Yeremiya
25 Kunyamo wakuãla wa Yehoyakimi+ omõla a Yosiya, soma yo Yuda okuti, kunyamo watete wa Soma Nevukandesa wo ko Bavulono, Yeremiya wa tambula ondaka yimue yatiamẽla komanu vosi vo ko Yuda. 2 Ca popia Yeremiya uprofeto catiamẽla komanu vosi vo ko Yuda kuenda kolonungi viosi vio Yerusalãi ceci hati:
3 “Oku upisa kunyamo 13 wuviali wa Yosiya+ omõla a Amoni soma yo Yuda, toke etaili, vokuenda kuanyamo 23, nda enda oku tambula ondaka ya Yehova kuenda oku sapela lene olonjanja vialua,* pole, ene ka vu yevi.+ 4 Kuenje Yehova wa enda oku tuma akuenje vaye vosi ovaprofeto kokuene, poku va tuma olonjanja vialua,* pole, ene ka wa yeveleli lutate ndaño oku kuluila ovatuĩ ene oku va yeva.+ 5 Ovo va enda oku popia hati: ‘Lingi ohenda, tinduki kolonjila viene vĩvi kuenda kovilinga viene vĩvi;+ kuenje vu kamamako oku kala otembo yalua vofeka yina Yehova a eca osimbu kokuene kuenda ku vakukululu yene. 6 Ko ka kuami olosuku vikuavo, ndaño oku vi vumba, ale oku vi kekamẽla, poku ndi sanumũla lovopange ovaka ene; sanga ndi nena ohali kokuene.’
7 “‘Pole, ene ka wa njeveleli,’ oco Yehova a popia. ‘Handi lopo ene wa ndi sanumũli lupange wovaka ene oco vu li neneli ene muẽle ohali.’+
8 “Omo liaco, ca popia Yehova ukualohoka ceci hati: “‘Omo okuti ka wa pokuili kolondaka viange, 9 ñasi oku tuma kapata osi o konano,”+ oco Yehova a popia, “ndi kasi oku tuma Soma Nevukandesa wo ko Bavulono ukuenje wange+ kuenda ndi ka va nena oco va katukile ofeka eyi+ lolonungi vialio kuenda va katukilavo olofeka viosi vi lisungue layo.+ Ndi ka va kundula loku va lingisa ocikuata coku yokoka kuenda ocina cimue coku sika ovilua loku nyõliwa otembo ka yi pui. 10 Ndi ka malako ocileñi conjolela kuenda ocileñi cesanju ci kasi pokati kavo,+ pokati kondaka ya sandombua leyi ya ndombua,+ pokati kocileñi combambo kuenda ocinyi condiyelo. 11 Kuenje ofeka yosi eyi, yi ka kunduiwa loku siala ovingululu kuenda ocikuata coku yokoka kuenje olofeka evi vi ka vumba soma yo Bavulono ci soka 70 kanyamo.”’+
12 “‘Pole, eci ku tẽlisiwa 70 kanyamo ndi ka kangisa+ Soma yo Bavulono kuenda ofeka yaco omo liakulueya avo,’+ oco Yehova a popia, ‘kuenje ndi ka lingisa ofeka ya va Kaldea ekango limue liekalasoko otembo yosi.+ 13 Ndi ka nena kofeka yaco, olondaka viange viosi nda popia vioku yi katukila, oku kongelamo ovina viosi via sonehiwa velivulu eli, vina Yeremiya a imbila owanji olofeka viosi. 14 Momo olofeka vialua kuenda olosoma via pama,+ vi ka va lingisa apika+ kuenje ndi ka va fetuluinya ndomo ci likuata lovilinga viavo kuenda ovopange ovaka avo muẽle.’”+
15 Yehova Suku ya Isareli wa ndi sapuila hati: “Tambula peka liange okopo eyi yovinyu yonyeño yange kuenje nyuisa olofeka viosi kuna hu tuma. 16 Ovo va ka nyua kuenda va ka yengenga kuenje va ka kala ndayui omo liosipata ndi kasi oku tuma pokati kavo.”+
