Isaya
37 Eci Soma Hesekiya a ci yeva, wa tola uwalo waye kuenda wa wala ocikelẽyi kuenje wa iñila vonjo ya Yehova.+ 2 Noke eye wa tuma Eliakimi una wa kala kalei konjo,* la Sievena usonehi kuenda asongui vovitunda vana va wala ocikelẽyi oco va ende kuprofeto Isaya+ omõla a Amose. 3 Ovo vo sapuila vati: “Ca popia Hesekiya ceci hati: ‘Etaili eteke liohali, lioku pisa* kuenda lioku kutisiwa osõi; ndeci omõla o laika oku citiwa,* pole, inaco ka kuete ongusu yoku cita.+ 4 Pamue Yehova Suku yove o ka yevelela olondaka viosi via Ravesiake, una wa tumiwa la ñala yaye soma yo Asuria oco a sanumũle Suku o kasi lomuenyo+ kuenda eye o ko fetuluinya omo liolondaka Yehova Suku yove a yeva. Omo liaco, likutililako+ vana va supapo okuti va puluka.’”+
5 Noke akuenje va Soma Hesekiya va enda ku Isaya,+ 6 kuenje Isaya wa va sapuila hati: “Eci vu ka sapuila ñala yene ceci hati: ‘Ca popia Yehova ceci hati: “Ku ka kuate usumba+ omo liolondaka wa yeva, vina oloñuatisi via soma yo Asuria+ via nondaila lavio. 7 Ndi kapa vutima waye* ocisimĩlo cimue kuenda eye o ka yeva ulandu umue kuenje o ka tiukila vofeka yaye;+ ndi lingisa okuti, eye o ka pondiwa losipata vofeka yaye muẽle.”’”+
8 Eci Ravesiake a yeva okuti, soma yo Asuria wa tunda ko Lakisi, eye wa tiukila kokuaye kuenje wa sanga okuti o kasi oku linga uyaki vimbo lio Livina.+ 9 Soma wa yeva eci ca popiwa catiamẽla ku Tirihaka Soma yo Etiopia hati: “Eye weya oku liyaka love.” Eci eye a ci yeva, wa tuma vali olomunga ku Hesekiya+ poku popia hati: 10 “Eci oco vu sukila oku sapuila Hesekiya Soma yo Yuda hati: ‘Ku ka ecelele okuti Suku yove una wa kolela o ku kemba lolondaka viokuti: “O Yerusalãi ka yi ka eciwa peka lia soma yo Asuria.”+ 11 Tala! Ove wa yeva eci olosoma vio Asuria via linga lolofeka viosi poku vi kundula.+ Anga hẽ ove lika o ka popeliwa? 12 Anga hẽ olosuku violofeka via kunduiwa la vakukululu yange via va popela?+ O Gosane, lo Harane,+ lo Recefe kuenda omanu vo ko Edene vana va kala ko Telasare, pi va kasi? 13 Soma yo Hamati, la soma yo Aripade kuenda soma yalupale o ko Sefariwayi,+ la soma yo Hena kuenda yo Iwa, pi vi kasi?’”
14 Hesekiya wa tambula ovikanda peka liolomunga kuenda wa vi tanga. Noke Hesekiya wa lamanela konjo ya Yehova kuenda wa vi nyanyumuĩla kovaso a Yehova.+ 15 Hesekiya wa fetika oku likutilila ku Yehova+ loku popia hati: 16 “A Yehova ukualohoka,+ Suku ya Isareli, wa tumãla kocalo cove kilu* lia va keruvi, ove lika Suku yocili pokati kolosoma viosi vio kilu lieve. Ove wa lulika ovailu longongo. 17 A Yehova, mange ohenda, yevelela lutate!+ Petula ovaso ove, A Yehova kuenda tala!+ Yevelela olondaka viosi Senakeriva a tuma oco a sanumũle Suku o kasi lomuenyo.+ 18 A Yehova, ocili okuti, olosoma vio Asuria via kundula olofeka viosi+ oku kongelamo imbo liavo muẽle. 19 Ovio via imba olosuku viavo vondalu,+ momo ka via kaile olosuku viocili, via kala upange wovaka omanu+ okuti, avaya kuenda ovawe. Eli olio esunga lieci ovio via tẽlela oku vi nyõla. 20 Pole, cilo, A Yehova Suku yetu, linga ohenda tu popele peka liaye, oco olosoma viosi vio kilu lieve vi limbuke okuti, ove lika Suku, A Yehova.”+
21 Isaya omõla a Amose wa tuma esapulo ku Hesekiya liokuti: “Ca popia Yehova Suku ya Isareli ceci hati: ‘Omo okuti ove wa likutilila kokuange catiamẽla ku Senakeriva Soma yo Asuria,+ 22 eyi oyo ondaka Yehova a popia yatiamẽla kokuaye yokuti:
“Ufeko wosombo okuti omõla a Siono, o ku pembula loku ku yola epembe.
