Ovilinga

19 Noke yovina evi, osimbu Apolosi a kala ko Korindo, Paulu wa enda kolofeka vio konano, yu wa lokila ko Efeso. Wa sangako olondonge vimue, 2 kuenda wa va pula hati: “Ene hẽ wa tambuli espiritu sandu eci wa tavi?” Vo tambulula vati: “Ka tua la yeva okuti kuli espiritu sandu.” 3 Eye wa va pulisa vali hati: “Oco hẽ, wa papatisiwi lepapatiso lipi?” Ovo vati: “Lepapatiso lia Yoano.” 4 Paulu wa popia hati: “Yoano wa papatisa lepapatiso liondimbukiso yoku likekembela, loku sapuila omanu oco va tave ku una wa laikele oku iya konyima yaye, okuti Yesu.” 5 Noke yoku ci yeva, ovo va papatisiwa vonduko ya Ñala Yesu. 6 Kuenje eci Paulu a va kapa ovaka, espiritu sandu lia va wila kuenda va fetika oku vangula alimi aiñi aiñi loku imba owanji. 7 Vocosi, va kala eci ci soka 12 kovapostolo.

8 Eci a iñila vosunangonga, wa vangula lutõi volosãi vitatu, wa linga olohundo loku vetiya omanu poku vangula catiamẽla Kusoma wa Suku. 9 Pole, eci vamue va tamalãla kuenje ka va tavele,* loku pembuila Onjila yaco kovaso yowiñi, eye wa tunda pokati kavo yu wa ambata olondonge, kuenje eteke leteke wa linga olohundo vosikola ya Turano. 10 Eci ca lingiwa vokuenda kuanyamo avali, oco olonungi viosi vio volupale luo Asia vi yeve ondaka ya Ñala, ci kale va Yudea kuenda va Helasi.

11 Suku wa linga ovikomo vinene vonduko ya Paulu, 12 kuenda ovowalo lavendalia o ketimba liaye via ambatiwa kolombeyi kuenje va sakuiwa, lolondele via va tunda. 13 Va Yudea vamue va enda oku ñuala ñuala oku tundisa olondele, loku seteka oku tukuila onduko ya Ñala Yesu ku vana va kuatiwile lolondele; yu va popia vati: “Vonduko ya Yesu, una Paulu a kunda, hu handeleka okuti tunda.” 14 Kua kala omãla epanduvali vocitunda ca velapo ca va Yudea, o tukuiwa Skewa, okuti va endavo oku ci linga. 15 Pole, ondele ya va kumbulula yiti: “Ame nda kũlĩha Yesu kuenda Paulu, puãi ene velie?” 16 Omunu wa kuatiwile londele wa volumũhĩla kuenda wa va yula vosi yavo kuenje va lemehiwa loku tila epõlõla vonjo yaco. 17 Ovina viaco via yevala ku vosi, ci kale ku va Yudea kuenda va Helasi va tunga vo Efeso; vosi yavo va kuata usumba kuenje onduko ya Ñala Yesu ya kemainyiwa. 18 Valua pokati ka vana va tava, va litavela loku sapula ovilinga viavo. 19 Kuenje ovimbanda via nena alivulu avio oku tãha loku a yokela kovaso omanu vosi. Eci va tenda ondando yavio, ya soka 50.000 kolopalata. 20 Omo liaco, ondaka ya Yehova ya amamako oku kula lunene walua.

21 Noke yovina evi, Paulu wa sokiya oku enda ko Makedonia, lo ko Akaya, okuti enda ko Yerusalãi. Eye wa popia hati: “Noke yoku endako, ha molavo ko Roma.” 22 Kuenje wa tuma oloñuatisi viaye vivali ko Makedonia, okuti Timoteo la Erasto, puãi eye wa siala otembo yimue volupale luo Asia.

23 Koloneke viaco kua votoka onjuela yalua mekonda Lionjila ya Ñala. 24 Momo ulume umue o tukuiwa Demetrio ukuakutela opalata, wa enda oku luvikiyila Artemisi* otunembele tuopalata kuenje ca nenela olomesele onganyu yalua. 25 Eye wa vongolola kumue la vakuavo va lingaile upange waco loku popia hati: “Ene akuetu, wa ci kũlĩhi ciwa okuti komĩlu eyi oko ku tunda onganyu yetu. 26 Vu lete kuenda wa yevi okuti hako Efesoko lika, puãi pa kamba naito kolupale luo Asia yosi okuti Paulu u wa siata oku vetiya loku konyuisa owiñi walua kuenje ovo va tava kueci eye a popia okuti olosuku via pangiwa lovaka haviociliko. 27 Oco kuli ohele yokuti hamĩlu yetuko lika yi sepuiwa, pole, onembele yinene yosuku yukãi Artemisi layovo yi tombiwa, yina okuti olupale luosi luo Asia loluali luosi vo fendela, yi laika oku pumba ulamba wayo.” 28 Eci va ci yeva va tema kuenda alume va kaluka vati: “Artemisi ya va Efeso eye fũ!”

29 Volupale mue yuka onjuela kuenje vosi va lupukila vocila, yu va kuata Gaio la Aristarko va Makedonia, vana va endela kumue la Paulu. 30 Puãi Paulu wa yonguile oku iñila vowiñi, pole, olondonge ka vio wecelele. 31 Ndaño muẽle vakuakupongiya ovipito lolomapalo okuti va kala akamba vaye, va tuma ondaka loku u pinga oco ka ka lukute oku iñila vocila. 32 Osimbu vamue va vilikiya ocina cimue, vakuavo va vilikiya ciñi; momo owiñi wa kala vatatahãi kuenda valua pokati kavo ka va kũlĩhĩle esunga lieci va liongoluila. 33 Kuenje vopa Alexandro pokati kowiñi, kuenda va Yudea va yonguile oku u pitisa kovaso, pole Alexandro wa linga ondimbukiso leka liaye oco a lifundileko kovaso omanu. 34 Pole, eci va limbuka okuti eye u Yudea, vosi va kaluka olumue vokuenda kuolowola vivali vati: “Artemisi ya va Efeso eye fũ!”

35 Eci kalei kolupale a tulumũla owiñi, wa pula hati: “A va Efeso, pokati komanu helie ka kũlĩhĩle okuti olupale lua va Efeso lu lava lava onembele yinene ya Artemisi lociñumañuma ca loka kilu? 36 Omo ka citava oku patãla ovina evi, vu sesamẽla oku unjuka okuti ka vu lingi ahuku. 37 Momo wa neni kulo alume ava okuti havakuakupundako olonembele, pamue vakuakupembula osuku yetu yukãi. 38 Nda Demetrio lolomesele vi kasi laye va kuetele umue ondaka, akanga ya, lapalanga* kuli; oco va lipindike omunu lukuavo. 39 Puãi, nda vu simi okuti ovo va lueya ocihandeleko cikuavo, eci olonungi violupale viya, vi ci sokiye ndomo ci likuata locihandeleko. 40 Momo tu kasi kohele yoku tu pindikila onjuela yetaili, ndaño ka kuli esunga lalimue lionjuela yaco.” 41 Kuenje noke yoku popia ovina evi, wa malusula ohongele.