5-بۆلۈم
يەككە-يېگانە خۇدانىڭ سۈپەتلىرىنى چۈشىنىش
مۇقەددەس يازمىلار خۇدانىڭ ئاجايىپ خاراكتېر-خۇسۇسىيەتلىرىنى بىزگە ئاشكارا قىلىپ، ئۇنى چۈشىنىشىمىز ئۈچۈن ياردەم بېرىدۇ. مەسىلەن، مۇقەددەس يازمىلار خۇدانىڭ كۈچ-قۇدرەت، ئادىللىق، دانالىق ۋە مۇھەببەتكە ئوخشاش تۆت ئاساسىي پەزىلەتلىرىنى ئېيتىپ بېرىدۇ. تۆۋەندە، ھەربىرىنى بىر-بىرلەپ كۆرۈپ چىقايلى.
كۈچ-قۇدرىتى چەكسىزدۇر
خۇدانىڭ كۈچ-قۇدىرىتى تەڭداشسىز
يەھۋا ئىبراھىم پەيغەمبەرگە: «مەن ھەممىگە قادىر خۇدادۇرمەن»،— دېگەن (يارىتىلىش 17:1). ئۇنىڭ كۈچ-قۇدرىتى تەڭداشسىز، چەكسىز ۋە پۈتمەس-تۈگىمەستۇر. ئۇ ئۆز كۈچ-قۇدرىتى ئارقىلىق بارچە كائىناتنى ياراتقان.
خۇدا ئۆز كۈچ-قۇدرىتىنى ھەرگىزمۇ قالايمىقان ئىشلەتمەيدۇ، ئەكسىچە ھەمىشە مەقسەتلىك ئىشلىتىدۇ. ئۇ ئۆز كۈچ-قۇدرىتىنى ئادىللىق، دانالىق ۋە مۇھەببەت قاتارلىق خۇسۇسىيەتلىرىگە ماسلاشتۇرۇپ مۇكەممەل ئىشلىتىدۇ.
يەھۋا كۈچ-قۇدرىتىنى سېخىيلىق بىلەن ئىشلىتىپ، ئۆزىنىڭ ساداقەتمەن خىزمەتچىلىرىگە ياردەم قولىنى سۇنىدۇ. «يەھۋا ئۆزىگە پۈتۈن قەلبى بىلەن سادىق قېلىشقا ئىنتىلگەنلەرگە يار-يۆلەك بولۇش ئۈچۈن پۈتكۈل يەر يۈزىگە نەزەر سالىدۇ» (2-تارىخنامە 16:9). شۇنداق كۈچ-قۇدرەتلىك ۋە مېھرىبان خۇداغا يېقىنلىشىشنى خالىمامسىز؟
خۇدانىڭ ئادىللىقى
«يەھۋا سۆيەر ئادالەتنى» (زەبۇر 37:28). ئۇ ھەمىشە ئۆزىنىڭ مۇكەممەل ئۆلچەم-قائىدىلىرىگە ئاساسەن ھەق ئىشلارنى قىلىپ، ئادىللىقىدا چىڭ تۇرىدۇ.
خۇدا ھەر مىللەت كىشىلىرىگە تەڭ قارايدۇ
خۇدا ناھەقلىقنى ئۆچ كۆرىدۇ. ئۇ «ھېچكىمگە يۈز خاتىر قىلمايدىغان، پارا ئالمايدىغان، ئۇلۇغ، قۇدرەتلىك ۋە ھەيۋەتلىك خۇدادۇر» (تەكرار قانۇن 10:17). ئۇ باشقىلارغا زۇلۇم قىلىدىغانلارغا قارشى چىقىپ، غېرىپ-غۇرۋالارنىڭ بېشىنى سىلاپ، بولۇپمۇ تۇل خوتۇن، يېتىم بالىلارنى ھەرگىز تاشلىمايدۇ (چىقىش 22:22). خۇدا ھېچ بىر ئىنسانغا كەمسىتىش نەزىرىدە قارىمايدۇ. مۇشۇ ھەقتە، مۇقەددەس كىتابتا: «خۇدا ھەممىنى تەڭ كۆرىدىكەن. قايسى مىللەتتىن بولۇشىدىن قەتئىينەزەر، ئۇنىڭدىن قورقۇپ، توغرا ئىشلارنى قىلىدىغان ھەرقانداق كىشىنى قوبۇل قىلىدىكەن»،— دەپ يېزىلغان.— ئەلچىلەر 10:34، 35.
