Ovilinga
23 Paulu oku imba ovaso Kekanga wa popia hati: “Ene a vamanji, ame nda vumba Suku lutima wa yela toke etaili.” 2 Kuenje Ananiya ocitunda cinene, wa handeleka vana va kala ponele yaye oco vo vete komẽla. 3 Noke Paulu wo sapuila hati: “Acimano ca yanguiwa, Suku o ku veta. Weya oku ndi sombisa ndeci ci kasi Ocihandeleko osimbu o sinila Ocihandeleko poku tuma oku ndi veta?” 4 Vana va kalako va popia vati: “O kasi oku pembula ocitunda cinene ca Suku?” 5 Paulu wa popia hati: “A vamanji, sia kũlĩhĩle okuti eye ocitunda cinene. Momo ca sonehiwa citi, ‘Ku ka popie cĩvi ombiali yofeka yove.’”
6 Paulu eci a limbuka okuti onepa yimue ya va Sadukeo, yikuavo ya va Fariseo, wa kaluka lolukandi Vekanga hati: “Ene a vamanji, ame ndu Fariseo, ndimõla a va Fariseo. Ñasi oku sombisiwa omo lielavoko liepinduko liava va fa.” 7 Omo eye a popia ndoco, pokati ka va Fariseo la va Sadukeo pa katuka onjuela kuenda owiñi wa litepa. 8 Momo va Sadukeo va popia okuti ka kuli epinduko, ndaño ungelo ale espiritu, pole, va Fariseo va tava* kovina viaco. 9 Kuenje kueya onjuela yalua kuenda vamue vakuavisonehua okuti va tiamẽlele ku va Fariseo va votoka, yu va fetika oku popia vati: “Ka tua sangele eko komunu u, pole, espiritu limue ale ungelo umue, wa vangula laye—.” 10 Eci onjuela ya livokiya, kesongo wa kala lohele yokuti Paulu o pondiwa lavo, yu wa tuma asualali oku lokilako oco vo upe pokati kavo kuenda vo wambata kocivili casualali.
11 Pole, kuteke wa kuamamo, Ñala wa talama kovaso aye loku u sapuila hati: “Kuata utõi! Momo ndeci wa njimbila uvangi ko Yerusalãi, haico o njimbilavo uvangi ko Roma.”
12 Eci kua ca, va Yudea va tumbika ongombo, yu va lisinga vati, ka tu li, ka tu nyui toke eci tu ponda Paulu. 13 Ava va lisinga va kala eci ci pitahãla 40 komanu. 14 Kuenje alume vaco va enda kovitunda via velapo lakulu, yu va popia vati: “Etu tua lisinga* okuti ka tu li lacimue, toke eci tu ponda Paulu. 15 Omo liaco, ene kumue Lekanga te wa handeleki kesongo oco vo nene kokuene ndu okuti vu yongola oku konomuisa ciwa ocitangi caye. Pole, osimbu ka pitĩlile tu u taĩlili oco tu u ponde.”
16 Ocimumba ca Paulu ca yeva eci va kala oku sokiya kuenje wa enda, wa iñila kocivili casualali, yu wa ci lomboluila Paulu. 17 Kuenje Paulu wa vilikiya usongui umue wasualali loku u sapuila hati: “Ambata umalẽhe u ku kesongo kolohoka, momo o kuete cimue a ko lomboluila.” 18 Wo kuata, yu wo tuala ku kesongo kolohoka loku popia hati: “Omandekua Paulu ya mbilikiya kuenda ya minga oku nena umalẽhe u kokuove, momo o kuete cimue a ku sapuila.” 19 Kesongo kolohoka wo kuata peka kuenda wo nãlela ponele loku u pula hati: “Nye o yongola oku ndi lomboluila?” 20 Eye hati: “Va Yudea va sokiya oku ku pinga oco hẽla o nene Paulu Kekanga ndu okuti va yongola oku konomuisa ciwa ocitangi caye. 21 Pole, ku ka tave kepingilo liavo, momo ava vo lavekela ci pitahãla 40 kalume kuenda va lisinga* okuti, ka va li, ka va nyui toke eci vo ponda; ovo va lipongiya ale, va lavoka ondaka yove.” 22 Kuenje kesongo kolohoka wa tuma umalẽhe oku enda, yu wo sapuila hati: “Ku ka sapuileko laumue okuti ove wa ci ndomboluila.”
23 Wa kovonga asongui vavali loku va sapuila hati: “Pongiyi 200 kasualali oco va ende ko Kaisarea kuenda 70 vakuakuendela kotuvalu, 200 vakualonjelia, kowola yatatu kuteke.* 24 Pongiyivo otuvalu Paulu a endela, oco a pitĩle ciwa ku nguluvulu Feliki.” 25 Kuenje wa soneha ukanda hati:
26 “Ame ndi Kaludio Lusia, ndi sonehela Ñala Nguluvulo Feliki: Ovilamo! 27 Ulume u, wa kuatiwa la va Yudea kuenda wa laikele oku pondiwa lavo, pole, eci nda yeva okuti u Roma, ndeya lonjanga lasualali vange kuenje ndo popela. 28 Ndo wambata Kekanga liavo, loku lavoka oku limbuka esunga lieci vo pindikila. 29 Kuenje nda limbuka okuti vo pindikila olondaka vimue Viocihandeleko cavo, pole ka ca kaile ocina cimue ca sesamẽlele oku fa ale oku kapiwa vokayike. 30 Pole, omo nda limbuka okuti vo tumbikila ongombo, ndo tuma kokuove kuenda nda handeleka olomindiki viaye oco vo pindikile kovaso ove.”
31 Kuenje asualali va kuata Paulu ndomo va va handelekele, yu vo wambata luteke ku Antipatiri. 32 Keteke lia kuamamo, ovo va ecelela okuti vakuakuendela kotuvalu va tiukila laye kocivili casualali. 33 Vakuakuendela kotuvalu va iñila vo Kaisarea, va eca ukanda ku nguluvulu kuenda Paulu vo wecavo kokuaye. 34 Eye wa u tanga kuenda wa pula nda omunu waco wa tunda kolupale lupi kuenje noke wa limbuka okuti eye u Kilikiya. 35 “Hu yevelela,” oco eye a popia, “eci olomindiki viove viya.” Kuenje wa handeleka oco a laviwe kelombe* lia Herode.