Ovilinga
21 Eci tua kisikiwa oku litepa lavo, tua enda lonaviyu toke ko Kose, keteke likuavo tua enda ko Roda kuenda oku tundako tua enda ko Patara. 2 Eci tua sanga onaviyu yenda ko Foinike, omo tua londa kuenje tua enda layo. 3 Eci tua mola ocifuka co Kupro kepĩli* okuti tua yi pitahãla, tua enda lonaviyu ko Suria, tua talama ko Turo, oko onaviyu ya soka oku longoluila ovikuata. 4 Tua sandiliya olondonge kuenje eci tua vi sanga oko tua kala oloneke epanduvali. Pole, noke yoku lunguiwa lespiritu sandu olonjanja vialua, olondonge via sapuila Paulu oco ka ka ende ko Yerusalãi. 5 Eci oloneke vietu vioku kalako via pita, tua tundako kuenje tua enda lonjila yetu; pole, vosi yavo kumue lakãi kuenda omãla, va tu sindikila toke eci tua tunda volupale. Kuenje noke yoku kekama kolongolo kohulo yokalunga, tua likutilila, 6 yu tua liusika pokati. Tua londa vonaviyu pole, ovo va tiukila kolonjo viavo.
7 Eci tua malusula ungende wetu woku tunda ko Turo, tua pitĩla ko Tolemaya kuenje tua pasuisa vamanji, yu tua kala lavo eteke limosi. 8 Keteke lia kuamamo tua tundako, tua enda ko Kaisarea kuenda tua iñila konjo yukundi Filipu, una wa kala umue pokati kalume epanduvali kuenje oko tua sikĩla. 9 Ulume waco wa kuata omãla vakuãla vakãi okuti ka va kuelele,* haivo vakuakuimba owanji. 10 Noke yoku kalako oloneke vialua, uprofeto umue o tukuiwa Agabo wa tundilila ko Yudea. 11 Eye weya kokuetu wa tambula uvia ku Paulu, wa kuta olomãhi lovaka aye muẽle loku popia hati: “Ca popia espiritu sandu ceci hati, ‘Va Yudea vo ko Yerusalãi haico va ka kuta ukuovia ulo loku u weca peka lia vakualofeka.’” 12 Eci tua ci yeva, etu kumue la vana va kala pocitumãlo caco, tua fetika oku u peya oco ka ka ende ko Yerusalãi. 13 Paulu wa tambulula hati: “Nye vu kasi oku linga poku lila loku honguisa onjila nda nola?* Koleli okuti si kasilili lika oku kutiwa, pole, ñasililivo oku fila onduko ya Ñala Yesu vo Yerusalãi.” 14 Omo okuti ka tavele oku u tiula, tua liwekapo* loku popia tuti: “Ocipango ca Yehova ci lingiwe.”
15 Noke yoloneke viaco, tua lipongiyila ungende, yu tua enda ko Yerusalãi. 16 Olondonge vimue vio ko Kaisarea via endavo letu, va tu tuala konjo ya Manasone, u Kupro, haeye wa linga ondonge osimbu kuenje wa tu yekisa. 17 Eci tua pitĩla ko Yerusalãi, vamanji va tu tambula lesanju. 18 Keteke lia kuamamo, Paulu kumue letu tua enda konjo ya Tiago kuenje akulu vosi omo va kala. 19 Eye wa va lama kuenda wa fetika oku va lomboluila ulandu wovina Suku a linga pokati ka vakualofeka omo liupange waye.
20 Noke yoku yeva ovina evi, ovo va fetika oku sivaya Suku kuenda vo sapuila hati: “A manji, tala ndomo pokati ka va Yudea valua va linga olondonge via Yesu kuenda vosi yavo vakuambili Yocihandeleko. 21 Ovo va yeva okuti o kasi oku longisa va Yudea vosi pokati ka vakualofeka oco va tinduke ku Mose poku va sapuila okuti ka va ka sevise omãla vavo evamba, ndaño oku kuama oviholo. 22 Nye tu linga? Ovo va ka yeva okuti ove weya. 23 Omo liaco, linga eci tu ku sapuila: Tu kuete alume vakuãla va linga ohuminyo. 24 Kuende lavo, liyelisa kumue lavo, feta epese liavo okuti va lipemuila asenya. Kuenje omanu vosi va ka limbuka okuti ovina va yeva viatiamẽla kokuove viuhembi, momo ove o kuete ovituwa viwa, haive ukuakupokola Kocihandeleko. 25 Pole, ku vakualofeka vana va tava, tua va tumisa ale ondaka yokuti va sukila oku lilava kovina via lumbiwa koviteka, kosonde, lovina via lekiwa ekõle* kuenda kevĩho liukahonga.”*
26 Keteke lia kuamamo, Paulu wa enda lalume vaco, wa liyelisa eye muẽle kumue lalume vaco, yu va iñila vonembele, wa tukula eteke va laika oku mãla oku liyelisa, okuti noke citava oku eca ocilumba ci lumbiwila omunu lomunu.
27 Eci pa kambele naito oku malusula oloneke viaco epanduvali, va Yudea vo ko Asia vana vo muile ale vonembele, va tutuminya owiñi wosi kuenje vo kuata, 28 loku kaluka vati: “Ene alume va Isareli, tu kuatisiko! U eye ulume una o kasi oku longisa omanu vosi vo kolonepa viosi oku sepula omanu vetu, Ocihandeleko cetu kuenda ocitumãlo eci. Handi vali wa nena va Helasi vonembele kuenda va vĩhisa ocitumãlo eci ci kola.” 29 Momo va muile Trofimo, u Efeso volupale kumue laye kuenda va limbuka okuti Paulu wo nena vonembele. 30 Kuenje volupale luosi mue yukile onjuela, omanu va tilila pamosi kuenda va kuata Paulu vo nanañanyala kosamua yonembele, vonjanja yaco haico apito a yikiwa. 31 Osimbu va yonguile oku u ponda, kesongo kocivili colohoka wa yeva okuti o Yerusalãi yosi yi kasi lonjuela; 32 eye haico a kuata asualali lusongui wavo kuenje wa lokila kokuavo lolupesi. Eci ovo va mola usongui wasualali lasualali vaco, va liwekapo oku tipula Paulu.
33 Noke usongui wasualali wa amelako, yu wo kuata kuenje wa handeleka okuti o kutiwa lalienge avali; wa pula onduko yaye leci a linga. 34 Pole, vamue pokati kowiñi va vilikiya ocina cimue, vakuavo va vilikiya ciñi. Usongui wasualali omo ka tẽlele oku limbuka cimue mekonda lionjuela, wa handeleka oco a tualiwe kocivili casualali. 35 Oco, eci a pitĩla kosikata, asualali vo wambata, omo lionjuela yowiñi, 36 omanu valua vo kuama loku kaluka vati: “A pondiwe!”
37 Eci va laikele oku iñila vocivili casualali, Paulu wa pula usongui wasualali hati: “Citava okuti hu sapuila cimue?” Eye hati: “Puãi ove o vangulavo o Helasi? 38 Haveko hẽ u Egito una wa wenguile usuanji koloneke via pita kuenda wa songuila 4.000 kovingumba vekalasoko?” 39 Paulu hati: “Ame ndu Yudea wo ko Tarso, ko Kilikiya, ndi nungi yolupale lumue lua kemãla. Ndi pinga kokuove okuti, o ngecelela oku vangula lomanu.” 40 Eci usongui a tava, Paulu wa talama kosikata, wa linga ondimbukiso komanu leka liaye. Pana okuti omanu vosi võha, wa vangula lavo kelimi lio Heveru hati: