Mika
Omunda yonjo ya Yehova+
Yi ka velapo koku lepa okuti, olomunda viosi vi sule,
Kuenda oyo yi ka pitahãla oviwulu koku lepa;
Kuenje omanu va ka lamanelako.+
2 Kuenje olofeka vialua vi keya loku popia viti:
“Enjui, tu lamaneli komunda ya Yehova
Kuenda konjo ya Suku ya Yakoba.+
Eye o ka tu longisa eci catiamẽla kolonjila viaye,
Kuenje etu tu ka endela volonjila viaye.”
Momo ocihandeleko* ci ka tunda ko Siono,
Kuenda ondaka ya Yehova yi ka tunda ko Yerusalãi.
3 Suku o ka kala ndonganji pokati komanu valua+
Kuenda eye o ka tetulula ovitangi pokati kolofeka via pama vi kasi ocipãla.
Ovo va ka pongolola olosipata viavo oco vi linge atemo
Kuenda ovonga avo a ka linga olomĩla.+
Ofeka ka yi ka katukila ofeka yikuavo losipata,
Ka va ka lilongisa vali uyaki.+
4 Ovo va ka tumãla,* omunu lomunu vemẽhi liuti waye wuyuva kuenda vuti waye wukuyu,+
Kuenje lomue o ka va lingisa usumba,+
Momo omẽla wa Yehova ukualohoka wa popia.
5 Momo omanu vosi va ka endela, omunu lomunu vonduko ya suku yaye,
Pole, etu tu ka endela vonduko ya Yehova Suku yetu,+ otembo ka yi pui.
6 “Keteke liaco,” oco Yehova a popia,
“Ndi ka kongela vana va enda oku teñela,
Kuenda ndi kongoluila pamosi vana va lisandula,+
Kumue la vana nda talisa ohali.
7 Ndi ka lingisa okuti vana va enda oku teñela va linga ocisupe,+
Kuenda vana va tumiwa kupãla va linga ofeka ya pama;+
Kuenje Yehova o ka viala pokati kavo ndosoma Komunda Siono,
Oku upisa cilo kuenda otembo ka yi pui.
8 Catiamẽla kokuove, Asapalalo yocunda,
Omunda yomanu va Siono,+
Uviali watete u ka tiukila muẽle kokuove,+
Uviali wa tiamẽla kolupale luo Yerusalãi.+
9 Momo lie o kasilili oku kaluka lolukandi?
Anga hẽ ku kuete osoma,
Ale ondunguli yove ya kunduiwa,
Anga hẽ eli olio esunga lieci o kuetele olongembia ndukãi o kasi oku cita?+
10 Kuati olongembia kuenda lili amanu vo Siono,
Ndukãi o kasi oku cita,
Momo cilo o ka enda oku upisa volupale kuenda o ka kala vusenge.
Yehova oko a ka ku yovuila peka liovanyãli vove.+
11 Cilo olofeka vialua vi ka liongoluila vali kokuove;
Ovio vi ka popia viti: ‘Eye a nyõliwe elisi,
Kuenda ovaso etu a mole eci ci pita ko Siono.’
12 Pole, ovo ka va kũlĩhĩle ovisimĩlo via Yehova,
Ka va kuete elomboloko liocipango* caye;
Momo eye o ka vongolola ndovitungu viokaliye violomema via tetiwila pocimbandi.
13 Votoki kuenda sasi olomema amanu va Siono;+
Momo ndi ka pongolola olombinga viene utale,
Kuenda ndi ka pongolola akonjo ene oco a linge osipi,
Kuenje ene vu ka nyanyõla omanu valua.+
Ene vu ka eca onganyu yesanda ku Yehova,
Kuenda ovokuasi avo ku Ñala yocili yokilu lieve liosi.”+