Esekiele
6 Ondaka ya Yehova yeya vali kokuange yiti: 2 “A mõlomunu, imba ovaso kolomunda via Isareli kuenda imba owanji woku va katukila. 3 O sukila oku popia hati: ‘Alomunda via Isareli, yeveleli ondaka ya Ñala Tõlo Yehova: Eci oco Ñala Tõlo Yehova a sapuila olomunda, oviwulu, olondui kuenda atapi hati: “Tala! Ndi ka nena osipata yoku vu katukili kuenda ndi ka nyõla ovitumãlo viene via lepa. 4 Ovotala ene a ka nyõliwa, ovotala ene oku timĩhila insensu a ka nyanyũiwa+ kuenda ndi ka kupuila vimue pokati kovivimbi viene kovaso yoviteka viene via vĩha.*+ 5 Ndi ka kupuila ovivimbi viomanu va Isareli kovaso yoviteka viavo vi lingisa onyanya kuenda ndi ka sanduila akepa ene kolonele viovotala ene.+ 6 Kovitumãlo viosi wa tungi, alupale aco a ka siala alunda+ kuenda ovitumãlo via lepa vi ka nyõliwa loku siala alunda.+ Ovotala ene a ka nyõliwa kuenda a ka nyanyuĩwa, oviteka viene vi linga onyanya vi ka nyõliwa, ovotala avo oku timĩha insensu a ka kupuiwa kuenje ovopange ene a ka imũha. 7 Kuenje ovivimbi vi ka kupukila pokati kene+ kuenda vu ka kũlĩha okuti, ame ndi Yehova.+
8 “‘“Pole, ame ndi ka siapo ocisupe cimue, omo vamue va ka puluka kosipata pokati kolofeka eci va ka sanduiwa lolofeka.+ 9 Kuenje vana va ka puluka, va ka njivalukila pokati kolofeka kuna va ka kala olomandekua.+ Ovo va ka mola ndomo nda sumuile omo liutima wavo ka wa sungulukile* okuti, wa ndi yanduluka+ kuenda omo liovaso avo a sanjukila* oviteka viavo via vĩha.+ Ovo va ka kuata osõi kuenda va ka kuatela onyanya ovina viosi vĩvi haivio via vĩha ovo va linga.+ 10 Ovo va ka limbuka okuti ame ndi Yehova kuenda esokiyo liange lioku nena kokuavo eyambulo eli, ka lia kaile liolivova.”’+
11 “Eci oco ca popia Ñala Tõlo Yehova hati: ‘Pandula lovaka ove kuenda tutula posi olomãhi viove kuenje lisiõsuĩla evĩho liosi lovina vĩvi via lingiwa lonjo ya Isareli, momo ovo va ka kupuiwa losipata, lonjala kuenda lefengi.+ 12 Una o kasi ocipãla o ka fa lefengi, una o kasi ocipepi o ka fa losipata la una o puluka kovina evi kuenda una o supapo, o ka fa lonjala; kuenje ndi ka lekisa onyeño yange yosi kokuavo.+ 13 Kuenje vu ka kũlĩha okuti ame ndi Yehova,+ eci ovivimbi viavo vi ka kupukila koviteka viavo vi linga onyanya konele yovotala avo osi,+ koviwulu viosi via lepa, kolosungu viosi violomunda, vemẽhi lioviti viosi via pulika kuenda vemẽhi liovianja vioviti vinene muna ovo va enda oku ecela ovilumba vielemba liwa, oco va sanjuise oviteka viavo viosi via vĩha.+ 14 Ndi kolõla eka liange poku va katukila kuenda ndi ka lingisa okuti, imbo li siala elunda kuenda ovitumãlo viavo vioku tungila, vi ka siala alunda okuti ekalasoko ocipepi lo Rivila, li sule. Kuenje va ka kũlĩha okuti, ame ndi Yehova.’”