Va Roma
2 Amunu o vela ukuẽle, ku kuete omoko yoku u pisa; omo eci o pisila ukuẽle, o lipisa ove muẽle, momo ove o pisa, o lingaingavo ovina viaco. 2 Tua kũlĩha okuti Suku o tetulula locili vana va linga ovina viaco.
3 Amunu, osimbu o pisa vana va linga ovina viaco, puãi ove o vi lingavo, o sima okuti o puluka kesombiso lia Suku? 4 Ale o lavisa ukuasi wohenda yaye, lepandi kuenda esuluviko, omo kua kũlĩhĩle okuti Suku vohenda yaye o seteka oku ku tuala koku likekembela? 5 Puãi omo weyuka olonamalala kuenda utima wa siva, o kasi oku liselekela episo keteke lionyeño, halio lioku situlula oku tetulula kua Suku kuesunga. 6 Kuenje eye o muisa omunu lomunu lovilinga viaye: 7 ku vana va sandiliya ulamba, ekemainyo kuenda etimba ka li nyõleha poku pandikisa kupange uwa, va ka kuata omuenyo ko pui; 8 puãi ku vana va tamalãla kuenda vana ka va pokola kocili, pole va pokola kevĩho, ku ka kala onyeño yalua. 9 Ku ka kala ohali kuenda ongongo komanu vosi va linga eci cĩvi, tete u Yudea, noke u Helasi; 10 pole, ku vana va linga eci ciwa ku ka kala ulamba, ekemainyo kuenda ombembua, tete u Yudea, noke u Helasi. 11 Momo Suku hokuacameko.
12 Vosi vana ka va kũlĩhĩle ocihandeleko pole, va linga ekandu, va ka nyõleha ndaño ka va kũlĩhĩle ocihandeleko; puãi vana va linga ekandu osimbu va kũlĩha ocihandeleko, va ka sombisiwa ndomo ci kasi ocihandeleko. 13 Momo vakuakuyeva ocihandeleko havoko vakuesunga kovaso a Suku, pole, vana va pokola kocihandeleko ovo va tendiwa okuti vakuesunga. 14 Momo vakualofeka vana ka va kuete ocihandeleko ca Suku, pole, va linga ovina viocihandeleko, ndaño ka va kuete ocihandeleko, va likapela ovo muẽle ocihandeleko. 15 Ovo va lekisa okuti eci ci kisika ocihandeleko, ca sonehiwa vovitima viavo, osimbu owanji wovutima wavo u va imbila uvangi, lovisimĩlo viavo va pisiwa ale va yovuiwa. 16 Eci ci ka lingiwa keteke Suku a ka sombisa ovina viomanu viuyombeki vonduko ya Kristu Yesu, ndolondaka viwa ame ñasi oku kunda.
17 Nda ove o litukula huti ndu Yudea kuenje o kolela ocihandeleko loku lipandela Suku, 18 kuenda wa kũlĩha ocipango caye loku tava ovina via velapo omo wa longisiwa Ocihandeleko, 19 loku likolela okuti wusongui wolomeke, vucinyi cava va kasi vowelema, 20 haive ukuakupindisa ava ka va kuete olondunge, vulongisi womãla, omo o kuete ociseveto cukũlĩhĩso kuenda ocili Vocihandeleko— 21 oco hẽ, ove o longisa ukuẽle ku lilongisa ove muẽle? Ove o kunda okuti “Ku ka ive,” iva? 22 Ove o popia huti, “Ku ka linge ukahokolo,” o linga ukahokolo? Ove o nyehũla oviteka, o punda olonembele? 23 Ove ukuakulipanda locihandeleko, o tomba Suku poku sinila Ocihandeleko? 24 Momo “onduko ya Suku yi kasi oku sepuiwa pokati ka vakualofeka mekonda liene,” ndeci ca sonehiwa.
25 Ocili, evamba li kuatisa lika nda o pokola ocihandeleko; pole, nda ove ukuakusinila ocihandeleko, evamba liove hevambako. 26 Nda omunu ka seviwile evamba o pokola ovisila viesunga Viocihandeleko, uyamba waye hẽ ka u tendiwa ndevamba? 27 Omunu ka seviwile evamba nda o pokola Ocihandeleko, o ku vetela evelo nda ove o sinila ocihandeleko ndaño o kuete ocihandeleko levamba. 28 U Yudea hayunako o molẽha ño kilu kuenda evamba li molẽha ño ketimba, hacimueko. 29 Pole, u Yudea, una okuti u Yudea vutima kuenda evamba liaye liovutima omo liespiritu, hamomoko liocihandeleko. Kuenje esivayo liomunu waco ka li tundi komanu, puãi li tunda ku Suku.