Isaya
2 Eci oco Isaya omõla a Amose a mola catiamẽla ko Yuda kuenda ko Yerusalãi:+
Omunda yonjo ya Yehova
Yi ka velapo koku lepa okuti, olomunda viosi vi sule,
Kuenda oyo yi ka pitahãla oviwulu koku lepa,+
Kuenje olofeka viosi vi ka lamanelako.+
3 Kuenje omanu valua va keya loku popia vati:
“Enjui, tu lamaneli komunda ya Yehova,
Konjo ya Suku ya Yakoba.+
Eye o ka tu longisa eci catiamẽla kolonjila viaye,
Kuenje etu tu ka endela volonjila viaye.”+
4 Suku o ka kala ndonganji pokati kolofeka
Kuenda eye o ka tetulula ovitangi pokati komanu valua.
Ovo va ka pongolola olosipata viavo oco vi linge atemo
Kuenda ovonga avo a ka linga olomĩla.+
Ofeka ka yi ka katukila ofeka yikuavo losipata,
Ka va ka lilongisa vali uyaki.+
5 Anjo ya Yakoba enjui,
Tu endeli vocinyi ca Yehova.+
6 Momo ove wa yanduluka omanu vove okuti, onjo ya Yakoba,+
Momo ovo veyukisiwa lovina vio Kutundilo;
Ovo va siata oku tãha+ nda va Filisiti,
Kuenda pokati kavo pali ovingendeleyi vialua.
7 Ofeka yavo yeyuka opalata lulu,
Kuenda ovokuasi avo ka a tendiwa.
Ofeka yavo yeyukisiwa lolokavalu,
Kuenda akãlu avo uyaki ka a tendiwa.+
8 Ofeka yavo yeyukisiwa lolosuku ka vi kuete esilivilo.+
Ovo va kekamẽla kovopange ovaka avo muẽle,
Kovaso yeci ovimuine viavo muẽle via panga.
9 Omo liaco, omanu va livondela kuenda va kutisiwa osõi,
Kuenje ka citava okuti ove o va ecela.
10 Iñila vesenje kuenda li solama voneketela
Omo liemolẽho li komõhisa lia Yehova
Kuenda ulamba wunene waye.+
11 Ovaso a vakuakulipanda a ka kutisiwa osõi,
Kuenda omanu vakuepela, va ka kutisiwa osõi.
Yehova eye lika o ka kemãlisiwa keteke liaco.
12 Momo eli olio eteke limue lia tiamẽla ku Yehova ukualohoka.+
Olio li kasi oku iya ku vosi vakuakulipanda haivo va livelisapo,
Li kasi oku iya ku vosi, ci kaile ku vana va kemãla ale kolosuke,+
13 Li kasi oku iya koviti viosi viosedru vio ko Levanone via velapo havio via kemãla
Kuenda li kasi oku iya kovilemba viosi vio ko Basiane,
14 Olio li kasi oku iya kolomunda viosi via velapo
Kuenda koviwulu viosi via lepa,
15 Olio li kasi oku iya kilu liosapalalo yosi ya lepa kuenda kocimbaka cosi ci kuete oviteyuilo,
16 Olio li kasi oku iya kolonaviyu viosi vio ko Tarsisi+
Kuenda kawato osi a soliwa.
17 Omanu vakuakulipanda va ka kutisiwa osõi,
Kuenda omanu vakuepela va ka kutisiwa osõi.
Yehova eye lika o ka kemãlisiwa keteke liaco.
18 Olosuku ka vi kuete esilivilo, vi ka imũha muẽle elisi.+
19 Kuenje omanu va ka iñila valeva asenje
Kuenda vovitunu vioposi,+
Omo liemolẽho li komõhisa lia Yehova
Kuenda liulamba wunene waye,+
Eci eye a ka katuka oco a lulumise ongongo lusumba walua.
20 Keteke liaco, omanu va ka tikula olosuku viavo ka vi kuete esilivilo viopalata kuenda viulu
Vina ovo muẽle va li pangela oco va vi kekamẽle
Kuenje va ka vimba kolonete kuenda kolondilili,+
21 Oco va iñile valeva asenje
Kuenda vovitelele viovawe a toka,
Omo liemolẽho li komõhisa lia Yehova
Kuenda liulamba wunene waye,
Eci eye a ka katuka oco a lulumise ongongo lusumba walua.
22 Oco vu kuatisiwi, liwekipo oku kolela komunu,
Una okuti, efuimo li kasi vanyulu aye.
Momo lie eye a sesamẽlela oku kapiwako?