Mateo
7 “Ko ka pisi, oco ka vu ka pisiwi; 2 oku pisa vu pisa lakuo, hakuo vo pisili, onjongo vu yonga layo haiyo vo yongeli. 3 Momo lie o vanjela okacinene ka kasi viso lia manjove, puãi ku limbuka ohangalo yi kasi viso liove? 4 O sapuila ndati manjove hoti, ‘Linga hupe okacinene viso liove,’ osimbu okuti viso liove muẽle muli ohangalo? 5 Okuambambe! Tete upa ohangalo viso liove, noke o mola ciwa ndomo upa okacinene viso lia manjove.
6 “Ko ka eci ovina vi kola kolombua, ale oku imba olomota viene viondongo kolongulu, okuti va vi liataila kuenje eci vi ñualapo viu kundumũhili.
7 “Lipiliki oku pinga kuenje vo wĩhi; lipiliki oku sandiliya kuenje vu sanga; kuenda lipiliki oku totola kuenje vo yuluili; 8 momo wosi o lipilika oku pinga o tambula, wosi o lipilika oku sandiliya o sanga, wosi o lipilika oku totola vo yuluilako. 9 Omunu upi pokati kene okuti nda omõlaye u pinga ombolo u wĩha ewe? 10 Ale nda u pinga ombisi u wĩha onyõha? 11 Nda ene vulondingaĩvi vu tẽla oku eca oviali viwa komãla vene, ca piãla enene Isiene o kasi kilu okuti eca ovina viwa kuava vo pinga!
12 “Ovina viosi vu yongola okuti omanu vo vi lingili, haivio vu linga kokuavo. Eci oco Ocihandeleko kuenda Ovaprofeto va popia.
13 “Likolisili oku iñila vombundi ya sukatela, momo ombundi ya sanjavala haiyo ya tanda yi tuala kenyõleho kuenje valua va endelamo; 14 osimbu okuti ombundi ya sukatela haiyo ya likupika oyo onjila yi tuala komuenyo kuenje vañami ñami va yi sanga.
15 “Lilavi kovaprofeto vesanda veya kokuene locipa comeme, pole vokati olombinji via tema. 16 Vu va limbukila kapako avo. Omanu va yunga hẽ ayuva kolosongo, ale akuyu kocambanda? 17 Cimuamue haico, uti uwa wima epako liwa, puãi uti wosi ũvi, wima epako lĩvi. 18 Uti uwa ka wimi epako lĩvi kuenda uti ũvi ka wimi epako liwa. 19 Uti wosi ka wimi epako liwa u tetiwa kuenje wimbiwa vondalu. 20 Ocili okuti omanu vaco, vu va limbukila kapako avo.
21 “Havosiko va nukula vati, a ‘Ñala, a Ñala,’ va iñila Vusoma wo kilu, te lika una o linga ocipango ca Isiange o kasi kilu. 22 Keteke liaco, valua va ka nukula vati: ‘A Ñala, a Ñala, ka tua imbile owanji vonduko yove, ka tua tundasaile olondele vonduko yove kuenda ka tua lingaile hẽ ovilimbu vialua vonduko yove?’ 23 Kuenje mopia lavo siti: ‘Sia lo kũlĩhi! Nundi, alondingakandu!’
24 “Omunu wosi o yeva olondaka evi kuenje o vi kapako, o sokisiwa lulume wa lunguka wa tungila onjo yaye vohanda. 25 Kuenje ombela lofela yalua via veta onjo yaco, pole ka ya kupukile, momo ya sevetiwa vohanda. 26 Puãi, wosi o yeva olondaka evi kuenje ka vi kapiko, o sokisiwa lulume eveke okuti wa tungila onjo yaye veseke. 27 Eci ombela lofela yalua via veta onjo yaco, ya kupuka kuenje ekundu liaco lia piãla.”
28 Eci Yesu a mala oku popia olondaka evi, owiñi wa komõha oku longisa kuaye, 29 momo eye wa va longisa ndomunu o vangula lunene wa tunda ku Suku, ka ci lingile nda vakuavisonehua.