Ovilinga
18 Noke yovina evi, eye wa tunda ko Atenai, yu wa enda ko Korindo. 2 Kuenje wa sanga ulume umue u Yudea o tukuiwa Akuila, onyitiwe yo Pondu okuti ndopo a tunda ko Italia kumue lukãi waye Prisila, momo Kaludio wa handeleka oco va Yudea vosi va tunde vo Roma. Eye wa enda kokuavo oku va nyula, 3 kuenje omo umesele wavo umuamue, wa kala konjo yavo kuenda va talavayela kumosi momo va kala vakuakutonga olombalaka. 4 Pole, kasambata osi wa longasaila* vosunangonga kuenda wa vetiya va Yudea la va Helasi oku tava.
5 Eci Sila la Timoteo va lokila ko Makedonia, Paulu wa litumbika koku kunda ondaka, loku eca uvangi ku va Yudea oco a lekise okuti Yesu eye Kristu. 6 Ovo va tamalãla la Paulu loku u sepula, kuenje eye wa tutumula uwalo waye loku va sapuila hati: “Osonde yene yi kale kovitue viene muẽle. Nda pua eko. Oku upisa cilo ngenda ku vakualofeka.” 7 Kuenje wa tundako,* yu wa enda konjo yulume umue o tukuiwa Tisiu Justo, ufendeli wa Suku, okuti onjo yaye yi lisungue losunangonga. 8 Pole, Krispo usongui wosunangonga, wa tava ku Ñala kumue la vakuanjo yaye vosi. Va Korindo valua va ci yeva, va tava, kuenje va papatisiwa. 9 Kuteke Ñala wa sapuila Paulu vocinjonde hati: “Ku ka kuate usumba, amamako oku vangula, ku ka liwekepo, 10 momo ame ñasi kumue love kuenda lomue oku veta oco a ku lemehe; omo ñuete omanu valua volupale olu.” 11 Eye oko a kala pokati kavo unyamo lolosãi epandu oku va longisa ondaka ya Suku.
12 Eci Galio a kala epalanga* lio ko Akaya, va Yudea va katukila Paulu kuenje vo tuala kekanga, 13 loku popia vati: “Ulume u, o kasi oku vetiya omanu oco va fendele Suku lonjila yimue okuti ka ca sungulukile kocihandeleko.” 14 Osimbu Paulu a kala oku vangula, Galio wa sapuila va Yudea hati: “Nda ca kaile elinga limue lĩvi, ale ekandu linene, ene a va Yudea, nda ca sunguluka ame oku ku yeveleli lepandi. 15 Nda ondaka wa neni yatiamẽla kondaka yolonduko kuenda ocihandeleko cene, ene muẽle ci tetululi. Si yongola oku linga onganji yovina evi.” 16 Oco wa va lupuisa kekanga. 17 Vosi yavo va kuata Sositene usongui wosunangonga kuenda va fetika oku u tipuila kovaso yekanga. Pole, Galio ovina evi ka vio sakalasaile.
18 Noke yoku kalako oloneke vimue, Paulu wosika vamanji kuenje wa enda ko Suria lonaviyu kumue la Prisila kuenda Akuila. Eye wa litetele esenya ko Kengerai, momo wa lingile ocisila cimue. 19 Eci va pitĩla ko Efeso, oko a va sia; pole eye wa iñila vosunangonga kuenje wa konomuisa ovisonehua la va Yudea. 20 Ovo va kala oku u lipilikila oco a amisepo vali kamue, eye ka tavele, 21 pole, wa vosika loku va sapuila hati: “Nda Yehova wa panga, ndi tiuka vali kokuene.” Kuenje wa tunda ko Efeso lonaviyu, 22 wa lokila ko Kaisarea. Eye wa lamanela ko Yerusalãi oku lama ekongelo, noke wa lokila ko Antiokea.
23 Noke yoku kalako otembo yimue, wa tunda, yu wa nyula ovitumãlo vialua vofeka yo Galatia kuenda yo Frugia kuenje wa kolisa olondonge viosi.
24 Ulume umue u Yudea o tukuiwa Apolosi, onyitiwe yo Alexandria, wa pitĩla ko Efeso; eye wa loñolohele koku linga olohundo kuenda wa kũlĩhĩle ciwa Ovisonehua. 25 Ulume waco wa pindisiwile volonjila via Yehova kuenda omo a kuatele ombili yespiritu, wa sapula loku longisa lutate ovina viatiamẽla ku Yesu, pole, wa kũlĩhĩle lika epapatiso lia Yoano. 26 Eye wa fetika oku vangula lutõi vosunangonga kuenje eci Prisila la Akuila vo yeva, vo kovonga kuenda vo lomboluila ciwa onjila ya Suku. 27 Eci a sokiya oku enda ko Akaya, vamanji va sonehela olondonge, loku va handeleka okuti vo tambula locisola. Eci a pitĩlako, wa kuatisa calua vana va tava omo liohenda ya piãla ya Suku; 28 kuenje osimbu a kala oku eca uvangi Lovisonehua okuti Yesu eye Kristu, wa lekisa kovaso omanu okuti va Yudea va lueya.