يەھۋانىڭ ئادىللىقى مۇكەممەل. ئۇ بەكمۇ مۇلايىم ئەمەس ياكى قاتتىقمۇ ئەمەس. ئۇ گۇناھىغا توۋا قىلمىغانلارنى جازالايدۇ، بىراق توۋا قىلغانلارغا كۆيۈنۈپ، مېھىر-شەپقىتىنى كۆرسىتىدۇ. «يەھۋا مېھىر-شەپقەتلىك ۋە رەھىمدىلدۇر، غەزەپلىنىشكە ئالدىرىمايدۇ ۋە سادىق سۆيگۈسى مول. ئۇ ھەمىشە خاتالىقلىرىمىزنى ئىزدەپ يۈرمەيدۇ، مەڭگۈ ئۆچ-ئاداۋەت ساقلىمايدۇ. بىزگە گۇناھلىرىمىزغا قاراپ مۇئامىلە قىلمايدۇ، بىزنى خاتالىقلىرىمىزغا يارىشا جازالىمايدۇ» (زەبۇر 103:8–10). خۇدا يەنە ئۆزىنىڭ ئىخلاسمەن بەندىلىرىنىڭ سادىقلىقنى ساقلاش ئۈچۈن كۆرسەتكەن تىرىشچانلىقىنى ئەسكە ئالىدۇ ۋە مۇكاپاتلايدۇ. خۇدانىڭ شۇنىڭدەك ئادىللىقى، سىزنى ئۇنىڭغا ئىشەنچ باغلاشقا ئۈندىمەمدۇ؟
خۇدانىڭ دانالىقى
كائىناتقا نەزەر سالساق، خۇدانىڭ ئەقىل-پاراسىتى بىزنى ئەيمەندۈرىدۇ
خۇدا بارلىق ئىلىم-مەرىپەتنىڭ بۇلىقى. «ئاھ، خۇدانىڭ بايلىقى ۋە ئىلىم-ھېكمىتى نەقەدەر مول، نەقەدەر چوڭقۇر-ھە!» (رىملىقلار 11:33). ئۇنىڭ دانالىقىنىڭ تەڭدىشى يوق، چەكسىزدۇر.
خۇدانىڭ دانالىقى، ئۇنىڭ ياراتقان ياراتمىلىرىدىن روشەن كۆرۈنۈپ تۇرىدۇ. زەبۇردا: «ئەي يەھۋا، شۇنچە كۆپتۇر ئىشلىرىڭ! سەن ئۇلارنىڭ ھەممىسىنى ھېكمەت بىلەن ياراتتىڭ»،— دەپ خاتىرىلەنگەن.— زەبۇر 104:24.
