Olonganji

6 Pole, va Isareli va linga vali eci cĩvi kovaso a Yehova kuenje Yehova+ wa va eca peka lia Midiane vokuenda kueci ci soka anyamo epanduvali.+ 2 Eka lia Midiane lia fetika oku talisa ohali o Isareli.+ Omo lia Midiane, va Isareli va litungila ovitumãlo vioku salama* kolomunda, valeva kuenda kovitumãlo vina okuti ca tĩla calua oku pitĩlako.+ 3 Eci o Isareli ya enda oku kũla ombuto, Midiane la Amaleke+ kuenda omanu vo Kutundilo+ va enda oku va katukila. 4 Ovo va enda oku tunga ocilombo oco va katukile o Isareli loku nyõla ovaima o vofeka vonjila yosi yo ko Gasa kuenda ka va sile lacimue coku lia ko Isareli ndaño omeme, ongombe ale ocimbulu.+ 5 Momo ovo veyaya loviunda viavo lolombalaka okuti, va luile calua ndolohuma+ kuenje ovo kumue lolongamelo viavo, ka va tẽliwile oku va tenda+ kuenda va enda oku iñila vofeka oco va yi kundule. 6 Omo liaco, o Isareli ya linga ohũkui calua omo lia Midiane kuenje va Isareli va pinga ekuatiso ku Yehova.+

7 Eci va Isareli va pinga ekuatiso ku Yehova mekonda lia Midiane,+ 8 Yehova wa tuma uprofeto umue ku va Isareli, una wa popia lavo hati: “Ca popia Yehova Suku ya Isareli ceci hati: ‘Ame ndo vupi Kegito kuenda ndo vupi vofeka yupika.+ 9 Omo liaco, nda ku popeli peka lio Egito kuenda lia vosi vana va ku talisi ohali kuenje nda va tundisa kovaso ene kuenda nda eca kokuene ofeka yavo.+ 10 Noke nda popia lene siti: “Ame ndi Yehova Suku yene.+ Ka citava oku fendela* olosuku via va Amori vina vi kasi vofeka wa tungi.”+ Pole, ka wa pokuili kokuange.’”*+

11 Noke ungelo wa Yehova weya+ kuenje wa tumãla vemẽhi liuti unene una wa kala ko Ofira okuti, wa tiamẽlele ku Yoasi u Aviyesere.+ Omõlaye Gideone+ wa kala oku sasa otiliku vocikoselo cayuva oco va Midiane ka va ka ci mole. 12 Ungelo wa Yehova wa molẽha kokuaye kuenje wa popia hati: “Yehova o kasi love,+ ove asualali lia pama.” 13 Gideone wo tambulula hati: “Ngecele a ñala yange, pole, nda Yehova o kasi letu momo lie ovina evi viosi vieyilila kokuetu?+ Ovilinga viaye viosi vi komõhisa vi kasi pi, vina va isietu va tu lomboluila+ vati: ‘Yehova haeyeko hẽ wa tu upa Kegito?’+ Kaliye, Yehova wa tu yanduluka+ kuenda wa tu eca peka lio Midiane.” 14 Yehova wa vanja kokuaye kuenda wa popia hati: “Kuende longusu o kuete kuenda o ka popela o Isareli peka lio Midiane.+ Hameko hẽ ñasi oku ku tuma?” 15 Gideone wa tambulula hati: “Ngecele a Yehova. Ndi popela ndati o Isareli? Tala! Ocikoti* cange oco ci sulepovali ku Manase kuenda ame ndi sule vonjo ya isiange.” 16 Pole, Yehova wa popia laye hati: “Momo ame ndi ka kala kumue love,+ ove o ka kundula o Midiane ndulume umosi.”

17 Kuenje eye wa popia laye hati: “Nda cilo nda sanga ohenda kovaso ove ndekise ondimbukiso yimue yokuti, ove o kasi oku vangula lame. 18 Ndinge ohenda, ku ka tunde palo toke eci ndi tiuka lombanjaile yange loku yi kapa kovaso yove.”+ Omo liaco, eye wa tambulula hati: “Ndi kala palo toke eci o tiuka.” 19 Noke Gideone wa iñila vonjo kuenje wa pongiya okahombo kuenda wa linga ombolo ka yi kuete etumbisa lo efa* yimosi yosema.+ Eye wa kapa ositu vekualu kuenda usole wa u kapa vombia; noke wa vi nena kokuaye kuenda wa vi avela vemẽhi liuti unene.

