20-دەرس
جامائەت قانداق تەشكىللەنگەن؟
يەھۋا تەرتىپلىك خۇدادۇر (1-كورىنتلىقلار 14:33). شۇڭا، ئۇ ئۆز خەلقىنىڭمۇ تەرتىپلىك بولۇشىنى خالايدۇ. مەسىھ ئەگەشكۈچىلىرىنىڭ جامائىتى قانداق تەشكىللەنگەن؟ جامائەتنىڭ تەرتىپلىك بولۇشىغا ئۆز ھەسسىمىزنى قانداق قوشالايمىز؟
1. جامائەتنىڭ بېشى كىم؟
مەسىھ جامائەتنىڭ بېشىدۇر (ئەفەسلىكلەر 5:23). مەسىھ ئاسماندىن يەر يۈزىدىكى يەھۋانىڭ خەلقىنىڭ ئىش-پائالىيىتىگە يېتەكچىلىك قىلىدۇ. ئەيسا سادىق ھەم ئەقىل-پاراسەتلىك قۇلنى تەيىنلىگەن. بۇ قۇل بىر توپ تەجرىبىلىك ئاقساقاللاردىن تەشكىللەنگەن بولۇپ، يېتەكچى كېڭەش دەپ ئاتىلىدۇ تاپقان (مەتتا 24:45–47-نى ئوقۇڭ). بىرىنچى ئەسىردىكى يېرۇسالىمدىكى ئەلچىلەر ۋە ئاقساقاللارغا ئوخشاش، بۈگۈنكى كۈندە يېتەكچى كېڭەش دۇنيانىڭ جاي-جايلىرىدىكى جامائەتلەرگە كۆرسەتمىلەرنى بېرىدۇ (ئەلچىلەر 15:2). بىراق، يېتەكچى كېڭەش بىزنى باشقۇرىدىغان رەھبەرلەر ئەمەس. ئۇلار مۇقەددەس كىتابنى ئوقۇپ، يەھۋانىڭ ئۆزلىرىنى نېمە قىلىشقا يېتەكلەيدىغانلىقىنى بىلىشكە تىرىشىدۇ ۋە ئەيسانىڭ باشچىلىقىغا بويسۇنىدۇ.
2. ئاقساقاللار كىملەر ۋە ئۇلار جامائەتتە نېمە ئىش قىلىدۇ؟
ئاقساقاللار — جامائەتتىكى ئىمان-ئېتىقادتا يېتىلگەن تەجرىبىلىك ئەرلەر. ئۇلار جامائەتتە مۇقەددەس كىتابتىن تەلىملەرنى بېرىدۇ. ئۇلار پادىچىلار سۈپىتىدە، خۇدا خەلقىگە تەسەللى ۋە ياردەم بېرىدۇ. ئاقساقاللار قىلغان ئىشلىرىغا مائاش ئالمايدۇ. ئەكسىنچە، ئۇلار ئۆز ئىختىيارى بىلەن پايدا-مەنپەئەت كۆزلەپ ئەمەس، بەلكى قىزغىنلىق بىلەن ۋەزىپىلىرىنى ئورۇندايدۇ (1-پېترۇس 5:1، 2). جامائەتتە ئاقساقاللارغا ياردەم بېرىدىغان ياردەمچى خىزمەتچىلەر بار. ئۇلار بىر مەزگىل خىزمەت قىلغاندىن كېيىن، تەلەپلەرگە ماس كەلسە، ئاقساقال بولۇپ خىزمەت قىلالايدۇ.
يېتەكچى كېڭەش بەزى ئاقساقاللارنى رايونغا مەسئۇل ئاقساقال سۈپىتىدە خىزمەت قىلىشقا تەيىنلەيدۇ. شۇ زىيارەت خىزمىتىگە تەيىنلەنگەن ئاقساقاللار جامائەتلەرنى زىيارەت قىلىپ، كۆرسەتمىلەرنى بېرىدۇ ۋە قېرىنداشلارنى ئىلھاملاندۇرىدۇ. مۇقەددەس كىتابتىكى تەلەپلەرگە ئاساسەن، ئۇلار جامائەتتە ئاقساقاللارنى ۋە ياردەمچى خىزمەتچىلەرنى تەيىنلەيدۇ.—1-تىموتىي 3:1–10، 12؛ تىتۇس 1:5–9.
