Va Roma
9 Ñasi oku vangula ocili vu Kristu; si kasi oku kemba, momo espiritu sandu kuenda utima wange vi njimbila uvangi, 2 wokuti nda sumua calua kuenda utima wange u yevite evalo lialua. 3 Momo nda yonguile oku tepiwa ndomunu wa siñaliwa vu Kristu oco ndi kuatise vamanjange, haivo vangandiange ketimba, 4 okuti va Isareli. Ovo va tendiwa ndomãla kuenje va tambula ulamba, ovisila, Ocihandeleko, upange u kola kuenda olohuminyo. 5 Ovo ovitumbulukila via vakukululu kuna Kristu a citiwila ketimba. Esivayo li eciwe ku Suku oloneke ka vi pui, una o viala ovina viosi. Amene.
6 Pole, eci ka ci lekisa okuti ondaka ya Suku ya ponya. Momo havosiko vakuambuto ya Isareli okuti va “Isareli” yocili. 7 Ndaño okuti ovo omãla omo vakuacitumbulukila* ca Avirahama; pole, “Eci ci tukuiwa ocitumbulukila* cove, ci tunda ku Isake.” 8 Omãla vo ketimba hamãlako va Suku, pole, omãla va citiwa omo liohuminyo, va tendiwa okuti ocitumbulukila.* 9 Momo ondaka yohuminyo yeyi: “Kunyamo wiya kotembo ndeyi, niuka kuenje Sara o kuata omõla ulume.” 10 Ohuminyo eyi ka ya eciwile lika vepuluvi liaco, ya eciwavo eci Rebeka a mina olonjamba la Isake kukululu yetu; 11 leci omãla ka va citiwile handi okuti ka va lingile ndaño ciwa ndaño cĩvi, oco ocipango ca Suku catiamẽla koku nõliwa camamako, okuti halovilingako, te la Una o kovonga, 12 kuenje Suku wo sapuila hati: “Ukulu o linga upika wumalẽhe.” 13 Ndomo ca sonehiwa citi: “Nda sola Yakoba, puãi Esau ndo suvuka.”
14 Oco hẽ nye tu popia? Ku Suku kuli hẽ eci ka ca sungulukile? Hacoko! 15 Momo eye wa sapuila Mose hati: “Ndi lekisa ohenda ku una ndi yongola oku lekisa ohenda kuenda ndi lekisa ocikembe ku una ndi yongola oku lekisa ocikembe.” 16 Oku nõliwa kuaco ka kua tiamẽlele konjongole yomunu, ale ku una o likolisilako,* te ku Suku una o kuete ohenda. 17 Momo catiamẽla ku Fareo ocisonehua ci popia citi: “Omo liaco nda ecelela okuti ove amamako lomuenyo: oco ndi lekise unene wange mekonda liove kuenda onduko yange okuti yi sapuiwa koluali luosi.” 18 Eye o lekisa ohenda ku a panga, kuenda o tĩlisa utima womunu a panga.
19 O mulisa hati: “Momo lie eye handi a vetela evelo omanu? Helie o tẽla oku tamalala locipango caye?” 20 Ove helie okuti o kumbulula Suku? Anga cimue ca tungiwa ci pula utungi walio citi: “Nye wa nungila ndomo?” 21 Ukuakutunga olombia ka kuete hẽ omoko yokuti lonata yimuamue o tunga ocikuata ca posoka leci caño? 22 Nye ci popiwa nda Suku o yongola oku lekisa onyeño yaye lunene waye kuenda wa ecelela lepandi lialua okuti ovikuata vionyeño vi tungiwila oku nyõliwa? 23 Nda eci ca lingiwila oku kũlĩha ulamba waye walua omo liovikuata viohenda, vina eye a pongiyile ale oku muisua ulamba, 24 okuti etu, vana okuti ka va kovongele lika pokati ka va Yudea, pole, lo pokati kolofeka, oco hẽ nye ci lingiwa? 25 Ndeci eye a popia velivulu lia Hosea hati: “Vana okuti hamanuvangeko, ndi va tukula okuti ‘omanu vange’ kuenda ukãi ka soliwile, ‘o soliwa’; 26 kocitumãlo kuna nda va sapuilile okuti, ‘Kavumanuvangeko,’ haiko va ka tukuiwa hati, ‘omãla va Suku o kasi lomuenyo.’”
27 Kuenje Isaya wa kalukila va Isareli hati: “Ndaño omanu vove va soka ndeseke liokalunga, ocisupe cavo lika ci ka popeliwa. 28 Momo Yehova o ka pisa ilu lieve kuenda o ka ci tẽlisa lonjanga.”* 29 Ndeci Isaya a popele okuti: “Nda Yehova ukualohoka ka tu sililepo ocitumbulukila,* nda tua kala ndo Sodoma kuenda nda tua sokisiwa lo Gomora.”
30 Oco hẽ nye tu popia? Omanu vakualofeka vana okuti ndaño ka va sandi esunga, va sanga esunga, okuti esunga li tunda kekolelo; 31 pole, va Isareli va seteka oku sanda esunga lia tiamẽla kocihandeleko, ka va li sangele. 32 Momo lie? Momo va simĩle okuti va pondola oku kala vakuesunga omo liovilinga, okuti halekoleloko. Ovo va lilondoka “vewe liocilondokua”; 33 ndeci ca sonehiwa citi: “Tala! nda kapa vo Siono ewe liocilondokua halio ewe lietatamiso, pole, u o li kolela ka sumua.”