1 Va Korindo
13 Nda ndi vangula alimi omanu la-a ovangelo pole, si kuete ocisola nda linga ndocivela ci ñoña ale ovivela vi li veta. 2 Nda ndi kuete ongavelo yoku imba owanji kuenda ndi kuete elomboloko lialumbu osi a kola, lukũlĩhĩso wosi, pamue ekolelo liosi, okuti ndi sondolola olomunda, pole, si kuete ocisola, si cimueko.* 3 Nda ndi landisa ovina viange viosi oco nekule olosuke kuenda nda ngeca etimba liange, okuti ndi lipanda, pole, si kuete ocisola, ka ci ñuatisa.
4 Ocisola ci pandikisa kuenda ci lingainga eci ciwa. Ocisola ka ci kuete onya. Ka ci lipandiya kuenda ka ci litunula, 5 ka ci lingi akutisasõi,* ka ci sandi ovina vialio muẽle, ka ci temisua. Ka ci patekela onyeño.* 6 Ka ci yolela evi ka via sungulukile, pole, ci yolaila evi viesunga. 7 Cecaila ovina viosi, ci kolela ovina viosi, ci lavoka ovina viosi, ci pandakaisa kovina viosi.
8 Ocisola lalimue eteke ci tokoka. Puãi nda kuli olongavelo vioku imba owanji, vi imuha; ndaño alimi* a liweka; ndaño ukũlĩhĩso wimuha. 9 Momo ukũlĩhĩso tu kuete ka wa suilepo kuenda tu imba owanji ka wa suilepo, 10 puãi, eci peya eci ca suapo, cina ka ca suilepo ci imuha. 11 Eci nda kala omõla, nda vangola ndomõla, nda sima sima ndomõla, nda enda oku sokolola ndomõla; eci nda linga ukulu, nda siapo ovina viumõla. 12 Momo cilo tu vanja vanja volumuĩlo lua vuvala,* puãi noke tu tẽla oku limola ocipala locipala. Cilo ukũlĩhĩso wange ka wa suilepo, puãi noke ñulĩha ciwa, ndeci nda kũlĩhĩwa ciwa. 13 Cilo pa siala vitatu: ekolelo, elavoko, ocisola; puãi pokati kavio ocisola oco ca velapo.