Yeremiya
39 Kunyamo wecea wa Soma Sedekiya wo ko Yuda, kosãi yekũi, Soma Nevukandesa wo ko Bavulono kumue lolohoka viaye viosi, veya ko Yerusalãi kuenje va yi ñuala ocingonja.+
2 Kunyamo 11 wa Sedekiya, kosãi ya kuãla, keteke liecea liosãi, ovo va linga epangu limue vocimbaka colupale.+ 3 Kuenje olombuale viosi via soma yo Bavulono via iñila kuenda via tumãla Pombundi yo Pokati,+ olonduko viavo vievi: Nergali-Siaresere u Semigare, Nevo-Sariseki* u Ravisarisi, Nergali-Siaresere u Ravimagi* kuenda olombuale viosi vikuavo via soma yo Bavulono.
4 Eci Soma Sedekiya wo ko Yuda kuenda asualali vosi va va mola, ovo va tila,+ va tunda volupale luteke oku loña konjila yocumbo ca soma, poku pita pombundi yi kasi pokati kovimbaka vivali kuenje ovo vamamako oku endela vonjila yo Araba.+ 5 Pole, olohoka via va Kaldea via va kuama kuenje via sanga Sedekiya vanyãla o vekalasoko lio Yeriko.+ Ovo vo kuata kuenda vo wambata ku Soma Nevukandesa wo ko Bavulono ko Rivila+ kofeka yo Hamati+ kuna eye o sombisila. 6 Omãla va Sedekiya va pondiwila kovaso aye ko Rivila locihandeleko ca soma yo Bavulono kuenda soma yo Bavulono wa tumavo oku ponda olombuale viosi vio Yuda.+ 7 Kuenje eye wa tofola ovaso a Sedekiya noke wo kuta lalienge osipi oco o tuale ko Bavulono.+
8 Va Kaldea va timĩha onjo* ya soma kuenda olonjo viomanu+ kuenje va kupula ovimbaka vio Yerusalãi.+ 9 Nevusaradana+ usongui wolondavululi, wambata kumandekua ko Bavulono omanu va supilepo vana va siwa volupale, va tiamẽlele konele yaye kuenda vosi vana va puluka.
10 Pole, Nevusaradana usongui wolondavululi wa sia vofeka yo Yuda vamue pokati komanu olohukũipo vali, vana ka va kuatele cimue. Keteke liaco, eye wa ecavo kokuavo oviumbo viayuva kuenda ovapia oku talavaya.*+
11 Soma Nevukandesa wo ko Bavulono wa eca ku Nevusaradana usongui wolondavululi ovihandeleko evi viatiamẽla ku Yeremiya viokuti: 12 “Kuendi, u sandi kuenda u tati; ko ko lingi cimue cĩvi kuenda eci kokuaye cosi eye a pinga kokuene.”+
13 Omo liaco, Nevusaradana usongui wolondavululi, Nevusiasibana u Ravisarisi,* Nergali-Siaresere u Ravimagi* kuenda alume vosi va velapo va soma yo Bavulono, va tuma alume 14 oco vope Yeremiya Vocitali Colondavululi+ loku u weca ku Gedaliya+ omõla a Ahikama+ omõla a Siafane+ oco o wambate konjo yaye. Omo liaco, eye wa tunga pokati komanu.
15 Osimbu Yeremiya a yikiwile Vocitali Colondavululi,+ ondaka ya Yehova yeya kokuaye yiti: 16 “Kuende, sapuila Evede-Meleke+ u Etiopia hati: ‘Ca popia Yehova ukualohoka, Suku ya Isareli ceci hati: “Ñasi oku tẽlisa olondaka viange violupale olu vioku nena ohali okuti, uwa hawoko kuenje keteke liaco, ove o ka mola okuti, ci kasi oku tẽlisiwa.”’
17 “‘Pole, ndi ka ku yovola keteke liaco,’ oco Yehova a popia, ‘kuenje ove ku ka eciwa kalume vana ove o kuetele usumba.’
18 “‘Momo ame ndi ka ku yovola muẽle kuenda ove ku ka kupuka kosipata. Ove o ka kuata omuenyo wove ndonima,*+ momo ove wa kolela kokuange,’+ oco Yehova a popia.”