خۇدانىڭ دانالىقى يەنە ئۇنىڭ مۇقەددەس يازمىلىرىدا ئاشكارا قىلىنغان. قەدىمقى ئىسرائىلنىڭ پادىشاھى داۋۇت پەيغەمبەر: «يەھۋانىڭ قانۇنى مۇكەممەلدۇر، ئىنسان ۋۇجۇدىنى يېڭىلار. يەھۋانىڭ ئەسكەرتىشى ئىشەنچىلىكتۇر، تەجرىبىسىز كىشىنى دانا قىلار»،— دەپ يازغان (زەبۇر 19:7). خۇدانىڭ پۈتمەس-تۈگىمەس ئىلىم-ھېكمىتىنى ئۆگىنەلەيدىغانلىقىڭىزنى تەسەۋۋۇر قىلىپ بېقىڭە! مۇشۇ پۇرسەتنى قولدىن بېرىپ قۇيۇشقا قانداقمۇ كۆڭلىڭىز ئۇنايدۇ؟
«خۇدا ئۆزى مۇھەببەتتۇر»
مۇھەببەت — يەھۋانىڭ ئاساسىي خۇسۇسىيىتى. شۇڭا، مۇھەببەت ئۇنىڭ بارچە ئىشلارنى ۋۇجۇدقا چىقىرىشىدا، ھەرىكەتلەندۈرگۈچى كۈچ ۋە يولباشچىلىق بولغان. مۇقەددەس يازمىلار: «خۇدا ئۆزى مۇھەببەتتۇر»،— دەيدۇ.— 1-يۇھاننا 4:8.
خۇدا بىزگە بولغان سۆيگۈ-مۇھەببىتىنى ئېيتىپ تۈگەتكۈسىز يوللار بىلەن ئىزھار قىلىدۇ. ئۇ بىزگە ياخشى نەرسىلەرنى بېرىدۇ. «ئۇ . . . ياخشى ئىشلارنى قىلىپ، ئاسماندىن سىلەرگە يامغۇر ياغدۇرۇپ، مول-ھوسۇللۇق پەسىللەر بىلەن بەرىكەتلىدى ۋە مول يېمەك-ئىچمەكلەرنى بېرىپ ۋە خۇشاللىققا چۆمدۈرۈپ كۆڭلۈڭلارنى سۆيۈندۈردى» (ئەلچىلەر 14:17). ھەقىقەتەن، «ھەربىر ياخشى ھەدىيە ۋە ھەربىر مۇكەممەل سوۋغات يۇقىرىدىن، ئاسمانلاردىكى نۇرلارنىڭ ئاتىسىدىن كېلىدۇ، ئۇ دائىم ئۆزگىرىپ تۇرىدىغان كۆلەڭگىلەردەك ئۆزگىرىشچان ئەمەس» (ياقۇپ 1:17). مۇقەددەس يازمىلاردىن ئىبارەت قىممەت باھالىق سوۋغات ئارقىلىق خۇدا مېھرىبانلىق بىلەن ئۆزى توغرىسىدىكى ھەقىقەتنى ۋە ئۆزىنىڭ قانۇن ۋە ئۆلچەم-قائىدىلىرىنى بىزگە ئۆگىتىدۇ. ئەيسا پەيغەمبەر ئۆز دۇئاسىدا: «سېنىڭ سۆزۈڭ ھەقىقەتتۇر»،— دېگەن.— يۇھاننا 17:17.
