Isaya
41 “Ene avifuka njeveleli loku ũha;*
Ene alofeka kuati vali ongusu.
Ameli kokuange kuenda vanguli.+
Tu liongoluili kocitumãlo cesombiso.
2 Helie wa katula umue oku upisa kutundilo,+
Loku u kovonga lesunga kovolu Aye,*
Oco olofeka vi eciwe kokuaye
Kuenda oco vo lingise okuti o yula olosoma?+
Una o va lingisa oneketela kovaso yosipata yaye,
Kuenda o va sandola ndovinene kovaso yohonji yaye?
3 Eye o va lupuisa okuti, ka tatekiwa
Volonjila muna okuti ovolu aye lalimue eteke a pitilemo.
4 Owu upange welie? Helie wa ci linga,
Poku kovonga ovitumbulukila tunde kefetikilo?
5 Ovifuka via ci mola kuenda via kuata usumba.
Asulilo o kilu lieve a fetika oku luluma.
Omanu va liongoluila pamosi ovo muẽle.
6 Omunu lomunu o kuatisa ekamba liaye
Kuenda o sapuila manjaye hati: “Pama.”
7 Omo liaco, omesele yi kolisa ukuakutela utale;+
Una o lemulũla lomatelo yonjundo
O kolisa ukuavo o kasi oku lemulũla utale.
Eye o popia eci catiamẽla kocina ca teliwa hati: “Ci kasi ciwa.”
Kuenje ci valeliwa lolopeleko oco ka ci ka kupuke.
8 “Pole, ove A Isareli, wukuenje wange,+
Ove A Yakoba, acitumbulukila* ca Avirahama ekamba liange,+
Ove una ame nda nõla,+
9 Ove una ame nda nena oku upisa kasulilo o kilu lieve,+
Kuenda ove una nda kovonga oku upisa kolonepa vi kasi ocipãla.
10 Ku ka kuate usumba momo ndi kasi love.+
Ku ka sakalale momo ndi Suku yove.+
Ndi ka ku kolisa, ocili, ndi ka ku kuatisa,+
Ndi ka ku kuata muẽle leka liange liondio liesunga.’
11 Tala! Vosi vana va ku kuetele onyeño va ka kutisiwa osõi loku lavisiwa.+
Vana va liyaka love va ka imũha kuenda va ka nyõliwa.+
12 Ove o ka sandiliya alume vana va liyaka love, pole, ku ka va sanga;
Alume va linga love uyaki va ka kala ndocina cimue caño, ka ci kuete esilivilo.+
13 Momo ame ndi Yehova Suku yove, ndi kuata eka liove liondio,
Una o popia kokuove hati: ‘Ku ka kuate usumba ndu ku kuatisa.’+
14 Ku ka kuate usumba ove anyo* Yakoba,+
Ene amanu va Isareli, ndi ka vu kuatisi,” oco Yehova a popia, Onjovoli yene,+ Una o Kola wa Isareli.
15 “Tala! Hu lingisa omakina yimue yoku sasa,+
Omakina yimue yokaliye yoku sasa yi kuete ovayo.
Ove o ka liata olomunda kuenda o ka vi nyanyõla
Kuenje oviwulu vi ka linga ndinene.
16 Ove o ka vimba vilu,
Kuenda ofela yi ka vi ambata;
Ehunguhungu limue liofela li ka vi sandula.
17 “Osuke kuenda ohukũi va kasi oku sandiliya ovava kuenda ka va a sangi.
Elimi liavo lia kukuta omo lienyona.+
Ame ndi Yehova ndi ka va tambulula.+
Ame ndi Suku ya va Isareli, si ka va yanduluka.+
18 Ndi ka lingisa okuti, koviwulu ka kuli ovikũla ku kala olondui.+
Kuenda vovimbota via tapika mu ka kala olono viovava.+
Ekalasoko ndi ka li lingisa ociva ceyuka olondeya
Kuenje vofeka yina ka muli ovava mu ka kala olono viovava.+
19 Vekalasoko ndi ka kũlamo uti wosedru,
Uti wositimi, uti wusombo kuenda uti wulela.+
Vetapi lio vekalasoko ndi ka kũlamo uti wongaye,
Kumue luti wocinendele kuenda uti wusombo,+
20 Oco omanu vosi va ci mole loku ci kũlĩha
Kuenda oku yevelela lutate loku kuata elomboloko
Okuti eka lia Yehova lia ci linga,
Kuenda Una o Kola wa Isareli eye wa ci lulika.”+
21 “Sapuli ocitangi cene,” oco Yehova a popia.
“Lombololi ovisimĩlo viene,” oco Soma ya Yakoba a popia.
22 “Lombololi esunga liaco kuenda tu sapuili ovina vi ka pita.
Tu sapuili ovina viosimbu,*
Oco tu sokolole kovina viaco* kuenda oku kũlĩha onima yaco.
Ale tu situluili ovina vi keya.+
23 Tu sapuili eci ci ka pita kovaso yoloneke,
Oco tu kũlĩhe okuti ene vulosuku.+
Ocili, lingi ocina cimue ciwa ale cĩvi,
Oco okuti poku ci mola tu komõha.+
24 Tali! Ene vucina cimue caño,
Kuenda ovina vu linga ka vi kuete esilivilo.+
Wosi una o nõla oku vu fendeli o suvukiwa.+
25 Nda votola umue oku upisa konano kuenje eye o keya,+
Umue wo kutundilo wekumbi,+ o ka vilikiya onduko yange.
26 Helie wa ci popia tunde kefetikilo, oco tu ci kũlĩhe,
Ale oku upisa koloneke viosimbu oco tu popie tuti: ‘Eye o kuete esunga’?+
Ocili okuti, lomue wa ci sandeka!
Lomue wa ci situlula!
Lomue wa yeva cimue catiamẽla kokuene!”+
27 Ame tete nda sapuila o Siono hati: “Tala ovina vi ka pita!”+
Kuenda ndi ka tuma ko Yerusalãi onumiwa yimue yolondaka viwa.+
28 Pole, nda vanja kuenda ka kua kaile laumue;
Ka kua kaile laumue pokati kavo, oco a ece elungulo.
Kuenje ndamamako oku va pinga oco va tambulule.
29 Tali! Vosi yavo ocina cimue cesanda.
Ovopange avo ka a kuete esilivilo.
Oviñumañuma viavo viutale ofela yaño kuenda ka vi silivila.+