Sofoniya
2 Osimbu ocihandeleko ka ca tẽlisiwile,
Osimbu eteke ka lia pitile ndovinene vi enda lofela,
Osimbu onyeño yalua ya Yehova ka yeyile kokuene,+
Osimbu eteke lionyeño ya Yehova ka lieyile kokuene,
3 Sandi Yehova,+ vosi yene wambombe vofeka,
Haene vu pokola kovihandeleko* viaye viesunga.
Sandi esunga, sandi umbombe.
Pamue* vu ka vundisiwa keteke lionyeño ya Yehova.+
4 Momo o Gasa yi ka kala olupale lumue lu ka sala upolokoso;+
Kuenda o Asikelone yi ka kala alunda.
Olonungi vio Asidode vi ka tundisiwa lovanyãli vavo vokuenda kuekumbi pongunji,
Kuenda o Ekirone yi ka tukuĩwa.+
5 “Ngongo ya vana va kasi ocipepi lokalunga okuti, ofeka ya va Kereti!+
Yehova wa ku pisi amanu.
A Kanana, afeka ya va Filisiti, ndi ka ku nyõla,
Oco okuti ka pa ka supa onungi layimue.
6 Onepa yi sungue kokalunga yi ka kala ocililo covinyama,
Lovisimo viangombo kuenda oviunda viovawe violomeme.
7 Oyo yi ka linga ofeka yovisupe vionjo ya Yuda;+
Oko ovo va ka litekuila.
Kolonjo via Asikelone oko va ka pekela luteke.
Momo Yehova Suku yavo, ka ka va yanduluka,*
Kuenda eye o ka nena vali olomandekua viaye.”+
8 “Nda yeva esepu lia Moavi+ kuenda efuanguilo lia va Amoni,+
Vana va sanumũla omanu vange loku li tunuila ocikanjo cavo.+
9 Omo liaco, ndomo ndi kasi lomuenyo,” oco Yehova ukualohoka, Suku ya Isareli a popia,
“O Moavi yi ka kala ndo Sodoma,+
Kuenda va Amoni va ka kala ndo Gomora,+
Ocitumãlo covisapa, ocisimo comongua kuenda yi ka siala ofeka yimue yupolokoso otembo ka yi pui.+
Vana va supa pomanu vange, va ka va punda,
Kuenda vana va supapo pokati kofeka yange va ka yi tambula.
10 Eci oco ovo va ka tambula omo liocipululu cavo,+
Momo, ovo va sepula kuenda va litunuĩla ovo muẽle kovaso yomanu va Yehova ukualohoka.
11 Yehova o ka kala umue o komõhisa kokuavo;
Momo eye o ka kundula* olosuku viosi vio kilu lieve,
Kuenda ovifuka viosi violofeka vi ko kekamẽla,*+
Ocifuka locifuka pocitumãlo calio.
12 Ene a va Etiopia vu ka pondiwavo losipata yange.+
13 Eye o ka nyanyumũila eka liaye konẽle yonano kuenda o ka kundula o Asuria,
Kuenje o ka lingisa okuti, o Ninivei yi kala upolokoso,+ yi kukuta ndekalasoko.
14 Oviunda vi ka pekela pokati kayo, ovinyama viosi viovusenge.
Ci kaile ohombe yo venyãla kuenda ocisaka, vi ka lala pamosi pokati kolongunji viaye.
Ondaka yimue yi ka imbila ponjanela.
Ku ka kaila enyõleho puvelo;
Momo eye o ka lekisa alukuki osedru.
15 Olu olupale lumue lueyuka ocipululu okuti, lua tumãlele apa pa koka,
Lua enda oku popia vutima hati, ‘Ame tete, ka kuli ukuavo o pondola oku lisoka lame.’
Eye wa linga ocikuata celaviso,
Ocitumãlo cimue coku pekela covinyama viovusenge!
Vosi va pitapo va ka sika ovilua kuenda oku tutumũla ovaka avo.”+