Ovilinga
25 Eci Festo a pitĩla volupale oco a viale, noke yoloneke vitatu wa tunda ko Kaisarea oku lamanela ko Yerusalãi. 2 Kuenje ovitunda via velapo kumue lalume va kemãla va Yudea va sapula Paulu kokuaye. Ovo va livondela ku Festo, 3 lohenda* oco a tume Paulu oku iya ko Yerusalãi. Pole, ovo va yonguile oku tungila ongombo Paulu loku u wipaila vonjila. 4 Pole, Festo wa tambulula okuti Paulu o kala vo Kaisarea, momo eye wa laikele oku endako ndopo. 5 “Omo liaco, vana va kuete omoko pokati kene,” oco eye a popia, “veye lame kuenje vo pindike nda ulume waco wa linga cimue cĩvi.”
6 Noke yoku kala pokati kavo oloneke vimue okuti ka via tẽlele ecelãla ale ekũi koloneke, wa lokila ko Kaisarea kuenda keteke lia kuamamo wa tumãla komangu yekanga kuenje wa tuma oku nena Paulu. 7 Eci eye a pitĩla, va Yudea vana va tundilila ko Yerusalãi vo ñuala, loku u lundila ovina vialua, okuti ka va tẽlele oku imba uvangi walundi aco.
8 Paulu wa liteyuila poku popia hati: “Sia lueyele Ocihandeleko ca va Yudea, ndaño onembele ale Kaisare.” 9 Festo omo wa yonguile oku sanjuisa va Yudea, wa kumbulula Paulu hati: “O yongola hẽ oku enda ko Yerusalãi oco o sombisiwe kovaso ange omo liovina evi?” 10 Paulu wa tambulula hati: “Ndi tãi kovaso yomangu yekanga ya Kaisare kuna ndi sesamẽla oku sombisiwa. Sia lingile cimue cĩvi ku va Yudea, ndeci wa ci kũlĩha. 11 Nda okuti ndindingaĩvi kuenda nda linga cimue cĩvi okuti ndi sesamẽla oku fa, si yuvula oku fa; puãi nda ovina alume ava va kasi oku mindika haviociliko, lomue o kuete omoko yoku makuila kokuavo. Ame nukula Kaisare!” 12 Oco Festo noke yoku vangula lolondunguli viekanga, wa popia hati: “Omo wa tukula Kaisare; wenda ku Kaisare.”
13 Eci pa pita oloneke vimue, soma Agripa kumue la Bernike veya ko Kaisarea oku pasuisa Festo. 14 Omo okuti va kalako oloneke vimue, Festo wa sapuila ocitangi ca Paulu ku soma hati:
“Kuli ulume umue Feliki a sile vokayike, 15 kuenda eci nda kala ko Yerusalãi ovitunda via velapo lakulu vo ko Yudea vo pindika kuenje va pinga okuti ndu pisa. 16 Pole, nda tambulula okuti hacituwako ca va Roma oku pakula ño omunu ocali, osimbu u wa pakuiwa ka lisangele lolomindiki viaye iso liso okuti o kuata epuluvi lioku liteyuila kondaka vo pindikila. 17 Eci ovo va pitĩla kulo, sia kaile osimbu, keteke lia kuamamo nda tumãla komangu yekanga kuenda nda tuma oku nena ulume waco. 18 Olomindiki viaye eci via votoka ka vio pindikilile cimue cĩvi kovina nda kala oku sima. 19 Ovo va lihoyisila ño omo liefendelo liavo liosuku* kuenda liulume umue o tukuiwa Yesu, una wa file, pole, Paulu wa popia hati lopo o kasi lomuenyo. 20 Omo ca natamẽle ndomo ndi tetulula ocitangi caco, ndo pula nda o yongola oku enda ko Yerusalãi okuti oko a sombisiwila ondaka yaco. 21 Puãi eci Paulu a pinga okuti o yikiwa toke eci a tetuluiwa la Augustu,* nda handeleka okuti o yikiwa toke eci ndu tuma ku Kaisare.”
22 Noke Agripa wa sapuila Festo hati: “Lame njongolavo oku yevelela omunu waco.” “Hẽla,” oco eye a popia, “hu yeva.” 23 Keteke lia kuamamo, Agripa la Bernike veya lulamba walua, yu va iñila vonjo yekanga kumue la va kesongo, lalume va kemãla volupale; kuenje eci Festo a tuma oku nena Paulu, oco vo nena. 24 Festo wa popia hati: “A Soma Agripa kuenda ene vosi vu kasi palo letu, vu lete omunu u, una owiñi wosi wa va Yudea va minga ci kale vo ko Yerusalãi lava va kasi kulo va kaluka vati, eye ka sesamẽla vali oku kala lomuenyo. 25 Pole, nda limbuka okuti eye ka lingile lacimue okuti o sesamẽla oku fa. Kuenje eci ulume u a tukula Augustu, nda linga esokiyo lioku u tuma. 26 Si kuete lacimue ndi sonehela Ñala yange catiamẽla kokuaye. Omo liaco, ndo nena kovaso yene vosi, ca piãla vali kokuove a Soma Agripa, okuti noke yoku u konomuisa, ñuata cimue coku soneha. 27 Momo ka ca ndi sungulukile oku tuma omandekua yimue okuti ka ku lekisiwa esunga lieci vo pindikila.”