3. ھەربىر يەھۋا گۇۋاھچىسىنىڭ جامائەتتە قانداق رولى بار؟
بارلىق قېرىنداشلار جامائەت يىغىلىشلىرىغا قاتنىشىش ۋە شارائىتىگە قاراپ كىشىلەرگە ۋەز ئېيتىش ئارقىلىق يەھۋانىڭ ئىسىمىنى ئۇلۇغلايدۇ.—زەبۇر 148:12، 13-نى ئوقۇڭ.
چوڭقۇرراق قېزىڭ
ئەيسا جامائەتكە قانداق باشچىلىق قىلىدۇ؟ ئاقساقاللار ئۇنىڭ ئۈلگىسىدىن نېمىلەرنى ئۆگىنەلەيدۇ؟ بىز ئەيسا ۋە ئاقساقاللار بىلەن قانداق ھەمكارلىشالايمىز؟ مۇشۇ سوئاللارغا جاۋابلارنى بىلىۋېلىڭ.
4. ئەيسا مېھرىبان يولباشچى بولغان
ئەيسا مېھرىبانلىق بىلەن، بىزنى ئۇنىڭ يولباشچىلىقىغا ئەگىشىشكە چاقىرغان. مەتتا 11:28–30-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
ئەيسا قانداق يولباشچى بولغان؟ ئۇ ئۇنىڭغا ئەگەشكەنلەرنىڭ قانداق ھېس قىلىشىنى خالايدۇ؟
ئاقساقاللار ئەيسانى قانداق ئۈلگە قىلالايدۇ؟ فىلىمنى كۆرۈڭ.
مۇقەددەس كىتاب ئاقساقاللارنىڭ ئۆز ۋەزىپىلىرىنى قانداق ئورۇنلىشى كېرەكلىكىنى ئېنىق كۆرسىتىدۇ.
يەشايا 32:2؛ 1-پېترۇس 5:1–3-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
ئاقساقاللار ئەيساغا ئوخشاش، باشقىلارغا تەسەللى بېرىش ئۈچۈن تىرىشىدۇ. بۇنى بىلىش سىزگە قانداق تەسىر قىلىدۇ؟
ئاقساقاللار ئۆز ۋەزىپىسىنى ئورۇنلىغاندا، ئەيسانى يەنە قانداق ئۈلگە قىلالايدۇ؟
5. ئاقساقاللار قېرىنداشلار ئۈچۈن ئۈلگە
ئەيسا ئاقساقاللارنىڭ ئۆز ۋەزىپىسىگە قانداق كۆزقاراشتا بولۇشىنى خالايدۇ؟ فىلىمنى كۆرۈڭ.
