Ovilinga

27 Eci tua sokiya oku enda lonaviyu ko Italia, va kundika Paulu lolomandekua vikuavo ku kesongo umue wasualali o tukuiwa Juliu, wocivili ca Augustu. 2 Tua londa vonaviyu yo ko Andrometeo ya laikele oku enda katapu o kohulo yokalunga kolupale luo Asia, noke tua fetika ungende; Aristarko u Makedonia wa tunda ko Tesalonike wa kalavo letu. 3 Keteke lia kuamamo tua pitĩla ko Sidono kuenje Juliu wa tata Paulu lohenda* kuenda wa ecelela okuti eye enda kakamba vaye oco vo kuatise.

4 Eci tua tundako tua pita lonaviyu ko Kupro, momo ofela ya tu tateka. 5 Eci tua yoka okalunga ko Kilikiya kuenda ko Pamfulia, tua pitĩla ko Mura yo ko Lukia. 6 Oko kesongo kasualali a sanga onaviyu ya tunda ko Alexandria yenda ko Italia kuenje wa tu kapamo. 7 Noke yoku enda evando oloneke vialua, tua pitĩla ko Kinido lohali yalua. Momo ofela ya tu tateka oku amisako lungende kuenje tua enda lonaviyu ko Kurete lo ko Salimone. 8 Eci tua tunda kohulo yokalunga lohali yalua, tua pitĩla kocitumãlo ci tukuiwa Etapu Lia Posoka ocipepi lolupale luo Lasea.

9 Omo tua pita oloneke vialua, loku endela vonaviyu ca kokele ohele kuenda Eteke Lioku Likandangiya Okulia lia pita, Paulu wa lungula, 10 loku va sapuila hati: “Ene alume, nda limbuka okuti ungende ulo u kala wohali lepese lialua, pole haliovikuatako lika ale lonaviyu, puãi lovimuenyo vietu.” 11 Kesongo wa yevelela ukuakuendisa onaviyu kuenda muẽleanaviyu, pole ka yevelile eci Paulu a popia. 12 Omo okuti ketapu liaco ka kua sungulukile oku kalako kotembo yombambi, valua va imba onumbi oco va tundeko, okuti va pita otembo yombambi ko Fenikise, etapu lio Kurete li loña kutundilo lo kutakelo.

13 Eci ofela yo kutundilo ya fetika oku sika levando va simĩle okuti va tẽlisa ale ocimãho cavo kuenje va yelula onjundo, yu va pita kohulo yokalunga ko Kurete. 14 Noke yokatembo kamue, kueya ehunguhungu linene liofela li tukuiwa Eurakulo.* 15 Eci onaviyu ya kuatiwa okuti ka ya tẽlele oku tamãlala lofela tua yeca oco yende lofela. 16 Kuenje eci tua pita kokacifuka ka tukuiwa Kaluda, ca tu lingila upange oku pandeka okawato* ka kala oku kokiwa lonaviyu. 17 Eci va ka yelula va pitisa ovikolo kosi yonaviyu; momo va kala lusumba sanga va liveta Kondunda yeseke kuenje va lowisa olonanga vionaviyu okuti va enda lofela. 18 Omo ehunguhungu lia tu tuñunya calua, keteke lia kuamamo, va fetika oku inasi ovikuata vionaviyu. 19 Kuenje keteke liatatu, va inasi ovikolo vionaviyu.

20 Omo ekumbi kuenda olombungululu ka via molẽhele oloneke vialua, lehunguhungu linene lia kala oku tu veta, elavoko lietu lioku popeliwa lia fetika oku tepuluka. 21 Eci va pita otembo yalua okuti ka va lile, Paulu wa talama pokati kavo, yu wa popia hati: “Alume, hĩse nda wa njeveli kuenda nda ka wa tundili ko Kurete oku mola ohali eyi, lepese eli. 22 Cilo, ndu peyi siti kuati utõi, momo lomue pokati kene o ka pesela omuenyo, puãi onaviyu lika. 23 Momo uteke ulo kovaso yange kua talama ungelo umue wa Suku una ndi vumba haeye ndi lingila upange u kola, 24 wa popia hati, ‘Ku ka yokoke a Paulu. O talama kovaso a Kaisare kuenda tala! Suku wa ku ĩha vosi va endela kumue love vonaviyu.’ 25 Omo liaco, kuati utõi ene alume, momo nda kolela Suku okuti ci lingiwa ndeci va ndi sapuila. 26 Kuenje tu ka imbiwa kocifuka cimue.”

27 Noke kuteke wekũi lakuãla osimbu tua pungua pungua Vokalunga ko Adria, vokati kuteke vakuanaviyu va sima okuti tua kala ocipepi longongo. 28 Eci va seteka oku longa kuaco, va sanga 20 kapeka,* eci va amisako vali va seteka kuenje va sanga 15 kapeka.* 29 Omo tua kala lusumba woku saka kovawe, va lowisa olonjundo vikuãla kesĩla lionaviyu kuenje va yonguile okuti ku ca. 30 Pole, eci vakuanaviyu va seteka oku tundamo, va lowisa okawato vokalunga locisimĩlo coku lowisa olonjundo kocinyũlu conaviyu, 31 Paulu wa sapuila kesongo kuenda asualali hati: “Vu popeliwa lika nda omanu ava va siala vonaviyu.” 32 Asualali va teta ovikolo viokawato okuti ka kupuka.

33 Eci kua kala loku ca, Paulu wa vetiya omanu vosi oco va lie cimue, loku popia hati: “Etaili ca tẽla ekũi lakuãla koloneke vu kasi oku lavulula kuenda toke cilo ka wa lili cimue. 34 Ndu u vetiyi oco vu lie cimue; eci cu kuatisi, momo lalimue esinga liovitue viene li nyõleha.” 35 Noke yoku popia olondaka evi, wa nyañula ombolo, wa eca olopandu ku Suku kovaso ya vosi, wa yi timbula, yu wa fetika oku lia. 36 Vosi va kuata utõi kuenje va fetikavo oku lia. 37 Kuenje vosi tua kala vonaviyu tua tẽla eci ci soka 276 komanu. 38 Pana okuti va lia kuenje ve kuta, va inasi otiliku vokalunga oco va leluise onaviyu.

39 Eci kua ca, ka va limbukile ongongo, pole, va mola okacifuka kamue ka kuete eseke kuenje va sokiya oku londisako onaviyu nda ci tẽliwa. 40 Oco va tetako olonjundo, yu va vi sia vokalunga, loku kutulula ovikolo viovipando; kuenje eci va katula onanga yocinyũlu conaviyu va loña kohulo yokalunga. 41 Eci va veta komunda yeseke ya kala pokati kalondo, ocinyũlu ca tika veseke kuenje onaviyu ya saka okuti ka yi lisengi, pole esĩla liaco lia teka teka omo liakimba. 42 Omo liaco, asualali va sokiya oku ponda olomandekua okuti lomue o puluka poku liteva. 43 Pole, omo kesongo kasualali wa yonguile oku popela Paulu, wa va tateka oku ci linga. Eye wa handeleka okuti vana va tẽla oku liteva va limba tete vokalunga oco va pitĩle kongongo, 44 kuenda vakuavo va kuameko, vamue lavaya, vakuavo lovikuata vionaviyu. Kuenje vosi va pitĩla kongongo lomuenyo.