Olonganji
2 Noke ungelo wa Yehova+ wa lamanela oku upisa ko Giligali+ oku endela ko Bokimi kuenje wa popia hati: “Ame ndo vupi Kegito kuenje ndo neni vofeka yina nda lisila oku eca ku vakukululu yene.+ Handi vali, nda popia siti: ‘Lalimue eteke ndi nyõla ocisila cange nda linga lene.+ 2 Ene, ka citava oku linga ocisila lolonungi viofeka yilo+ kuenda vu sukila oku kundula ovotala avo.’+ Pole, ene ka wa pokuili kondaka yange.+ Momo lie wa lingili ovina evi? 3 Eli olio esunga lieci nda popelavo siti: ‘Ame si ka va tundisa kovaso ene+ kuenda ovo va ka kala ndonjanjo kokuene+ kuenda olosuku viavo vi ka ku yapuisi.’”+
4 Eci ungelo wa Yehova a sapuila olondaka evi ku va Isareli vosi, omanu va fetika oku lila lolukandi. 5 Omo liaco, va luka ocitumãlo caco okuti, o Bokimi* kuenda oko va lumbila Yehova ocilumba.
6 Eci Yehosua a tuma omanu oco va ende, omunu lomunu pokati ka va Isareli wa enda kocipiñalo caye oco a tambule ofeka.+ 7 Omanu vamamako oku vumba Yehova koloneke viosi via Yehosua kuenda koloneke viosi viakulu vana vamamako oku kala lomuenyo noke lia Yehosua okuti, va mola ovilinga viosi vinene via Yehova vioku kuatisa Isareli.+ 8 Noke Yehosua omõla a Nune, ukuenje wa Yehova wa fa eci a tẽlisa 110 kanyamo.+ 9 Omo liaco, ovo vo kenda vocikanjo cocipiñalo caye ko Timinata-Heresi+ kovaimbo a kasi kolomunda via Efarimi konano Yomunda Gasi.+ 10 Ocitumbulukila cosi ca fa kuenje noke kua molẽha ocitumbulukila cikuavo ka ca kũlĩhĩle Yehova ndaño muẽle ovina eye a lingila o Isareli.
11 Omo liaco, va Isareli va linga ovina vĩvi kovaso a Yehova kuenda va vumba* va Baale.+ 12 Ovo va siapo Yehova Suku ya va isiavo, una wa vopa vofeka Yegito.+ Ovo va kuama olosuku vikuavo, olosuku viomanu vana va lisunguile lavo+ kuenda va vi kekamẽla kuenje va wengula onyeño ya Yehova.+ 13 Ovo va siapo Yehova kuenda va vumba Baale kumue loviñumañuma via Asitorete.+ 14 Omo liovina viaco, onyeño ya Yehova ya wengukila o Isareli kuenje wa va eca peka lia vana va va punda.+ Eye wa va landisa peka liovanyãli va va ñuala+ kuenda ovo ka va tẽlele oku tamalãla lovanyãli vavo.+ 15 Kuosi ovo va enda, eka lia Yehova lia va ñualelapo, poku va nenela eyambulo,+ ndomo Yehova a ci popele kuenda ndomo Yehova a lisilile kokuavo+ kuenje ovo va liyaka lohali yalua.+ 16 Omo liaco, Yehova wa katula olonganji vina via ponduile oku va popela peka lia vakuakupunda.+
17 Pole, va likalavo oku yevelela olonganji kuenda va linga upuepue lolosuku vikuavo loku vi kekamẽla. Ovo va yapuka lonjanga vonjila yina vakukululu yavo va endela, vana va enda oku pokola kovihandeleko via Yehova.+ Ovo ka va kaile nda vakukululu yavo. 18 Olonjanja viosi eci Yehova a va katuila olonganji,+ Yehova wa kala kumue longanji yaco kuenda wa enda oku va popela peka liovanyãli vavo oloneke viosi vionganji yaco; momo, Yehova wa lekisa ohenda*+ kohali yavo, yina ya kokiwa la vana va enda oku va talisa ohali+ kuenda vana va enda oku va kangisa.
19 Pole, eci onganji yi fa, ovo va enda oku lekisa vali esino okuti va isiavo ci sule poku kuama olosuku vikuavo, oku vi vumba kuenda oku vi kekamẽla.+ Ovo ka va silepo ovilinga viavo lovituwa viavo violonamalãla. 20 Oku sulako onyeño ya Yehova ya wengukila Isareli+ kuenda eye wa popia hati: “Omo okuti, omanu ava va sinĩla ocisila cange,+ cina nda handelekele vakukululu yavo kuenda ovo ka va pokuile kokuange,+ 21 lamevo, si tundisa kovaso avo ndaño muẽle yimue pokati kolofeka Yehosua a sia eci a fa.+ 22 Eci ci lingiwila oku seteka nda o Isareli yi kamamako oku lava onjila ya Yehova+ poku endelamo ndeci va isiavo va linga.” 23 Omo liaco, Yehova wa ecelela okuti olofeka viaco viamamako. Eye ka vi tundisile lonjanga kuenda ka vi ecele peka lia Yehosua.