22 Vosi vana va nõliwile nda vakualombundi povivelo, va sokele 212. Ovo va kala vovaimbo avo ndomo ci likuata lulala wavo wepata lepata.+ Daviti la Samuele ukuavinjonde+ va nõla alume vaco oco va linge upange waco wa koleliwa. 23 Ovo kumue lomãla vavo, va kuatele ocikele coku lava polombundi vionjo ya Yehova,+ okuti onjo yombalaka. 24 Vakualombundi va kala kolonele vikuãla okuti, kutundilo, kutakelo, konano kuenda kombuelo.+ 25 Olonjanja vimue, vamanjavo va sukilile oku iya oku tundilila kovaimbo avo, oco va talavaye lavo vokuenda kuoloneke epanduvali. 26 Kua kala asongui* vakuãla vakualombundi va kuatele ocikele coku linga upange wa koleliwa. Ovo va kala va Lewi kuenda va kuatele ocikele coku tata olohondo lohondo* yoku seleka ovokuasi vionjo ya Suku yocili.+ 27 Ovo va enda oku pita uteke povitumãlo viavo va ilikiwila kolonepa viosi vionjo ya Suku yocili, momo va kuatele ocikele coku lavulula kuenda va kuatelevo ocikele coku kala losapi kuenje va enda oku yikula olombundi omẽle lomẽle.