Yeremiya
48 Ca popia Yehova ukualohoka Suku ya Isareli, catiamẽla ko Moavi+ ceci hati:
“Ngongo yo Nevo,+ momo oyo ya nyõliwa!
O Kiriyatayi+ ya kutisiwa osõi kuenda ya tambuiwa.
Ocitililo ca koka,* ca kutisiwa osõi kuenda ca teyiwa.+
2 Ovo ka va sivaya vali o Moavi.
Ko Hesibone+ ovo va sokiya enyõleho liayo vati:
‘Enjui, tu yi kunduli okuti ka yi lingi vali ofeka.’
Lovevo, A Mademene amamako oku ũha,
Momo osipata yi kasi oku ku kuama.
3 Ko Horonayimi+ ku yevala ondaka yoku kaluka,
Momo enyõleho kuenda ocilunga cimue cinene ceya kokuavo.
4 O Moavi ya nyõliwa.
Omãla vayo vatito va kasi oku lila.
5 Osimbu va lamana ko Luhiti omanu vamamako oku lila.
Kuenda osimbu va kala kociloka co Horonayimi, ovo va yeva oku lila kuesumuo omo liocilunga.+
6 Tili, popeli omuenyo wene!
Vu sukila oku kala nduti wongaye vekalasoko.
7 Omo okuti, ene wa koleli kovopange ene kuenda kovokuasi ene,
Ene vu ka kuatiwavo.
Kuenje Kemosi+ o kambatiwa kumandekua,
Kumue lovitunda viaye kuenda olombuale viaye.
8 Ukuakunyõla o keya kalupale osi,
Kuenda lalumue olupale lu ka puluka.+
Ocimbota* ci ka kunduiwa,
Ofeka ya tapika yi ka nyõliwa, ndeci Yehova a ci popia.
9 Kapa ondimbukiso yimue ko Moavi,
Momo eci yi siala ovingululu yi ka tila,
Kuenda alupale alio a ka linga ocikuata cimue cocinjoko,
Okuti ka mu kala onungi layimue.+
10 Una o tẽlisa upange wa Yehova locekelela wa siñaliwa!
Una o liwekapo oku pesela osonde losipata yaye wa siñaliwa!
11 Va Moavi va tula utima tunde vutila wavo,
Ndovinyu ya kapiwa vovikuata.
Ovo lalimue eteke va pesiwile vocikuata cikuavo,
Kuenda lalimue eteke vambatiwile kumandekua.
Eli olio esunga lieci epepo liavo li kasilili limuamue,
Kuenda elemba liavo ka lia pongolokele.
12 “‘Omo liaco, tali! Oloneke vi kasi oku iya,’ oco Yehova a popia, ‘eci ndi ka tuma alume kokuavo vana va ka va pesela. Ovo va ka va pesela kuenda va ka sia asanga avo upolokoso kuenje va ka nyanyõla asanga avo anene oco a linge ovimuanyuĩla. 13 Kuenje va Moavi va ka kuatela osõi Kemosi, ndeci onjo ya Isareli ya kuatela osõi o Betele okuti, oyo va kolelele.+
14 Ene vu popia ndati okuti: “Etu tuasualali vamue va pama, va lipongiyila uyaki”?’+
15 ‘O Moavi ya kunduiwa,
Alupale alio a nyõliwa,+
Kuenda amalẽhe vavo valume va velapo, va pondiwa,’+
Oco ca popia Soma una okuti, onduko yaye Yehova ukualohoka.+
16 Ocilunga ca va Moavi ci panda oku pitĩla,
Kuenda ekundu liavo li kasi loku iya lonjanga.+
17 Vosi vana va va ñuala va linga ukamba lavo,
Vosi vana va kũlĩha onduko yavo.
Va sapuili okuti: ‘Ndomo ombueti yunene ya teka, ombueti yeposo!’
18 Loka kulamba wove,
Kuenda tumãla lenyõna,* Amõla ufeko haeve wunungi yo Divone,+
Momo ukuakunyõla wo ko Moavi wa ku katukila,
Kuenje eye o ka lundula ovitumãlo viove vi kuete oviteyuilo.+
19 Talama kohulo yetapalo kuenda lavulula, anungi yo Aroere.+
Pula kulume o kasi oku tila kuenda kukãi wa puluka hati: ‘Nye ca pita?’
20 O Moavi ya kutisiwa osõi kuenda ya yokoka.
Lili kuenda liteteli.
Sapuli ko Arinone+ okuti, o Moavi ya kunduiwa.
21 “Esombiso lieya kofeka ya tapika+ oku katukila o Holone, o Yahaca+ kuenda o Mefaata;+ 22 o Divone,+ o Nevo+ kuenda o Bete-divilataimi; 23 o Kiriyatayi,+ o Bete-Gamuli kuenda o Bete-Meone;+ 24 o Keriote+ lo Bosara; kuenda alupale osi o vofeka yo Moavi, ana a kasi ocipãla la-a ocipepi.
25 ‘Ongusu* yo Moavi ya pua;
Okuoko kualio kua teyiwa,’ oco Yehova a popia.
