Esekiele

30 Ondaka ya Yehova yeya vali kokuange yiti: 2 “A mõlomunu, imba owanji kuenda popia hati: ‘Ca popia Ñala Tõlo Yehova ceci hati:

“Avoyo we, ‘eteke li kasi oku iya!’

 3 Momo eteke li kasi ocipepi, ocili, eteke lia Yehova li kasi ocipepi.+

Alende a tekãva a ka molẽha+ keteke liaco, otembo yoku sombisa ya pitĩla kolofeka.+

 4 Osipata yimue yi ka katukila o Egito kuenda o Etiopia yi ka kuata esakalalo eci omanu va ka pondiwa Kegito;

Ovokuasi alio a ka tambuiwa kuenda oviseveto vialio vi ka kunduiwa.+

 5 O Etiopia,+ o Puti+ o Ludu kuenda omanu vosi vo kolofeka vikuavo,

Kuenda o Kuvi kumue lomãla vofeka yocisila,*

Vosi yavo va ka pondiwa losipata.”’

 6 Ca popia Yehova ceci hati:

“‘Oku upisa ko Migidolo+ toke ko Suwene,+ ovo va ka pondiwa losipata vofeka yaco,’ oco Ñala Tõlo Yehova a popia. 7 ‘Ovo va ka velapo koku siala upolokoso okuti olofeka vikuavo vi sule kuenda alupale alio a ka velapo alupale akuavo koku siala alunda.+ 8 Kuenje ovo va ka kũlĩha okuti, ame ndi Yehova eci ndi ka tuma ondalu Kegito kuenda eci vosi vana va va kuatisa va ka kunduiwa. 9 Keteke liaco, ndi ka tuma olomunga volonaviyu oco vi lulumise o Etiopia yina ya likolela oyo muẽle; ovo va ka kuatiwa lesakalalo keteke li kasi oku iya Kegito, momo olio liya muẽle.’

10 “Ca popia Ñala Tõlo Yehova ceci hati: ‘Ndi ka malako owiñi wo Kegito peka lia Nevukandesa* Soma yo Bavulono.+ 11 Eye kumue lasualali vaye okuti ovo va velapo kungangala okuti, olofeka vikuavo vi sule,+ va ka neniwa oco va kundule ofeka. Ovo va ka pola olosipata viavo poku katukila o Egito kuenda va ka yukisa ofeka lovivimbi.+ 12 Ndi ka pongolola olono vio Nilu+ oco vi linge osi ya kukuta kuenda ndi ka eca* ofeka peka liomanu olondingaĩvi. Ndi ka lingisa okuti ofeka lovina viosi vi kasimo, vi nyõliwa leka liovingendeleyi.+ Ame muẽle ndi Yehova nda ci popia.’

13 “Ca popia Ñala Tõlo Yehova ceci hati: ‘Ndi ka kundulavo oviteka viene via vĩha* loku malako olosuku ka vi kuete esilivilo vio Nofe.*+ Ka ku ka kala vali olombuale* kofeka Yegito kuenda ndi ka kapa usumba vofeka Yegito.+ 14 Ndi ka sia upolokoso o Patirosi,+ ndi ka kapa ondalu ko Coana kuenda ndi ka nena esombiso ko No.*+ 15 Ndi ka wenguila onyeño yange ko Sine, ocitumãlo cimue ci kuete oviteyuilo vio Egito kuenda ndi ka kundula olonungi vio ko No.* 16 Ndi ka kapa ondalu Kegito; kuenda o Sine yi ka kuatiwa lusumba walua kuenje vocimbaka co No* mu ka kapiwa epangu kuenda o Nofe* va ka yi katukila vokuenda kutanya! 17 Alume amalẽhe vo ko Oni* kuenda vo ko Pivesete va ka pondiwa losipata kuenda omanu va kasi valupale va kambatiwa kumandekua. 18 Ko Tafanese utanya u ka pongoloka owelema eci ndi ka teyelako okanga Yegito.+ Unene walio wepela u ka sulila,+ oyo yi ka sitikiwa lalende kuenda omanu va kasi valupale alio va kambatiwa kumandekua.+ 19 Ame ndi ka sombisa o Egito kuenda ovo va ka kũlĩha okuti, ame ndi Yehova.’”

20 Kunyamo wekũi lamosi kosãi yatete, keteke liepanduvali liosãi yaco, ondaka ya Yehova yeya kokuange yiti: 21 “A mõlomunu, nda teya okuokuo kua Fareo soma Yegito; okuokuo kuaco ka ku ka tatiwa oco ku kaye ale oku muñiwa onjambo oco ku kuate ongusu yoku kuata osipata.”

22 “Ca popia Ñala Tõlo Yehova ceci hati: ‘Ñasi oku katukila Fareo soma Yegito+ kuenda ndi ka teya ovoko aye, ci kaile okuokuo kua pama loku kua teka+ kuenda ndi ka lingisa okuti, osipata yi kasi peka liaye yi kupuka.+ 23 Kuenje ndi ka sanduila va Egito pokati kolofeka loku va sanduila pokati kovaimbo.+ 24 Ndi ka pamisa ovoko* a soma yo Bavulono+ loku kapa osipata yange peka liaye+ kuenda ndi ka teya ovoko a Fareo kuenje eye o ka luluma ndulume umue o kasi oku fila kovaso aye.* 25 Ndi ka pamisa ovoko a soma yo Bavulono, pole, ovoko a Fareo a ka kupuka; kuenje va Egito va ka kũlĩha okuti, ame ndi Yehova eci ndi ka kapa osipata yange peka lia soma yo Bavulono kuenje eye o ka talavaya layo oco a katukile ofeka Yegito.+ 26 Kuenje ndi ka sanduila va Egito pokati kolofeka loku va sanduila pokati kovaimbo+ kuenda ovo va ka kũlĩha okuti ame ndi Yehova.’”