Yovi
2 Noke kueya eteke eci omãla va Suku yocili*+ va iñila loku talama kovaso a Yehova+ kuenda Satana wa iñilavo pokati kavo oco a talame kovaso a Yehova.+
2 Kuenje Yehova wa pula Satana hati: “Pi o tundilila?” Satana wa kumbulula Yehova hati: “Nundilila koku ñuala ñuala kilu lieve loku endelamo.”+ 3 Yehova wa sapuila Satana hati: “Ove hẽ wa limbuka* ukuenje wange Yovi? Ka kuli omunu wa lisoka laye kilu lieve. Eye wa suñama kuenda ukuesunga,*+ wa sumbila Suku kuenda o yuvula eci cĩvi. Eye handi o kasi oku amamako oku kakatela kesunga liaye,+ pole, ove o ndi vetiya oku u katukila+ loku u kundula,* ndaño ka kuli esunga lioku ci linga.” 4 Pole, Satana wa tambulula Yehova hati: “Ekova lekova. Omunu o ka eca cosi a kuete oco a teyuile omuenyo waye. 5 Pole, olõla eka liove, veta vekepa liaye kuenda vetimba liaye kuenje o mola okuti, eye o ka ku siñala kovaso yove.”+
6 Kuenje Yehova wa sapuila Satana hati: “Tala! Eye o kasi peka liove! Pole, ku ko upe omuenyo waye!” 7 Omo liaco, Satana wa tunda kovaso a Yehova kuenda wa veta Yovi lolombumbu*+ vi vala calua tunde kolomãhi toke ponumbutue. 8 Kuenje Yovi wa tikula ocimuanyũila cotuma oco a lisuye laco kuenda wa tumãla pokati katiko.+
9 Oku sulako, ukãi waye wo sapuila hati: “Ove handi amamako oku kakatela kesunga liove? Siñala Suku kuenje fa!” 10 Pole, Yovi wo sapuila hati: “Ove o kasi oku vangula ndukãi umue ka kuete olondunge. Anga hẽ tu tava lika eci ciwa ci tunda ku Suku yocili okuti, ka tu tavavo eci cĩvi?”+ Kovina viosi evi, Yovi ka lingile ekandu lomẽla waye.+
11 Akamba vatatu va Yovi va yeva eci catiamẽla kovitangi viosi eye a kala oku liyaka lavio kuenda omunu lomunu wa tunda vimbo liaye muẽle okuti, Elifasi+ u Temani, Bilidade+ u Siuhi+ kuenda Sofare+ u Namati. Ovo va likunda oco va lisange loku enda oku ka lembeleka Yovi kuenda oku lekisa ohenda yavo kokuaye. 12 Eci vo muila ocipãla, ka vo limbukile. Ovo va fetika oku lila lolukandi, oku tola ovowalo avo loku imba oneketela vilu kuenda kovitue viavo.+ 13 Noke va tumãla laye posi vokuenda kueci ci soka epanduvali kovotanya kuenda epanduvali kovoteke. Lomue wo sapuila ondaka yimue, momo va mola okuti, evalo liaye lialuile calua.+