдиған йәнә бирлири барму?»— дәп сориған. Бу соални сораш яхши нәтиҗә әкәлгән. Әгәр улар «һә» дәп җавап бәрсә, у: «Сиз мени улар билән тонуштуруп қоямсиз?»— дәп ейтатти. Адәттә, Худа Сөзидики һәқиқәтни яқтуруп қалған адәмләр билгәнлири тоғрилиқ аилиси вә достлириға ейтип беришни халайду. Бу аддий соал арқилиқ Мэри қандақ нәтиҗигә еришти?

Мэриниң Жасмин дегән үгәнгүчиси уни төрт адәм билән тонуштурди. Униң ярдими арқилиқ Мэриниң йәнә төрт үгиниш дәриси пәйда болди. Униң бири Кристин. Униңға бу үгиниш дәриси йеқип қелип, у һәтта һәптисигә икки қетим дәрис өткүзүшни сорапту. Мэри униңдин: «Муқәддәс китапни үгәнгүси келидиған тонушлириңиз барму?»— дәп сориғанда, у: «Һә, бар. Мән сизни достлирим билән тонуштуруп қояй»,— деди. Бирнәччә һәптиниң ичидә Мэри Кристинниң төрт дости билән тонушти. Уларниңму Муқәддәс китапни үгинишни халайдиған достлири бар екән.

Кристин Филиппинда яшайдиған аилисиниңму Муқәддәс китапни үгинишини халиған. Шуңа у үгиниш тоғрилиқ қизи Андреаға ейтип бәрди. Андреа Йәһва гувачилири Әйсаға ишәнмәйдиған, пәқәт Кона Әһдни оқуйдиған секта дәп ойлиған екән. Амма биринчи үгиништин кейин униң бу ой-пикри тамамән өзгирип кәтти. Андреа һәрбир дәристә йеңи бир нәрсини биливалғандин кейин: «Муқәддәс китапта шундақ йезилған болса, демәк, бу һәқиқәт»,— дәп ейтатти.

Бираз вақит өтүп, Андреа Мэрини икки дости вә бир хизмәтчиси билән тонуштурди. Уларму үгинишни башлиди. Андреаниң йәнә көзи көрмәйдиған Анжела дегән кичик аписи бар екән. Мэри Андреа билән дәрис өткүзгәндә, Анжела тиңшап жүрүпту. Мэри буни билмиди. Кейин бир күни Анжела уни Мэри билән тонуштурушни сорайду. Кейин у: «Мәнму Муқәддәс китапни үгинишни халаймән»,— дәйду. Анжелаға Муқәддәс китаптин үгәнгәнлири йеқип, бир ай өтмәй, у нурғун айәтләрни ядлавалиду. У һәтта һәптисигә төрт қетим үгинишни сориди. Кейин у Андреаниң ярдими билән учришишларға онлайн қатнишишни башлайду.

Кристин дәрисини өтүватқанда, йолдиши Джошуа буни аңлап жүрүпту. Буни байқиған Мэри униңдин: «Сизму үгинишни халамсиз?»— дәп сорайду. Шу чағда Джошуа: «Маңа соалларни қоймаң. Болмиса, чиқип кетимән»,— дәйду. Бирақ бәш минут өтмәйла, у Мэриға соалларни яғдуриду. Шундақ қилип, Джошуаму Муқәддәс китапни үгинишкә келишти.

Аддий бир соалниң ярдими билән Мэри нурғун үгинишләрни башлиди. У бәзилирини башқа қериндашларға тапшурди. Җәми Мэри 28 үгинишни башлапту. Улар һәр түрлүк төрт дөләттин болған.

Мошу мақалиниң бешида тилға елинған Жасмин 2021-жилниң апрель ейида чөмдүрүлүштин өтти. Кристин 2022-жилниң май ейида чөмдүрүлүштин өтүп, аилиси билән биллә болуш үчүн өз жутиға қайтти. Кристин тонуштурған йәнә икки үгәнгүчиму Йәһва гувачиси болди. Бирнәччә айдин кейин Анжеламу чөмдүрүлүштин өтүп, һазир пионер болуп хизмәт қиливатиду. Кристинниң йолдиши Джошуа, қизи Андреа вә бирнәччә үгәнгүчиләр роһий җәһәттин яхши өсүватиду.

Биринчи әсирдә нурғун адәмләр өз аилисигә вә достлириға Әйса тоғрилиқ үгәнгәнлирини ейтип берәтти (Йоһ. 1:41, 42а; Әлч. 10:24, 27, 48; 16:25—33). Шуңа сизму үгәнгүчилириңиздин: «Муқәддәс китапни үгинишни халайдиған тонушлириңиз барму?»— дәп сорап көрүң. Бәлким, бу аддий соал қоюш арқилиқ сизму нурғун Муқәддәс китап үгинишлирини башлайдиғансиз.