Esekiele
21 Ondaka ya Yehova yeya vali kokuange yiti: 2 “A mõlomunu, imba ovaso konele yo Yerusalãi kuenda imba oluiya luatiamẽla kovitumãlo vi kola loku imba owanji watiamẽla kofeka yo Isareli. 3 Sapuila ofeka yo Isareli okuti: “Ca popia Yehova ceci hati: “Nda linga unyãli wove kuenda ndi ka pola osipata yange vocilalo cayo+ kuenje ndi ka kundula pokati kene ci kaile vakuesunga ale olondingaĩvi. 4 Omo okuti ndi ka kundula pokati kene vakuesunga kuenda olondingaĩvi, osipata yange yi ka poliwa vocilalo cayo okuti, yi katukila omanu vosi* vo konele yombuelo kuenda vo konele yonano. 5 Omanu vosi va ka kũlĩha okuti, ame muẽle ndi Yehova, ame nda pola osipata yange vocilalo cayo. Oyo ka yi ka tiukilamo vali.”’+
6 “Kuenje ove a mõlomunu, tula ocimuenyo osimbu* o luluma omo liusumba, tula muẽle ocimuenyo kovaso yavo.+ 7 Kuenje nda ovo va ku pulisa vati: ‘Momo lie o tulila ocimuenyo?’ Ove o ka tambulula ndoco: ‘Momo liesapulo limue.’ Olio li keya muẽle kuenda ovitima viosi vi ka yenguluka lusumba kuenje ovaka osi a ka pua ongusu, omanu vosi va ka sumua kuenda polongolo viavo viosi pa ka tunda ovava.*+ ‘Tala! Eci ci keya muẽle, ci ka pitako muẽle,’ oco Ñala Tõlo Yehova a popia.”
8 Ondaka ya Yehova yeya vali kokuange yiti: 9 “A mõlomunu, imba owanji wokuti: ‘Ca popia Yehova ceci hati: “Popia ndoco, Osipata yimue! Osipata yimue+ ya lepikiwa kuenda ya yelisiwa. 10 Osipata yimue ya lepikiwa oco yi ponde valua; oyo ya yelisiwa oco yi nine ndociliakulo.’”’”
“Ka tu sukila hẽ oku sanjuka?”
“‘Anga hẽ oyo* yi ka likala epangati liomõlange muẽle,+ ndeci oyo yi linga loviti viosi?
11 “‘Oyo ya eciwa oco yi yelisiwe kuenda oco yi ponde omanu. Osipata yaco ya lepikiwa kuenda ya yelisiwa oco yeciwe peka liukuakuponda.+
12 Kaluka lolukandi kuenda lisiõsiõla a mõlomunu,+ momo osipata ya katukila omanu vange; oyo ya katukila asongui vosi va Isareli.+ Ovo va ka fa losipata kumue lomanu vange. Omo liaco, veta kocikalo cove omo liesumuo. 13 Kua lingiwa ekonomuiso limue+ kuenda nye ci ka pita nda osipata ya likala epangati? Olio* ka li ka kalako vali,’+ oco Ñala Tõlo Yehova a popia.
14 “Kuenje ove a mõlomunu, imba owanji kuenda veta ovaka ove loku pitulula olonjanja vitatu hati: ‘Osipata yimue!’ Eyi osipata yimue yi ponda omanu valua, osipata yoku ponda okuti yi va ñuala.+ 15 Ovitima viavo vi ka yenguluka omo liusumba+ kuenda valua va ka kupukila polombundi violupale; Ndi ka koka olofa losipata. Ocili, oyo yi nina ndociliakulo kuenda ya yelisiwa oco yi ponde! 16 Osipata yimue ya tua yi teta konele yondio! Yi ponda konele yepĩli! Kuende kuosi kuna olamina yove yi suñamẽla! 17 Ndi ka vetavo ovaka ange kuenda oku linga esombiso limue kuenje onyeño yange yi ka tulumũha.+ Ame muẽle ndi Yehova, ame nda ci popia.”
