Yeremiya
15 Noke Yehova wa ndi sapuila hati: “Ndaño Mose la Samuele va talamẽle kovaso yange,+ nda sia lekisile ohenda komanu ava. Va tundisiwe kovaso yange. Va ende. 2 Kuenje nda ovo va ku pula vati: ‘Pi tu sukila oku enda?’ ove o sukila oku va sapuila okuti: ‘Ca popia Yehova ceci hati:
“Wosi o sesamẽla oku fa luvei u ponda, a fe luvei!
Wosi o sesamẽla oku fa losipata, a fe losipata!+
Wosi o sesamẽla oku fa lonjala, a fe lonjala!
Kuenda wosi o sesamẽla umandekua a ende kumandekua!”’+
3 “‘Ndi ka va nenela afengi akuãla,’*+ oco Yehova a popia, ‘osipata yoku ponda, olombua oco vi koke atimba avo kuenda olonjila viovailu lovinyama vio kilu lieve, oco vi lie loku kundula.+ 4 Ndi ka ecelela okuti, ovo va kala ocikuata cimue cocinjoko kovosoma osi o kilu lieve+ mekonda lia Manase, omõla a Hesekiya, soma yo Yuda, omo liovina a linga ko Yerusalãi.+
5 Helie o ka lekisa ohenda kokuove, A Yerusalãi,
Helie o ka lekisa ocikembe kokuove,
Kuenda helie o ka talama oco a pule ndomo o kasi?’
6 ‘Ove wa njanduluka,’ oco Yehova a popia.+
‘Ove o kasi oku amamako oku njimba onyima.*+
Omo liaco, ndi koluĩla eka liange kokuove loku ku kundula.+
Ame nda kava loku lekisa ohenda* kokuove.
7 Ame ndi ka va pekula longalufu volombundi viofeka.
Ame ndi ka ponda omãla vavo.+
Ndi ka nyõla omanu vange,
Momo ovo va likala oku tinduka volonjila viavo.+
8 Ovimbumba viavo vi ka livokiya calua kovaso ange okuti, eseke lio vokalunga li sule.
Ndi ka nena unyõli oco a va katukile ekumbi pongunji, oku katukila va ina kuenda amalẽhe alume.
Ndi ka va nenela esakalalo locinjoko ocipikipiki.
9 Ukãi una wa cita omãla epanduvali wambuka;
Eye o likolisilako oku fuima.
Ekumbi liaye lia iñila osimbu handi kua kala utanya,
Eye o kutisiwa osõi kuenda o sepuiwa.’*
‘Kuenje vana vatito va supapo pokati kavo
Ndi ka va eca kosipata kovaso yovanyãli vavo,’ oco Yehova a popia.”+
10 Ngongo yange we, A ina yange, omo wa ndi cita,+
Ndimunu umue okuti otembo yosi o litenga vovama kuenda vovoyaki lofeka yosi.
Ame sia levalisile ndaño oku levala;
Pole, vosi yavo va ndi siñala.
11 Yehova wa popia hati: “Ocili muẽle ndi ka ku kuatisa;
Ame ndi ka kala muẽle mitakati yove kotembo yovitangi,
Kotembo yohali omo liunyãli.
12 Anga hẽ umue o pondola oku nyanyõla utale,
Utale u tunda konano kuenda osipi?
13 Ovikuata viove kuenda ovokuasi ove ndi ka vi eca ndovina via pundiwa,+
Ka vi ka kuata ondando, omo liakandu ove osi wa linga kovikanjo viove viosi.
14 Ndi ka eca ovina viaco kovanyãli vove
Oco va vi ambate kofeka yimue ove kua kũlĩhĩli.+
Onyeño yange ya taimisa ondalu
Kuenje oyo yi kasi oku vu taimeli.”+
15 Ove muẽle wa kũlĩha ohali yange, A Yehova,
Njivaluke kuenda tiamisila utima wove kokuange.
Ndi fetuluinyileko vakuakundilambalala.+
Ku ka ecelele okuti, ndi nyõleha* omo lioku livala kuove konyeño.
Kũlĩha okuti mekonda liove, ndi pandikisa koku sanumuiwa oku.+
16 Olondaka viove via sangiwa kuenda nda vi lia;+
Kuenje ondaka yove ya linga onjolela kuenda esanju liutima wange,
Momo ndi tukuiwa londuko yove, A Yehova Suku ukualohoka.
17 Si tumãla pokati ka vana va sole ayele kuenda si va sanjukila.+
18 Momo lie evalo liange ka li pitila kuenda epute liange ka li kayela?
Olio ka li tava oku sakuiwa.
Anga hẽ ove o ka kala ono yimue yovava okuti ka yeci ovava?
Yina ka yi koleliwa?
19 Omo liaco, ca popia Yehova ceci hati:
“Nda ove wa tiuka, ame ndi ka ku tumbulula,
Kuenje ove o ka talama kovaso yange.
Nda ove o tepa eci ci kuete esilivilo kueci ka ci silivila,
Ove o ka kala ndomẽla wange.*
Ovo va ka ñualela kokuove,
Pole, ove ku ka ñualela kokuavo.”
20 “Ñasi oku ku lingisa ocimbaka cimue ca pama cosipi komanu ava.+
Ovo va ka liyaka muẽle love,
Pole, ka va ka ku yula,+
Momo ame ñasi love oco ndu ku popele kuenda oku ku yovola,” oco Yehova a popia.
21 “Ndi ka ku yovola peka liolondingaĩvi
Kuenda oku ku yovola peka liolongangala.”