ئەيسا جامائەتتە يېتەكچىلىكنى ئۆز ئۈستىگە ئالغانلارنىڭ نېمە قىلىشى كېرەكلىكىنى ئېيتقان. مەتتا 23:8–12-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
مۇقەددەس كىتابقا ئاساسلانغاندا، ئاقساقاللار چوقۇم قانداق بولۇشى كېرەك؟ سىزنىڭچە، نۇرغۇنلىغان دىنىي ئۇستازلار مۇقەددەس كىتابتا يېزىلغانلارغا ئەمەل قىلامدۇ؟
(1) ئاقساقاللار ئۆزىنىڭ ۋە ئائىلىسىنىڭ يەھۋا بىلەن دوستلۇق مۇناسىۋىتىنى كۈچلۈك ساقلاش ئۈچۈن تىرىشچانلىق كۆرسىتىدۇ
(2) ئاقساقاللار جامائەتتىكى بارلىق كىشىلەرگە كۆڭۈل بۆلىدۇ
(3) ئاقساقاللار دائىم ۋەز خىزمىتىگە قاتنىشىدۇ
(4) ئاقساقاللار پەقەت تەلىم بېرىپلا قالماي، سۈپۈرۈپ-تازىلاش ئىشلىرىغا ئوخشاش باشقا ئىشلارغىمۇ قاتنىشىدۇ
6. بىز ئاقساقاللار بىلەن ھەمكارلىشالايمىز
مۇقەددەس كىتابتا ئاقساقاللار بىلەن ھەمكارلىشىشنىڭ مۇھىم سەۋەبى يېزىلغان. ئىبرانىيلار 13:17-نى ئوقۇڭ، كېيىن تۆۋەندىكى سوئالغا جاۋاب بېرىڭ:
نېمە ئۈچۈن جامائەتتە يېتەكچىلىك قىلىدىغانلارغا خۇشاللىق بىلەن بويسۇنۇشىمىز كېرەكلىكى مۇقەددەس كىتابتا يېزىلغان؟
لۇقا 16:10-نى ئوقۇڭ، كېيىن تۆۋەندىكى سوئالغا جاۋاب بېرىڭ:
نېمە ئۈچۈن قارىماققا مۇھىم كۆرۈنمىگەن ئىشلاردىمۇ ئاقساقاللارغا بويسۇنۇشىمىز كېرەك؟
بەزىلەر مۇنداق دەيدۇ: «باشقىلارغا قوشۇلۇپ ئىبادەت قىلمىساممۇ، خۇداغا قانداق ئىبادەت قىلىشنى ئۆزۈم بىلىمەن».
سىزنىڭچە، جامائەت بىلەن بىرلىكتە خۇداغا ئىبادەت قىلىشنىڭ پايدىسى بارمۇ؟
خۇلاسە
ئەيسا جامائەتنىڭ بېشى. ئاقساقاللار ئۇنىڭ باشچىلىقىغا بويسۇنۇپ، جامائەتتە بىزگە تەسەللى بېرىش ئۈچۈن تىرىشىدۇ. ئۇلار ئىش-ھەرىكەتلىرىدە بىزگە ئۈلگە بولىدۇ. شۇڭا، ئۇلارنىڭ خىزمىتىنى خۇشاللىق بىلەن قوللاپ-قۇۋۋەتلەيمىز.
تەكرارلاش
جامائەتنىڭ بېشى كىم؟
ئاقساقاللار جامائەتتە قانداق ياردەم بېرىدۇ؟
ھەربىر يەھۋا گۇۋاھچىسىنىڭ جامائەتتە قانداق رولى بار؟
ئىزدىنىپ كۆرۈڭ
يېتەكچى كېڭەش ۋە باشقا ئاقساقاللار ئېتىقادچى قېرىنداشلارغا كۆڭۈل بۆلىدۇ. بىر مىسالنى كۆرۈپ بېقىڭ.
«پائالىيىتىمىز مەنئىي قىلىنغان ۋاقىتتا بىرلىكنى ساقلاش» (22:4)
رايونغا مەسئۇل ئاقساقالنىڭ قانداق خىزمەتنى قىلىدىغانلىقىنى بىلىۋېلىڭ.
جامائەتتە ئاياللارنىڭ قانداق رولى بار ئىكەنلىكىنى بىلىۋېلىڭ.
ئاقساقاللارنىڭ جامائەتتىكى قېرىنداشلارنى ئىلھاملاندۇرۇش ئۈچۈن قانداق تىرىشىپ خىزمەت قىلىدىغانلىقىنى بىلىۋېلىڭ.
«ئاقساقاللار خۇشاللىقىمىز ئۈچۈن جان كۆيدۈرىدۇ» («كۈزىتىش مۇنارى»، 2013-يىل، 15-يانۋار)