مۇقەددەس يازمىلاردا خۇدانىڭ ئىلىم-ھېكمىتى بار
بىز قىيىنچىلىقلارغا دۇچ كەلگەندە، خۇدا ياردەم قولىنى سۇنىدۇ. «يۈكۈڭنى يەھۋاغا تاشلا، ئۆزى يار-يۆلەك بولار ساڭا. ئۇ ئادىل كىشىنىڭ يىقىلىشىغا يول قويماس ئەسلا» (زەبۇر 55:22). ئۇ گۇناھلىرىمىزنى مەغپىرەت قىلىدۇ. «ئەي يەھۋا، سەن مېھىرىبان ۋە ئەپۇ قىلىشقا تەييارسەن. ساڭا ئىلتىجا قىلغانلاردىن سادىق سۆيگۈڭنى ھېچقاچان ئايىمايسەن» (زەبۇر 86:5). ھەتتا ئۇ بىزگە مەڭگۈلۈك ھاياتلىققا ئېرىشىش پۇرسىتىنى بېرىدۇ. «ئۇ ئۇلارنىڭ كۆزلىرىدىكى ھەربىر تامچە ياشلىرىنى ئېرتىدۇ. ئۆلۈم يەنە بولمايدۇ، نە ماتەم، نە پەرياد ۋە ئاغرىق باشقا بولمايدۇ» (ۋەھىيلەر 21:4). ئۇنداقتا، خۇدانىڭ سۆيگۈ-مۇھەببىتىگە قانداق جاۋاب قايتۇرماقچىسىز؟ سىزمۇ ئۇنى سۆيەمسىز؟
خۇداغا يېقىنلىشىش
خۇدانىڭ ئىرادىسى ھەققىدە ئۆگىنىش، سىزنى ئۇنىڭغا يېقىنلاشتۇرىدۇ
خۇدا سىزنىڭ ئۇنى ياخشىراق چۈشىنىشىڭىزنى خالايدۇ. مۇقەددەس كىتاب بىزنى: «خۇداغا يېقىنلىشىڭلار، شۇندىلا ئۇ ھەم سىلەرگە يېقىنلىشىدۇ»،— دەپ ئۈندەيدۇ (ياقۇپ 4:8). خۇدانىڭ ساداقەتمەن خىزمەتچىسى ئىبراھىم پەيغەمبەر، ئۆز پەرۋەردىگارى بىلەن ناھايىتى يېقىن مۇناسىۋەتتە بولغاچ، خۇدانىڭ دوستى دەپ ئاتالغان (ياقۇپ 2:23). يەھۋا، سىزنىڭمۇ ئۇنىڭغا يېقىنلىشىپ، ئۇنىڭ دوستى بولۇشىڭىزنى خالايدۇ.
خۇدا ھەققىدە كۆپرەك بىلىمگە ئىگە بولغانسېرى، ئۆزىڭىزنى ئۇنىڭغا يېقىن ھېس قىلىپ، كۆڭلىڭىز خۇرسەنلىك تاپىدۇ. «يەھۋانىڭ قانۇنلىرىدىن سۆيۈنۈپ، كېچە-كۈندۈز ئۇنى ئوقۇغانلار بەختلىكتۇر» (زەبۇر 1:1، 2). شۇڭا، مۇقەددەس يازمىلارنى داۋاملىق ئۆگىنىپ، ياراتقۇچىنىڭ ئېسىل پەزىلەتلىرى ۋە ئۇنىڭ ياراتمىلىرى ھەققىدە چوڭقۇر تەپەككۈر قىلىش زۆرۈر. سىز ئۆگەنگەنلىرىڭىزنى تۇرمۇشىڭىزدا ئەمەلىي ئىشلىتىش ئارقىلىق خۇداغا بولغان سۆيگۈ-مۇھەببىتىڭىزنى ئىپادىلەڭ. ئەمەلىيەتتە، «خۇدانى سۆيۈش ئۇنىڭ ئەمرلىرىگە بويسۇنۇش دېمەكتۇر ۋە ئۇنىڭ ئەمرلىرى ئېغىر ئەمەس» (1-يۇھاننا 5:3). سىز خۇددى زەبۇر يازغۇچىسىدەك: «يوللىرىڭنى ماڭا كۆرسەتكىن، ئەي يەھۋا؛ يوللىرىڭدا مېڭىشنى ئۆگەتكىن ماڭا. مېنى ھەقىقىتىڭ بىلەن يېتەكلىگىن ۋە ماڭا تەلىم بەرگىن، چۈنكى سەن قۇتقۇزغۇچى تەڭرىمسەن. كۈن بويى ساڭا ئۈمىد باغلايمەن»،— دەپ دۇئا قىلىڭ (زەبۇر 25:4، 5). شۇندىلا، خۇدانىڭ «ھەربىرىمىزدىن يىراق ئەمەس» ئىكەنىنى ھېس قىلىپ يېتەلەيسىز.— ئەلچىلەر 17:27.