18 Ondaka ya Yehova yeya vali kokuange yiti: 19 “A mõlomunu, sokiya olonjila vivali oco osipata ya soma yo Bavulono yi pite. Vivali vialio, vi ka tunda kofeka yimuamue kuenda ondimbukiso* yimue yi kapiwe apa etapalo lia tepiwila oku loña kalupale avali. 20 Ove o sukila oku lekisa onjila yimue oco osipata yi katukile o Raba+ ya va Amoni kuenda onjila yikuavo yi katukila olupale lua pama luo Yerusalãi+ ko Yuda. 21 Soma yo Bavulono wa talama oco a tãhele venyãla lietapalo muna olonjila vivali vi litepa. Eye o tutumũla olonjelia. O kũlĩhĩsa oviteka* viaye; o kũlĩhĩsa omuma. 22 Oku tãha kueka liaye liondio, ku tiamisiwila konele yo Yerusalãi, oco a tumbike olomakina vioku nyõla, poku handeleka oku ponda, oku eca ocileñi cuyaki, oku tuma olomakina vioku nyõla oco vi katukile olombundi, oku votola ocimbaka cimue coku katukila kuenda oku tunga ocimano cimue ci ñualako.+ 23 Pole, oco ci ka kala ndocitumasuku cimue cesanda kovaso ya vana* va lingile ocisila kokuavo.+ Pole, eye ivaluka eko liavo kuenda o ka va kuata.+
24 “Omo liaco, ca popia Ñala Tõlo Yehova ceci hati: ‘Ene wa lingisi okuti, eko liene muẽle li ivalukiwa poku situlula akandu ene kuenda oku ecelela okuti a muiwa kovilinga viene viosi. Cilo, omo okuti wa ivaluisiwi, vu kambatiwa longusu.’*
25 “Pole, eteke liove lia pitĩla, Ove wa lemẽhiwa calua haive wusongui umue ondingaĩvi yo Isareli okuti,+ otembo yeyambulo liove lia sulako yeya. 26 Ca popia Ñala Tõlo Yehova ceci hati: ‘Lula ekofue kuenda lula ekolowa.+ Ovina ka vi ka kala vali ndeci via kala kosimbu.+ Velisapo u o sule+ kuenda kapa kutito u wa velapo.+ 27 Enyõleho limue, enyõleho limue, ndi ka nena enyõleho limue kuviali. Uviali waco ka u ka tiamẽla komunu laumue toke eci una o sesamẽla uviali waco a pitĩla+ kuenda ndi ka weca kokuaye.’+
28 “Ove a mõlomunu, imba owanji kuenda popia hati: ‘Eci oco Ñala Tõlo Yehova a popia catiamẽla ku va Amoni kuenda kolondaka viavo vioku pembula.’ Popia ndoco: ‘Osipata yimue! Osipata yimue yopiwa vocilalo oco yi ponde; Oyo ya yelisiwa oco yi ponde kuenda oco yi nine ndociliakulo. 29 Omo liovinjonde viesanda kuenda ovitumasuku viove viesanda, ove o ka kongeliwa kuava va pondiwa* okuti, alume olondingaĩvi vana okuti otembo yeyambulo liavo lia sulako yeya. 30 Tiuwiya osipata vocilalo cayo. Ndi ka ku kangisila kocitumãlo wa kulila vofeka yocikoti cove. 31 Ndi ka sukumuila kokuove onyeño yange yalua. Ndi ka pepelela kokuove ondalu yonyeño yange kuenda ndi ka ku eca peka lialume olongangala, vana va loñoloha koku nyõla.+ 32 Ove o ka kala olohũi viondalu;+ osonde yove muẽle yi ka peseliwa vofeka kuenda ove ku ka ivalukiwa vali, momo ame ndi Yehova, ame nda ci popia.’”