9-بۆلۈم
تەڭرى يەھۋاغا ئائىلىڭىز بىلەن بىرگە ئىبادەت قىلىڭ
«ئاسمان، يەر... ياراتقۇچىسىغا ئىبادەت قىلىڭلار» (ۋەھىي 14:7).
مۇشۇ كىتابچىدا ئېيتىپ ئۆتۈلگىنىدەك، مۇقەددەس كىتابتا سىزگە ۋە ئائىلىڭىزگە ياردەم بېرىدىغان نۇرغۇن پرىنسىپلار بار. ئاللا يەھۋا سىزنىڭ بەختلىك بولۇشىڭىزنى خالايدۇ. ئەگەر سىز يەھۋا خۇداغا ئىبادەت قىلىشنى ھاياتىڭىزدا بىرىنچى ئورۇنغا قويسىڭىز، ئۇ: «بارلىق بۇ نەرسىلەر سىلەرگە بېرىلىدۇ»،— دەپ ۋەدە قىلىدۇ (مەتتا 6:33). خۇدا سىزنىڭ ئۇنىڭ دوستى بولۇشىڭىزنى خالايدۇ. ياراتقۇچىمىز بىلەن بولغان دوستلىقىڭىزنى راۋاجلاندۇرۇشقا ياردەم بېرىدىغان بارلىق مۇمكىنچىلىكلەردىن پايدىلىنىڭ. خۇدانىڭ دوستى بولۇش — ئادەم بالىسى ئۈچۈن بۈيۈك شان-شەرەپتۇر (مەتتا 22:37، 38).
1. يەھۋا بىلەن مۇناسىۋىتىڭىزنى مۇستەھكەملەڭ
مۇقەددەس كىتابتا نېمە يېزىلغان؟ يەھۋا: «مەن سىلەرگە ئاتا بولۇمەن، سىلەر ماڭا ئوغۇل-قىزلىرىم بولىسىلەر»،— دېدى (كورىنتلىقلارغا 2-خەت 6:18). يەھۋا سىزنىڭ ئۇنىڭ يېقىن دوستى بولۇشىڭىزنى خالايدۇ. بۇنىڭ بىر يولى — دۇئا. پەرۋەردىگار يەھۋا سىزنى «ئۈزلۈكسىز دۇئا قىلىشقا» تەكلىپ قىلىدۇ (سالونىكىلىقلارغا 1-خەت 5:17). سىز ئۇنىڭغا ئۆزىڭىزنىڭ غەم-تەشۋىشلىرىڭىزنى ۋە قەلب سىرلىرىڭىزنى ئېيتسىڭىز، ئۇ ئاڭلاشقا تەييار (فىلىپپىلىقلارغا 4:6). ئائىلىڭىز بىلەن دۇئا قىلغاندا، ئۇلار خۇدانىڭ سىز ئۈچۈن مەۋجۇت شەخس ئىكەنلىكىنى كۆرىدۇ.
خۇداغا قەلبىڭىزدىكىنى ئېيتىپلا قويماي، ئۇنىڭغا قۇلاق سېلىشىڭىز زۆرۈر. بۇنى ئۇنىڭ سۆزىنى ۋە ئۇنىڭغا ئاساسلانغان ماتېرىياللارنى تەتقىق قىلىش ئارقىلىق قىلالايسىز (زەبۇر 1:1، 2). بىلىۋالغانلىرىڭىز ھەققىدە مۇلاھىزە قىلىڭ (زەبۇر 77:11، 12). ئاللاغا قۇلاق سېلىش شۇنداقلا مەسىھىيلەر جامائىتىگە مۇنتىزىم قاتنىشىشنى ئۆز ئىچىگە ئالىدۇ (زەبۇر 122:1—4).
يەھۋا خۇدا بىلەن بولغان مۇناسىۋىتىڭىزنى مۇستەھكەملەشنىڭ يەنە بىر يولى — ئۇ ھەققىدە باشقىلارغا ئېيتىپ بېرىش. بۇنى قانچە كۆپ قىلسىڭىز، ئۇنىڭغا تېخىمۇ يېقىنلىشىسىز (مەتتا 28:19، 20).
پايدىلىق مەسلىھەتلەر
مۇقەددەس كىتابنى ئوقۇش ۋە دۇئا قىلىش ئۈچۈن ۋاقىت چىقىرىڭ
ئائىلىڭىزدە بىرىنچى ئورۇنغا دەم ئېلىش ھەم ئويۇن-تاماشىلار ئەمەس، بەلكى روھىي ئىشلارنى قويۇڭ
2. ئائىلىۋى ئىبادەتتىن ھۇزۇرلىنىڭ
مۇقەددەس كىتابتا نېمە يېزىلغان؟ «خۇداغا يېقىنلىشىڭلار ھەم ئۇمۇ سىلەرگە يېقىنلىشىدۇ» (ياقۇپ 4:8). ئائىلىۋى ئىبادەتنى پىلانلاپ، تۈزۈلگەن جەدۋەلگە ئەمەل قىلىڭلار (يارىتىلىش 18:19). بىراق ئائىلىڭىز بىلەن خۇداغا ئىبادەت قىلىش بۇنىڭ بىلەنلا چەكلەنمەي، كۈندىلىك تۇرمۇشىڭىزنىڭ مۇھىم بىر قىسمى بولۇشى كېرەك. ئائىلىڭىزنىڭ خۇدا بىلەن مۇناسىۋىتىنى مۇستەھكەملەش ئۈچۈن، مۇقەددەس كىتابتىكى: «سەن ئۆيىڭدە ئولتارساڭ، يولدا ماڭساڭ، ياتساڭ، قوپساڭ، ھەرۋاقىت ئۇلار [خۇدانىڭ سۆزلىرى] توغرىسىدا سۆز قىلىپ تۇرغۇن» دېگەن مەسلىھىتىگە قۇلاق سېلىشىڭىز كېرەك (تەكرار قانۇن 6:6، 7). سىزنىڭ مەقسىتىڭىز خۇدانىڭ قەدىمكى خىزمەتچىسى يەشۇئانىڭكىدەك بولسۇن. ئۇ: «مەن بولسام ئۆز ئۆيىمدىكىلەر بىلەن قوشۇلۇپ، خۇداغا ئىبادەت قىلىمەن»،— دەپ ئېيتقان (يەشۇئا 24:15).
پايدىلىق مەسلىھەت
ئائىلە ئەزالىرىنىڭ ھەممىسىنىڭ ئېھتىياجلىرىنى نەزەرگە ئېلىپ، ئائىلىۋى ئىبادەتنى مۇنتىزىم ئۆتكۈزۈش پروگراممىسىنى تۈزۈڭ