Omõla ufeko a Yerusalãi o puka puka kutue kovaso ove.
23 Helie ove wa sanumũla+ loku popia atonãi?
Helie wa kalukila,+
Loku piekulũila ovaso ove?
Ove wa ci linga ku Una o Kola wa Isareli!+
24 Pocakati cakuenje vove, wa sanumũla Yehova+ loku popia hati:
Ndi ka teta oviti vialio visõvi viosedru, loviti vialio viongaye.
Ndi ka iñila vovitililo vialio vi kasi ocipãla kuenda vovisenge vialio.
25 Ndi ka fẽla ovisimo kuenda ndi ka nyua ovava;
Lolomãhi viange ndi ka kukutisa olondui* viosi viovava vio Kegito.’
26 Ove kua ci yevele? Eci ca sokiyiwa* ale osimbu.
Ame nda ci pongiya* ale tunde koloneke via pita.+
Kaliye ndi ci tẽlisa.+
Alupale a kuete oviteyuilo, ove o ka a pongolola alunda ovingululu.+
27 Olonungi viaco, vi ka yandulukiwa;
Vi ka sakalala kuenda vi ka kutisiwa osõi.
Vi ka kala ndovikũla viovapia kuenda ndowangu u talala,
Ndowangu u kulila kolusoka kuenje u kukuta lofela yo kutundilo.
28 Pole, nda kũlĩha ciwa eci o tumãla, leci o tunda kuenda eci iñila,+
Nda kũlĩhavo eci o ñuetele onyeño,+
29 Momo onyeño o ñuetele+ kuenda esakalalo liove lia pitĩla kovatũi ange.+
Omo liaco, ndi kapa onjolo yange venyulu liove kuenda olelia yange+ ndi yi kapa vomẽla wove,
Kuenda ame ndi ka ku tiuwiya vonjila yimuamue weya layo.”
30 “‘Ondimbukiso yove* yeyi: Unyamo ulo vu ka lia evi vi litundila;* kuenda kunyamo wavali vu ka lia olomema vina via tundilamo; pole, kunyamo watatu, vu ka kũla ombuto loku ungula kuenda vu ka kũla oviti viayuva loku lia apako aco.+ 31 Vana va puluka konjo ya Yuda okuti, vana va supapo va ka kuata olombombo+ posi loku ima apako kovianja. 32 Momo vo Yerusalãi mu ka tunda ava va supapo kuenda Komunda Siono ku tunda ava va puluka.+ Ombili ya Yehova ukualohoka yi ka ci linga.+
33 “‘Omo liaco, ca popia Yehova catiamẽla ku soma yo Asuria+ ceci hati:
“Eye ka ka iñila volupale lulo,+
Ale oku asamo usongo,
Pamue oku yakelamo lociyepelo,
Ale oku kapamo ocilamanelo cimue cuyaki.”’+
34 ‘Eye o ka tiukila vonjila eya layo;
Eye ka ka iñila volupale lulo,’ oco Yehova a popia.
35 ‘Ame ndi ka teyuila+ loku popela olupale lulo mekonda liange muẽle+
Kuenda mekonda liukuenje wange Daviti.’”+
36 Kuenje ungelo wa Yehova wa katuka kuenda wa ponda 185.000 kalume vocilombo ca va Asuria. Eci omanu va pasuka selo komẽle, va mola ovivimbi viosi.+ 37 Kuenje Senakeriva Soma yo Asuria wa tundako loku tiukila ko Ninivei+ kuenda oko a kala.+ 38 Osimbu a kekama vonjo* yosuku yaye Nisirote, omãla vaye Adirameleke la Siarecere, vo ponda losipata+ kuenda va tilila kofeka yo Ararate.+ Kuenje omõlaye Esarihadono+ wa linga osoma pomangu yaye.