Isaya
5 Ndi ka imbila ocisungo ukuacisola cange
Ocisungo cimue catiamẽla kukuacisola cange kuenda kocumbo caye cayuva.+
Ukuacisola cange wa kuatele ocumbo cimue cayuva ca kala vowulu wombolela.
2 Eye wa fẽla osi kuenda wopamo ovawe.
Eye wa kũla vepia ayuva awa a kusuka,
Wa tunga osapalalo yimue vokati kaco,
Kuenda wa fẽlelamo ocikoselo cimue.+
Kuenje wa talamẽla okuti oco cima ayuva awa,
Pole, oco ca ima lika ayuva a ngangama.+
3 “Cilo, alonungi vio Yerusalãi kuenda amanu vo ko Yuda,
Lingi ohenda, tetuluili pokati kange locumbo cange cayuva.+
4 Nye vali ndi sukila oku linga locumbo cange cayuva
Okuti handi sia ci lingile?+
Momo lie osimbu nda talamẽla okuti cima ayuva awa,
Oco ca ima lika ayuva a ngangama?
5 Cilo, ndu vu sapuili
Eci ndi ka linga locumbo cange cayuva:
Ndi ka tukũla ongumbo yaco,
Kuenda oyo yi ka timĩhiwa.+
Ndi ka nyõla ocimbaka covawe,
Kuenje oco ci ka kosiwa.
6 Ndi ka ci lingisa ndofeka yimue ya siala upolokoso;+
Ka ci ka sonjiwa ale oku sonjuiwa.
Ci keyuka olosongo kuenda osoka,+
Kuenje ndi ka handeleka alende oco ka a ka ece ombela kocumbo caco.+
7 Momo ocumbo cayuva ca Yehova ukualohoka, onjo ya Isareli;+
Omanu vo ko Yuda ovo ovaima* eye a solele.
Eye wa kala oku lavoka esunga,+
Pole, tala! Kua kala ekambo liesunga;
Eye wa lavoka esunguluko,
Pole, tala! Kua kala oku litetela kuohali.”+
8 Ngongo ya vana va kongela onjo yimue lonjo yikuavo+
Kuenda ya vana va kongela epia limue lepia likuavo+
Toke eci ka ku kala vali lacimue cupiwa
Kuenda ene lika vu kala vofeka yaco!
9 Nda yeva Yehova ukualohoka oku lisinga
Okuti olonjo vialua ndaño vinene kuenda via posoka,
Vi ka linga ovingululu,
Okuti ka mu kala onungi layimue.+
10 Ocumbo cinene cayuva, ci ka ima lika ombatu yimosi yonjongo,*
11 Ngongo ya vana va pasuka omẽle oco va nyue ovina vi koluisa,+
Vana va kala toke luteke, toke eci ovinyu yi va koluisa!
12 Kovipito viavo, kuli ohalupa kuenda ocikuata covisikilo ca pangiwa lovikolo,
Opandelu, olumbendo kuenda ovinyu;
Pole, ka va sokolola kovopange a Yehova,
Kuenda ka va limbuka ovopange ovaka aye.
13 Omo liaco, omanu vange va kambatiwa kumandekua
Omo liekambo liukũlĩhĩso;+
Omanu vavo va kemãla va ka kala onjala,+
Kuenda omanu vavo vosi va ka kukuta lenyona.
14 Omo liaco, Onjembo* ya livokiya oyo muẽle
Kuenda oyo yasama calua omẽla wayo;+
Ulamba* wo Yerusalãi, owiñi walio vakuanjuela kuenda vana va linga lika ovipito
Va ka lokila muẽle Vonjembo yaco.
15 Kuenda eye o ka lingisa okuti omanu va ka petamẽla posi,
Eye o ka kutisa osõi omanu,
Kuenda o ka kutisa osõi vakuakulitunula.
16 Yehova ukualohoka, o ka kemãlisiwa omo liesombiso* liaye;
Suku yocili, Una o Kola+ o ka likolisa eye muẽle pocakati cesunga.+
17 Olomeme oko vi ka lila ndu okuti vocililo cavio;
Ovingendeleyi vi ka lila kovitumãlo via siala upolokoso kuna kua kala ovinyama via tekuiwa ciwa.
18 Ngongo ya vana va koka eko liavo lovikolo viesanda
Kuenda ekandu liavo lovikolo vio kalosa;
19 Vana va popia vati: “Eye a yayuise upange waye;
Owo wiye lonjanga oco tu u mole.
20 Ngongo ya vana va popia okuti ciwa, cĩvi kuenda cĩvi, ciwa,+
Vana va piñainya owelema locinyi kuenda ocinyi lowelema,
Vana va pongolola oku lula leci ci sõsa kuenda oku sõsa leci cilula!
21 Ngongo ya vana va kolela kolondunge viavo muẽle
Kuenda vana va litenda okuti va lunguka!+
22 Ngongo ya vana va nyua ovinyu yalua
Kuenda alume va loñoloha koku tenga ovinyua vi koluisa,+
23 Vana va teyuila u o kuete eko omo liocitukiko cimue+
Haivo va likala esunga komunu ukuesunga!+
24 Omo liaco, ndeci ulienge wondalu u timĩha inene
Kuenda owangu wa kukuta u nyõliwa lulienge,
Olombombo viavo vi ka vola,
Kuenda olonelẽho viavo vi ka lisandola ndoneketela,
Momo ovo va likala ocihandeleko* ca Yehova ukualohoka
Kuenda ka va lekisile esumbilo kondaka ya Una o Kola ko Isareli.+
25 Eli olio esunga lieci onyeño yalua ya Yehova yi wengukila omanu vaye,
Kuenda eye o kolõla eka liaye poku va katukila loku va ponda.+
Olomunda vi ka luluma,
Kuenda ovivimbi viavo vi ka kala ndinene volokololo.+
Omo liovina viaco viosi, onyeño yaye ka ya litiukilemo,
Pole, eka liaye handi liolõha oco li ponde.
26 Eye wa kapa ondimbukiso* yimue kofeka yimue yi kasi ocipãla;+
Eye wa sika ovilua oco ovo veye oku upisa kasulilo o kilu lieve;+
Kuenda tala! ovo va kasi oku iya lonjanga yalua.+
27 Lomue pokati kavo wa kava ndaño muẽle oku lilondoka.
Lomue o kuete otulo ndaño muẽle oku pekela.
Ovovia a kasi volombunda viavo, ka a yongele,
Kuenda ovikolo violohaku viavo ka via tepele.
28 Ovisongo viavo viosi via lepikiwa,
Olohonji viavo viosi via tieñiwa.*
Akonjo olokavalu viavo a kasi ndovawe,
Kuenda alola avo a kasi ndehunguhungu liofela.+
Ovo va ka koma, toke eci va ka kuata ocinyama
Kuenda va ka cambata okuti lomue o ci yovola.
30 Keteke liaco, ovo va ka komẽla ocinyama
Ndokuõla kuokalunga.+
Omunu wosi o vanja kofeka yaco, o ka mola owelema u koka usumba;
Ndaño muẽle ocinyi ci ka linga owelema omo lialende.+