Ukundi
2 Nda popia vutima wange siti: “Linga ndi seteke esanju loku mola nda esulilo liaco liwa.” Pole, tala! Cosi ca kala esanda.
2 Ame nda popia eci catiamẽla koku yola siti: “Eci uyui!”
Kuenda kesanju siti: “Li kuete esilivilo lie?”
3 Nda nõlapo oku mola eci ciwa ci tunda kovinyu,+ loku amamako oku lekisa olondunge otembo yosi; nda seteka uveke oco ndi limbuke eci ca velapo komanu okuti, va ci linga vokuenda kuoloneke viavo vitito viomuenyo vemẽhi liovailu. 4 Nda linga ovopange anene.+ Nda litungila olonjo;+ Nda li kũlila oviumbo viayuva.+ 5 Nda li kũlila oviumbo vinene levi vitito kuenje nda tuikamo apata osi oviti viapako. 6 Nda li lingila oviva viovava vioku tapela usenge woviti via telẽha. 7 Nda kuatele apika valume lapika vakãi+ kuenda nda kuata apika va citiwila vonjo yange.* Nda kuatelevo oviunda vialua okuti, violongombe kuenda violomeme,+ ovio via luile vali okuti, via vana va ndi liangela ko Yerusalãi vi sule. 8 Nda liongoluila opalata kuenda ulu okuti, ovokuasi*+ olosoma kuenda aluvumba.+ Ndongolola olonjimbi vialume kuenda viakãi oku kongelamo eci ci nena esanju lialua komãla valume okuti, ukãi, ocili, akãi valua.* 9 Omo liaco, nda linga omunu unene kuenda nda pitahãla vosi vana va ndi liangela ko Yerusalãi.+ Kuenje olondunge viange viamamako lame.
10 Ovina viosi nda livela* oku linga,+ nda vi linga. Ame sia tatekele utima wange esanju lalimue, momo utima wange wa sanjukile omo liupange wange wosi walua kuenda eyi oyo ya kala onima* yange omo liupange wange wosi walua.+ 11 Pole, eci nda sokolola kovopange osi ovaka ange a linga kuenda kupange wosi walua una nda tẽlisa lelikolisilo lialua,+ nda limbuka okuti, ovina viosi ka via kuatele esilivilo, oku lupukila konyima yofela;+ ka kua kaile lacimue ci kuete esilivilo liocili vemẽhi liekumbi.+
12 Noke nda tiamisila vali utima kolondunge, kuyui kuenda kuveke.+ (Momo, nye ci pondola oku linga omunu una o ka piñala soma? Te lika eci ca lingiwa ale.) 13 Kuenje nda limbuka okuti, olondunge via velapo, uveke u sule,+ ndeci ocinyi ca velapo okuti, owelema u sule.
14 Ukualondunge o pondola oku mola ciwa ovina;*+ pole, eveke li endela vowelema.+ Ame nda limbukavo okuti kuli esulilo limuamue ku vosi yavo.+ 15 Noke nda popia vutima wange siti: “Ovina vi pita leveke vi ka pitavo lame.”+ Omo liaco, onima yipi nda tambula omo lioku kuata olondunge vialua? Kuenje nda popia vutima wange siti: “Eci lacovo esanda.” 16 Momo ci kaile ukualondunge, ci kaile eveke, ka va ka ivalukiwa otembo ka yi pui.+ Koloneke vi keya, vosi yavo va ka ivaliwa. Kuenje ukualondunge o ka fa ndati? Ndeci ci fa eveke.+
17 Omo liaco, nda fetika oku suvuka omuenyo,+ momo ovina viosi via lingiwa vemẽhi liekumbi kokuange via molẽhele okuti viohali, momo ovina viosi via kala viesanda,+ ca kala oku lupukila konyima yofela.+ 18 Nda fetika oku suvuka cosi cina ame nda talavayela calua vemẽhi liekumbi,+ momo ame nda sukilile oku ci sila komunu una o ndi piñala.+ 19 Kuenje helie wa kũlĩha nda eye o ka kala ukualondunge ale eveke?+ Ndaño ndoco, eye o ka lava ovina viosi nda lisandela lalikolisilo alua kuenda lolondunge vemẽhi liekumbi. Eci lacovo esanda. 20 Omo liaco, nda fetika oku sumua vutima wange omo liupange wosi walua una nda likolisilako oku linga vemẽhi liekumbi. 21 Momo omunu o pondola oku talavaya calua, poku songuiwa lolondunge, lukũlĩhĩso kuenda uloño, pole, eye o sukila oku eca onima yaye* komunu una ka lingile upange waco.+ Eci lacovo esanda kuenda ocilunga cimue cinene.*
22 Onima yipi omunu a pondola oku kuata yi tunda kupange waye wosi walua lo kocipululu cu vetiya* oku talavaya calua vemẽhi liekumbi?+ 23 Momo vokuenda kuoloneke viaye viosi, upange waye u nenela lika evalo+ kuenda esumuo kuenje ndaño muẽle kuteke utima waye ka u puyuka.+ Eci lacovo esanda.
24 Ka kuli lacimue ca velapo vali komunu nda hakuliako loku nyua kuenda oku sanga esanju liupange waye walua.+ Ame nda limbuka okuti eci lacovo, ci tunda peka lia Suku yocili,+ 25 momo, helie o lia kuenda o nyua ca velapo okuti, ame ndi sule?+
26 Komunu una a sanjukila, eye eca kokuaye olondunge kuenda ukũlĩhĩso lesanju,+ pole, ku una ukuakandu eye eca upange woku ongolola kuenda woku ongotiya ovina oco vi eciwe ku una o sanjuisa Suku yocili.+ Eci lacovo esanda, oku lupukila konyima yofela.