17 Omo liaco, nda tambula okopo ya kala peka lia Yehova kuenda nda lingisa okuti, olofeka viosi vina Yehova a ndi tuma vi nyuako, ndeci:+ 18 oku fetikila lo Yerusalãi kuenda alupale o Yuda,+ olosoma vialio kuenda olombuale vialio, oco va nyõliwe loku kala ocikuata coku yokoka, ocina cimue coku sika ovilua kuenda esiñalo,+ ndeci ci kasi etaili; 19 la Fareo soma Yegito, lakuenje vaye, lolombuale viaye, lomanu vaye vosi,+ 20 kuenda omanu vosi va litepa va kasi pokati kavo; olosoma viosi viofeka yo Usi; olosoma viofeka ya va Filisiti,+ Asikelone,+ Gasa, Ekirone kuenda vana va supa vo Asidode; 21 Edome,+ Moavi+ kuenda va Amoni;+ 22 olosoma viosi vio Turo, olosoma viosi vio Sidono+ kuenda olosoma viocifuka cokalunga; 23 Dedane,+ Tema, Busi kuenda vosi vana va kuete esinga lia tetiwa povipolo;+ 24 olosoma viosi vio Arabia+ kuenda olosoma viosi via litepa via tunga vekalasoko; 25 olosoma viosi vio Simiri, olosoma viosi vio Elami+ kuenda olosoma viosi vio Media;+ 26 olosoma viosi vio konẽle yo konano evi viocipepi kuenda viocipãla okuti, omunu lukuavo kuenda ovosoma osi akuavo a kasi kilu lieve liosi; kuenje soma yo Sesake*+ o ka nyua noke liavo.
27 “Kuenje ove o sukila oku va sapuila hati: ‘Ca popia Yehova ukualohoka, Suku ya Isareli ceci hati: “Nyui kuenda kolui loku lisanjala kuenje kupuki okuti, ka vu tẽla vali oku votoka+ omo liosipata ñasi oku tuma kokuene.”’ 28 Nda ovo va likala oku kuata okopo yi kasi peka liove oco va nyue, va sapuila hati: ‘Ca popia Yehova ukualohoka ceci hati: “Ene vu sukila oku yi nyua! 29 Momo tala! nda ame ndi nena tete efengi volupale lu tukuiwa londuko yange,+ anga hẽ ene ka vu yambuiwa?”’+
“‘Ene ka vu ka puluka, momo ñasi oku tuma osipata oco yi katukile olonungi viosi vio kilu lieve,’ oco Yehova ukualohoka a popia.
30 “Kuenje ove, va imbila owanji wolondaka evi viosi kuenda va sapuila hati:
‘Oku upisa kilu Yehova o ka koma ndohosi,
Kuenda oku upisa kocitumãlo caye ci kola, eye o ka yevalisa ondaka yaye.
Eye o ka komẽla lolukandi kocitumãlo caye a tunga.
O ka kaluka nda vana va kosa ayuva kocikoselo,
Eye o ka imbila lolukandi olonungi viosi vio kilu lieve.’
31 ‘Onjuela yimue yi ka yevalela kasulilo o kilu lieve,
Momo Yehova o kuete ondaka yimue lolofeka,
Kuenda eye o ka ponda olondingaĩvi losipata,’ oco Yehova a popia.
32 Ca popia Yehova ukualohoka ceci hati:
‘Tali! Ohali yimue yi kasi oku lisanduila oku upisa kofeka yimue toke kofeka yikuavo,+
Kuenda ehunguhungu limue linene liofela li ka tunda oku upisa kovitumãlo viocipãla vio kilu lieve.+
33 “‘Kuenje vana va pondiwa la Yehova keteke liaco, va ka sanduiwa kesulilo limue lio kilu lieve toke kesulilo likuavo lio kilu lieve. Ovo ka va ka liliwa, ka va kongoluiwa, ale oku kendiwa. Ovo va ka kala ndotulumu kilu lieve.’
34 Lisiõsiõli, ene angombo kuenda kaluki lolukandi!
Litiñolõli posi, ene asongui vocunda,
Momo otembo yene yoku pondiwa kuenda yoku sanduiwa ya pitĩla,
Kuenje ene vu ka kupuka ndocikuata cimue cotuma ci kuete esilivilo!
35 Angombo ka va kuete ocitumãlo cimue coku tilila,
Kuenda asongui vocunda, ka kuli oku va tilila.
36 Yeveleli! Oku kaluka kuangombo
Kuenda oku liyula kuasongui vocunda,
Momo Yehova o kasi oku nyõla usenge wavo woku lisila oviunda.
37 Kuenje ovitumãlo viombembua via siala upolokoso
Omo lionyeño yalua ya Yehova.