26 ‘Yi koluisi,+ momo oyo ya litunuila Yehova.+
O Moavi ya li tiñolola volosanjo viayo,
Kuenda oyo ya linga ocikuata cimue cesepu.
27 Anga hẽ Isareli ka kaile ocikuata cimue cesepu kokuove?+
Eye wa sangiwile hẽ pokati kovimunu,
Okuti ove o puka puka kutue loku vangula catiamẽla kokuaye?
28 Tundi valupale kuenda tungi vesenje, alonungi vio Moavi,
Kuenda kali ndopomba yi panga ocanju cayo koviwulu viovitunu.’”
29 “Tua yeva eci catiamẽla kepela lio Moavi, oyo yi litunula calua,
Eci catiamẽla koku lipanda kuayo, kepela liayo, koku litunula kuayo kuenda koku livelisapo kutima wayo.”+
30 “‘Nda kũlĩha onyeño yayo,’ oco Yehova a popia.
‘Pole, va Moavi ka va ka tẽlisa lacimue ndeci va litunula;
Oku litunula kuavo kua kala kuesanda.
31 Eli olio esunga lieci ame ndi ka lisiõsuĩla o Moavi,
Momo ame ndi ka litetela omo lio Moavi yosi
Kuenda ndi ka lilila omanu vo ko Kiri-heresi.+
32 Ndi ka lila calua okuti oku lilila Yasere+ ci sule,
Ndi ka ku lilila, Ove uti wuyuva wo ko Sivima.+
Ovianja viove via kula calua, via pitahãla okalunga.
Via lisanduila toke kokalunga, toke ko Yasere.
Kapako ove ondombo kuenda koku ungula kuove kuayuva,
Ukuakunyõla wa lokilako.+
33 Esanju lonjolela viopiwa kocumbo coviti viapako
Kuenda kofeka yo Moavi.+
Nda imũla ovinyu kocikoselo cayuva.
Lomue vali o ka kosa loku kaluka kuesanju.
Kuenje ku ka kala oku kaluka, pole, hakukalukako kuesanju.’”+
34 “‘Kuli oku kaluka kumue oku upisa ko Hesibone+ toke ko Eleale.+
Ovo va votola ondaka yavo toke ko Yahaca,+
Oku upisa ko Cohara toke ko Horonayimi,+ toke ko Englatisielisiya.
Ndaño muẽle ovava o ko Nimirimi a ka takata.+
35 ‘Una o nena ocilumba kocitumãlo ca lepa,
Kuenda una eca ovilumba ku suku yaye
Ndi ka va malako ko Moavi,’ oco Yehova a popia.
36 Eli olio esunga lieci utima wange u ka lilila* Moavi ndolumbendo,*+
Kuenda utima wange u ka lilila* alume vo ko Kiri-heresi ndolumbendo.*
Momo ukuasi eye a kuete u ka pua.
37 Momo ovitue viosi via pemũiwa,+
Kuenda olonjele viosi via tetiwa.
38 “‘Valusoka osi o ko Moavi
Kuenda volokololo vialio viosi,
Ka muli lacimue, te lika oku lisiõsiõla.
Momo nda kundula o Moavi
Ndesanga limue lia inasiwa,’ oco Yehova a popia.
39 ‘Oyo ya yokoka calua! Lisiõsiõli!
O Moavi ya imba onyima yalio losõi!
O Moavi ya linga ocikuata cesepu,
Ocina cimue coku yokoka ku vosi vana va yi ñuala.’”
40 “Momo ca popia Yehova ceci hati:
‘Tali! Ndeci ongonga yimue yi palãla oco yi kuate ocinyama cimue,+
Eye o ka nyanyumũila avava aye ko Moavi.+
41 Alupale a ka tambuiwa,
Kuenda oviteyuilo vialio vi ka tambuiwa.
Keteke liaco, utima wasualali vo Moavi
U ka kala ndutima wukãi o kasi oku citisa.’”
43 Momo ocinjoko, ocitunu kuenda onjanjo vi kasi kovaso yove,
Anungi yo Moavi,’ oco Yehova a popia.
44 ‘Wosi una o tila ocinjoko, o ka kupukila vocitunu,
Kuenda wosi una o tunda vocitunu, o ka kuatiwa vonjanjo.’
‘Momo ndi ka nenela o Moavi unyamo weyambulo liavo,’ oco Yehova a popia.
45 ‘Vana va kasi loku tila, va talama vulembo wo Hesibone okuti, ka va kuata unene.
Momo ko Hesibone ku ka tunda ondalu
Kuenda ulienge u ka tunda vokati ko Sihoni.+
Owo wu ka lia upolo wo Moavi
Kuenda utue womãla olongangala.’+
46 ‘Ngongo yove, A Moavi!
Omanu va Kemosi+ va kunduiwa.
Momo omãla vove valume vambatiwa kumandekua,
Kuenda omãla vove vakãi vambatiwa kumandekua.+
47 Pole, konepa ya sulako yoloneke, ndi kongolola olomandekua vio Moavi,’ oco Yehova a popia.
‘Palo, opo pa sulila esapulo lioku sombisa o Moavi.’”+