Ovilinga

9 Saulu wa amamako oku tata lãvi olondonge via Ñala kuenda omo a kuatele onjongole yalua yoku va ponda, wa enda kocitunda cinene, 2 oku u pinga oco a sonehele ovikanda kolosunangonga vio ko Damasko okuti eye o kuta vosi va endela Vonjila ya Ñala loku va nena ko Yerusalãi, ci kale alume, ci kale akãi.

3 Vonjila, eci a pitĩla ocipepi lo Damasko, ocinyi co kilu co tuila ocipikipiki, 4 kuenje wa kupukila posi, yu wa yeva ondaka yo sapuila hati: “A Saulu, a Saulu, nye o ndi lambalalela?” 5 Eye wa pula hati: “Ove elie, a Ñala?” Wo tambulula hati: “Ame Yesu, una o kasi oku lambalala. 6 Omo liaco, votoka iñila volupale kuenje va ka ku sapuila eci o sukila oku linga.” 7 Alume va kala oku linga laye ungende, va talama pole, ka va tẽlele oku vangula, yu va yeva ondaka, puãi ka va muile omunu laumue. 8 Saulu wa votoka, ndaño ovaso aye a yikuka pole, ka tẽlele oku mola cimue. Kuenje ovo vo kuata peka, yu vo tuala ko Damasko. 9 Vokuenda kuoloneke vitatu ka ponduile oku mola cimue kuenda ka lile ndaño oku nyua.

10 Ko Damasko kua kala ondonge yimue yi tukuiwa Ananiya kuenje Ñala wa vangula laye vonjoi hati: “A Ananiya!” Eye hati: “Ame ulo a Ñala.” 11 Ñala wo sapuila hati: “Votoka, kuende kokololo yi tukuiwa Luasuñama kuenje sandiliyako ulume umue o tukuiwa Saulu u Tarso, vonjo ya Yuda. Momo o kasi oku likutilila, 12 kuenda vonjoi wa mola ulume umue o tukuiwa Ananiya, yu wa iñila, wo kapa ovaka okuti o letuluka.” 13 Puãi Ananiya wa tambulula hati: “A Ñala, nda yeva omanu valua va popia ndomo eye a kangisa olosandu viove vo Yerusalãi. 14 Eye o kuete omoko a tambula kovitunda via velapo yoku kapa vokayike* wosi o tukula onduko yove.” 15 Pole, Ñala wo sapuila hati: “Kuende! momo ulume u ndo nõla oco a linge ocikuata coku ambatela onduko yange ku vakualofeka, kolosoma kuenda komãla va Isareli. 16 Kuenje ndu lekisa ohali yosi eye a laika oku talela onduko yange.”

17 Ananiya wa enda, yu wa iñila vonjo kuenje wo kapa ovaka loku popia hati: “A manjange a Saulu, Ñala Yesu una wa molehẽle kokuove vonjila eci weya, wa numa oco ovaso ove a letuluke kuenda o yukisua espiritu sandu.” 18 Vonjanja yaco vovaso aye mua tunda cimue ca soka ndakaka, yu wa letuluka. Kuenje eye wa votoka kuenda wa papatisiwa, 19 yu wa lia kuenje wa kuata vali ongusu.

Wa kala oloneke vimue lolondonge ko Damasko, 20 kuenda haico a fetika oku kunda volosunangonga catiamẽla ku Yesu okuti, eye Omõla a Suku. 21 Pole, vana vo yeva va fetika oku komõha loku popia vati: “U siti ulume una wa enda oku kangisa vana va tukula onduko eyi vo Yerusalãi? Hayeko hẽ weyaya locimãho coku va kuata* loku va tuala kovitunda via velapo?” 22 Saulu puãi wa amamako oku kuata ongusu kuenda wa komõhisa va Yudea va tungile vo Damasko loku lombolola lutate okuti Yesu eye Kristu.

23 Noke yoloneke vialua, va Yudea va tumbika ongombo yoku u ponda. 24 Puãi Saulu wa limbuka usuanji waco. Ovo va enda oku lavulula polombundi uteke lutanya oco vo ponde. 25 Kuenje olondonge viaye vio wambata luteke vo lowisa lekualu kocimbaka.

26 Eci a pitĩla ko Yerusalãi, wa likolisila oku likongela kolondonge, pole, vosi yavo vo kuatela usumba, momo ka va kolelele okuti wa linga ondonge. 27 Barnaba weya oku kuatisa Saulu, wo tuala kovapostolo kuenje wa va lomboluila ndomo Saulu a mola Ñala vonjila loku sapela laye kuenda ndomo Saulu a vangula lutõi vonduko ya Yesu ko Damasko. 28 Eye wa amamako oku kala lavo kuenda wa endaenda* lavo vo Yerusalãi oku vangula lutõi vonduko ya Ñala. 29 Kuenje wa vangola loku lipatãla la va Yudea va vangowaile o Helasi. Pole, ovo va sanda onjila yoku wipa. 30 Eci vamanji va ci limbuka, vo wambata ko Kaisarea kuenda vo tuma ko Tarso.

31 Ekongelo lioko Yudea yosi, lo ko Galilea, lo ko Samaria, lia kala lombembua kuenda lia kula; lia endela vonjila yoku sumbila Yehova, lia pamisiwa lespiritu sandu kuenje lia livokiya.

32 Eci Petulu a kala oku ñuala ñuala kovaimbo osi, weyavo kolosandu via tungile ko Luda. 33 Kuenje wa sangako ulume umue o tukuiwa Aineya, okuti wa kala oku vela anyamo ecelãla, momo wa fa ovolu. 34 Petulu wo sapuila hati: “A Aineya, Yesu Kristu wa ku kayisa. Votoka, yalula ula wove.” Kuenje wa votoka lonjanga. 35 Eci vosi va tungile vo Luda la vana va kala Vetapi lio Siarone vo mola, va tava ku Ñala.

36 Ko Yopa kua kala ondonge yimue ya tukuiwa Tavita, okuti ci lomboloka “Dorka.”* Eye wa kala ukuahenda kuenda wa enda oku linga oviali viwa. 37 Koloneke viaco, wa vela kuenje wa fa. Vo sukula loku u langeka vohondo yosapalalo. 38 Omo okuti olupale luo Luda lua lisunguile lo Yopa, eci olondonge via yeva okuti Petulu wa kala volupale luaco, va tuma kokuaye alume vavali oku u pañinya vati: “Yayulako oku iya kokuetu.” 39 Petulu wa votoka, wa enda lavo. Eci a pitĩla, va enda laye vohondo yosapalalo; ovimbumba viosi vio ñuala loku lila kuenje vio lekisa uwalo lovikutu viosi Dorka a enda oku tonga osimbu ka file. 40 Noke Petulu wa tundisa vosi posamua, wa kekama kolongolo, yu wa likutilila. Kuenje wa pongolokela kocivimbi loku popia hati: “A Tavita, pasuka!” Eye wa patuluka kuenje eci a mola Petulu, wa tumãla. 41 Petulu wo kuata peka kuenje wo votola kuenda wa vilikiya olosandu lovimbumba, wo weca kokuavo lomuenyo. 42 Ondaka yaco ya yevala kuosi ko Yopa kuenje valua va tava ku Ñala. 43 Petulu wa kala oloneke vimue ko Yopa lulume umue uyaveki wovipa o tukuiwa Simono.