Yeremiya

33 Ondaka ya Yehova yeya ku Yeremiya onjanja yavali osimbu eye a yikiwile Vocitali Colondavululi yiti:+ 2 “Ca popia Yehova Una wa panga ilu lieve, Yehova una wa li sovola kuenje wa li tumbika ciwa; Yehova oyo onduko yaye, ceci hati: 3 ‘Ndi vilikiye kuenje ndi ka ku tambulula kuenda ndi ka ku sapuila ovina vinene haivio ka via lelukile oku kuata elomboloko okuti, kua la vi kũlĩha.’”+

4 “Momo ca popia Yehova Suku ya Isareli catiamẽla kolonjo violupale lulo kuenda kolonjo violosoma vio Yuda, vina vi kasi oku nyõliwa omo liovimbaka vioku katukila kuenda osipata,+ 5 leci catiamẽla ku vana va kasi oku iya oku linga uyaki la va Kaldea, poku yukisa ovitumãlo vilo lovivimbi viomanu vana nda ponda omo lionyeño yange kuenda oku tema kuange kualua vana okuti, evĩho liavo lia ndi kokela oku vundisa ocipala cange kolupale olu ceci hati: 6 ‘Ñasi oku nena etumbululo kuenda uhayele kokualio+ kuenje ndi ka va kayisa loku eca kokuavo ombembua yalua kuenda ocili.+ 7 Ndi ka nena vali olomandekua vio Yuda kuenda olomandekua vio Isareli+ kuenje ndi ka vi sumũlũisa ndeci nda linga kefetikilo.+ 8 Kuenje ndi ka vi yelisa keko liosi liakandu avio via ndi lingila+ kuenda ndi ka ecela eko liosi liakandu avio lakulueya avio via ndi lingila.+ 9 Olupale luaco kokuange, lu ka kala onduko yimue yesanju, esivayo kuenda eposo kovaso yolofeka viosi vio kilu lieve vina vi ka yeva uwa wosi ndi lekisa kokuavo.+ Kuenje ovio vi ka kuata usumba kuenda vi ka luluma+ omo liuwa wosi lombembua ndi ka lekisa kolupale luaco.’”+

10 “Ca popia Yehova ceci hati: ‘Vocitumãlo cilo muna ene vu ka popia hati, ekalasoko okuti ka muli omunu ale ocinyama, valupale o Yuda kuenda volokololo vio Yerusalãi okuti, mua siala upolokoso haimo ka muli omunu, ale onungi, pamue ocinyama, mu ka yeviwa vali 11 ocileñi conjolela kuenda ocileñi cesanju,+ ondaka ya sandombua londaka ya ndombua, ondaka ya vana va kasi oku popia vati: “Eci olopandu ku Yehova ukualohoka, momo Yehova uwa;+ ocisola caye ka ci pongoloka ci kala otembo ka yi pui!”’+

“‘Omanu va ka nena ovilumba violopandu vonjo ya Yehova,+ momo ndi ka nena vali olomandekua viofeka ndeci kefetikilo,’ oco Yehova a popia.”

12 “Ca popia Yehova ukualohoka ceci hati: ‘Vekalasoko eli ka muli omunu, ale ocinyama kuenda valupale alio osi, mu ka kala vali ovisenge vioku lisila oviunda oco angombo va puyukisemo oviunda viavo.’+

13 “‘Valupale o kovaimbo a kasi kolomunda, valupale a kasi vemẽhi, valupale o kombuelo, vofeka ya Benjamini, vovaimbo a lisungue lo Yerusalãi+ kuenda valupale o Yuda,+ angombo va ka tenda vali olomeme viavo,’ oco Yehova a popia.”

14 “‘Tali! Oloneke vi kasi oku iya,’ oco Yehova a popia, ‘eci ndi ka tẽlisa ohuminyo yiwa yina nda popele yatiamẽla konjo ya Isareli kuenda konjo ya Yuda.+ 15 Koloneke viaco kuenda kotembo yaco, ame ndi ka kokisa okuti, ku Daviti ku yova ocinjovelela* cesunga+ kuenje eye o ka sombisa lesunga kuenda lesunguluko vofeka.+ 16 Koloneke viaco, o Yuda yi ka popeliwa+ kuenda o Yerusalãi yi ka tunga loku kolapo.+ Kuenje oyo yi ka tukuiwa ndoco: Yehova Eye Esunga Lietu.’”+

17 “Momo ca popia Yehova ceci hati: ‘Otembo yosi ku ka kala ulume umue ukuacikoti ca Daviti oco a tumãle kocalo conjo ya Isareli,+ 18 ndaño muẽle kovitunda va Lewi ka ku ka kambela omunu umue oco a talame kovaso yange oku eca ovilumba vioku pia elisi, oku yoka ovilumba violomema kuenda oku eca ovilumba.’”

19 Ondaka ya Yehova yeya vali ku Yeremiya yiti: 20 “Ca popia Yehova ceci hati: ‘Nda ene wa tẽleli oku imũla ocisila cange catiamẽla kutanya kuenda ocisila cange catiamẽla kuteke, oco ka ku ka kale utanya ale uteke votembo ya sokiyiwa,+ 21 nda oco lika ocisila cange nda linga lukuenje wange Daviti ca imũha,+ oco ka ka kuate omõla umue o viala ndosoma kocalo caye+ kuendavo ocisila cange nda linga lovitunda va Lewi akuenje vange.+ 22 Ndeci olohoka viovailu ka vi tẽliwa oku tendiwa kuenda eseke liokalunga ka li yongiwa, haico ndi ka vokiya ocitumbulukila* cukuenje wange Daviti kuenda va Lewi vana va kasi oku ndi vumba.’”

23 Ondaka ya Yehova yeya vali ku Yeremiya yiti: 24 “Anga hẽ ove kua limbukile eci omanu ava va kasi oku popia vati: ‘Yehova o ka likala apata avali a nõla’? Ovo va kasi oku tata omanu vange muẽle lekambo liesumbilo kuenda ka va va tendi vali ndofeka.

25 “Ca popia Yehova ceci hati: ‘Ndeci nda tumbika muẽle ocisila cange catiamẽla kutanya kuenda kuteke,+ ovihandeleko* vio kilu levi vio kilu lieve,+ 26 lalimue eteke ndi ka likala ocitumbulukila* ca Yakoba leci cukuenje wange Daviti kuenda ndi kopa kocitumbulukila* caye olombiali vi viala ovitumbulukila* via Avirahama, Isake kuenda Yakoba. Momo ame ndi kongolola vali olomandekua viavo+ kuenje ndi vi kuatela ohenda.’”+