20 Ungelo wa Suku yocili wo sapuila hati: “Tikula ositu kuenda ombolo ka yi kuete etumbisa kuenje vi kapa kilu liewe linene li kasi opo kuenda kapako usole.” Kuenje eye wa ci linga. 21 Noke ungelo wa Yehova wolõla ombueti ya kala peka liaye kuenje losungu yombueti yaco wa lamba kositu kuenda kombolo ka yi kuete etumbisa kuenje kewe kua tunda ondalu noke yalia ositu kuenda ombolo ka yi kuete etumbisa.+ Noke ungelo wa Yehova wa senguluka kovaso aye. 22 Kuenje Gideone wa limbuka okuti, ca kala ungelo wa Yehova.+

Vepuluvi liaco, Gideone wa popia hati: “Avoyo we, a Ñala Tõlo Yehova! Ame nda mola ungelo wa Yehova polo la polo!”+ 23 Pole, Yehova wo sapuila hati: “Ombembua yi kale love. Ko ka kuate usumba;+ ku fi.” 24 Omo liaco, Gideone wa tungila Yehova utala umue pocitumãlo caco kuenje owo u tukuiwa hati: Yehova-shalom*+ toke etaili. Owo handi u kasi ko Ofira ya va Aviyesere.

25 Kuteke waco, Yehova wo sapuila hati: “Ambata okangombe ka tiamẽla ku isiove okuti, okangombe kavali ka kuete epanduvali kanyamo kuenda nyõla utala wa Baale una wa tiamẽla ku isiove kuenda teta ombueti* yi kola yina yi kasi ocipepi lawo.+ 26 Noke yoku tungila Yehova Suku yove utala umue, kilu liocitumãlo eci ca koka kumue lulala wovawe, tikula okangombe kavali kuenda ka eca ndocilumba cimue coku pia elisi kovimalañanya viavaya via tunda kombueti* yi kola yina ove wa teta.” 27 Omo liaco, Gideone wambata alume ekũi pokati kakuenje vaye kuenje wa linga ndeci Yehova o sapuila. Pole, omo okuti eye wa kala lusumba la vakuanjo ya isiaye kumue lalume vo volupale, eye ka ci lingile lutanya, pole, wa ci linga luteke.

28 Eci alume vo volupale va katuka selo komẽle ya kuamamo, ovo va mola okuti, utala wa Baale wa nyõliwa kuenda ombueti* yi kola yina ya kala ponẽle yaco, ya tetiwa kuenda okangombe kavali ka lumbiwa kilu liutala una wa tungiwa. 29 Va lipula omunu lukuavo vati: “Helie wa ci linga?” Noke lioku ci konomuisa va popia vati: “Gideone omõla a Yoasi, eye wa ci linga.” 30 Omo liaco, alume vo volupale va sapuila Yoasi vati: “Nena omõlove posamua oco a pondiwe, momo eye wa nyõla utala wa Baale kuenda wa teta ombueti* yi kola yina ya kala ocipepi lawo.” 31 Noke Yoasi+ wa sapuila ku vosi vana va kala oku u sakalaisa hati: “Ene vu yongola oku teyuila Baale? Ene vu sukila hẽ oku u popela? Wosi u teyuila o sesamẽla oku pondiwa omẽle yilo.+ Nda eye osuku a liteyuile eye muẽle,+ momo omunu umue wa nyõla utala waye.” 32 Kuenje keteke liaco, eye wa tukula Gideone hati, Yerubaale* poku popia hati: “Baale a liteyuile eye muẽle momo, omunu umue wa nyõla utala waye.”

33 Va Midiane+ vosi la va Amaleke+ kuenda omanu vo Kutundilo, va likongela oco va linge uyaki;+ kuenda ovo va yoka* Ocimbota* co Yesirele kuenda oko va tunga ocilombo. 34 Noke espiritu lia Yehova lia wila* Gideone+ kuenje eye wa sika ombinga+ noke va Aviyesere+ veya oco vo kuatise. 35 Kuenje wa tuma olomunga ko Manase yosi kuenda ovo veyavo oco vo kuatise. Eye wa tumavo olomunga ku Asiyere, ku Sevulono kuenda ku Nafitali kuenje ovo veya oco va lisange laye.

36 Noke Gideone wa popia la Suku yocili hati: “Nda ove o kasi oku popela Isareli pocakati cange, ndeci ove wa likuminya,+ 37 ndi kapa ocikutu cimue covonya pocimbandi. Nda owume u kala lika kocikutu, pole, osi yosi yi kukuta, ndi kũlĩha okuti o ka popela o Isareli pocakati cange, ndeci ove wa likuminya.” 38 Eci oco ca pita. Eci eye a katuka selo keteke lia kuamamo kuenda wa kama ocikutu, vocikutu mua tunda owume walua okuti, wa yukisa lovava etiyela limue linene. 39 Pole, Gideone wa popia la Suku yocili hati: “Ku ka ecelele okuti onyeño yove yi ndi wengukila, pole, ngecelele oku pinga yimue vali onjanja. Ndinge ohenda, ngecelele oku linga vali oseteko yimue locikutu. Ecelela okuti ocikutu ci kukuta osimbu osi yosi yi kala lowume.” 40 Omo liaco, Suku wa ci linga kuteke waco; ocikutu lika ca kukuta, pole, osi yosi ya kala lowume.