Yeremiya

52 Sedekiya+ wa kuata 21 kanyamo eci a linga osoma kuenda wa viala 11 kanyamo ko Yerusalãi. Onduko ya inaye ya kala Hamutala+ omõla ukãi wa Yeremiya wo ko Livina. 2 Eye wamamako oku linga eci cĩvi kovaso a Yehova, ndomo ci likuata lovina viosi Yehoyakimi a lingile.+ 3 Ovina evi via pita vo Yerusalãi kuenda vo Yuda omo lionyeño ya Yehova toke eci eye a va tundisa kovaso yaye.+ Kuenje Sedekiya wa sinĩla soma yo Bavulono.+ 4 Kunyamo wecea wuviali wa Sedekiya, kosãi yekũi, keteke liekũi liosãi, Soma Nevukandesa wo Bavulono weya lolohoka viaye viosi oco a katukile o Yerusalãi. Ovo va tunga ocilombo oco va yi katukile kuenda va tunga ocimbaka cimue kolonele vialio viosi.+ 5 Kuenje olupale lua ñualiwa ocingonja toke kunyamo 11 wa Soma Sedekiya.

6 Kosãi yakuãla, keteke liecea liosãi,+ onjala ya luile calua volupale kuenje omanu vo vofeka ka va kuatele okulia.+ 7 Oku sulako, va tuiya epangu limue vocimbaka colupale kuenje asualali vosi va tila, va tunda volupale luteke poku pita pombundi yi kasi pokati kovimbaka vivali, ocipepi locumbo ca soma osimbu va Kaldea va ñualele olupale; kuenje ovo vamamako vonjila yo Araba.+ 8 Pole, olohoka via va Kaldea via landula soma Sedekiya kuenje vio kuatela+ vanyãla o vekalasoko lio Yeriko kuenda asualali vaye vosi va tunda konele yaye kuenje va sanduiwa. 9 Noke ovo va kuata soma kuenda vo nena ku soma yo Bavulono ko Rivila kofeka yo Hamati kuenje eye wo sombisa. 10 Kuenje soma yo Bavulono wa pondela omãla va Sedekiya kovaso aye kuenda wa pondavo olombuale viosi vio Yuda ko Rivila. 11 Noke soma yo Bavulono wa tofola ovaso a Sedekiya,+ wo kuta lalienge osipi, wo tuala ko Bavulono kuenje wo kapa vokayike toke keteke lioku fa kuaye.

12 Kosãi yatãlo, keteke liekũi yosãi okuti, kunyamo 19 wa Soma Nevukandesa soma yo Bavulono, Nevusaradana usongui wolondavululi una wa kala oñuatisi ya soma yo Bavulono, wa iñila vo Yerusalãi.+ 13 Eye wa timĩha onjo ya Yehova,+ lonjo* ya soma kuenda olonjo viosi vio Yerusalãi; eye wa timĩhavo olonjo viosi vinene. 14 Ovimbaka vina via ñualele o Yerusalãi, via kupuiwa lolohoka viosi via va Kaldea vina via kala lusongui wolondavululi.+

15 Nevusaradana usongui wolondavululi, wambata kumandekua vamue pokati komanu olosuke kuenda omanu va supilepo vana va siwa volupale. Eye wambatavo vana va tiamẽlele konele ya soma yo Bavulono kuenda olomesele via loñoloha vina via supilepo.+ 16 Pole, Nevusaradana usongui wolondavululi, wa sia vamue pokati komanu olohukũipo vali vo vofeka, oco va talavaye vocumbo cayuva loku linga upange wa tĩla.+

17 Kuenje va Kaldea va nyanyõla olongunji viosipi+ vionjo ya Yehova kuenda otuakãlu+ lombasiya yinene yovava yosipi yi tukuiwa okuti, Okalunga,+ vina via kala vonjo ya Yehova kuenje vambata osipi yosi ko Bavulono.+ 18 Ovo vambatavo ovikuata viatiko, olopa, ovikuata vioku teta omutusila, atiyela,+ olokopo+ kuenda ovikuata viosi viosipi va enda oku talavaya lavio kupange wonembele. 19 Usongui wolondavululi wambata olombasiya,+ oviyukilo viondalu, atiyela, ovikuata viatiko, oviyekelo violondiyelo,+ olokopo, latiyela ana a kala wulu wa fina kuenda opalata.+ 20 Catiamẽla kolongunji vivali, kombasiya yinene yovava yi tukuiwa okuti, Okalunga,+ kolongombe vi soka 12 viosipi vina via kala vemẽhi Liokalunga kuenda kotuakãlu tuna Soma Salomone a pangela onjo ya Yehova, osipi yovikuata viaco viosi, ka ca tavele oku yi pesalisa.

21 Catiamẽla kolongunji, ongunji longunji ya kuatele 18 kovikeya* koku lepa kuenda ukolo umue woku yonga wa kuatele 12 kovikeya, wa ponduile oku yi ñuala;+ upamo walio wa lisokele lovimuine vikuãla* kuenda vokati kayo ka mua kaile lacimue. 22 Utue wongunji wa kala wosipi; kuenje oku lepa kutue umosi wongunji kua kala kuovikeya vitãlo;+ owanda kuenda olo romã viosi vina via ñuala kutue, viosi via pangiwile losipi. Ongunji yavali ya lisokele lalio oku kongelamo olo romã. 23 Kua kala 96 kolo romã konele yo kosamua; vo cosi, kua kala 100 kolo romã via ñualele owanda.+

24 Usongui wolondavululi wambatavo Seraya+ ocitunda ca velapo, Sofoniya+ ocitunda cavali kuenda vakualombundi va soka vatatu.+ 25 Kuenje eye wopa volupale kesongo umue welombe wa kala usongui wasualali, olondunguli epanduvali via soma vina via sangiwa volupale, oku kongelamo usonehi wusongui wolohoka, una wa enda oku konga omanu vo vofeka kovita kuenda 60 kalume vomanu vaño vo vofeka vana okuti, handi va sangiwile volupale. 26 Nevusaradana usongui wolondavululi, wa vambata kuenje wa va tuala ku soma yo Bavulono ko Rivila. 27 Soma yo Bavulono wa va lemẽha kuenje wa va pondela vo Rivila+ vofeka yo Hamati. Pole, Yuda wambatiwa kumandekua oku tunda vofeka yaye.+

28 Omanu vana Nevukandesa ambata kumandekua vava: Kunyamo wepanduvali, 3.023 va Yudea.+

29 Kunyamo 18 wa Nevukandesa,+ 832 komanu vopiwa vo Yerusalãi.

30 Kunyamo 23 wa Nevukandesa, Nevusaradana usongui wolondavululi, wambata va Yudea kumandekua okuti, 745 komanu.+

Vo cosi, ci soka 4.600 komanu vambatiwa kumandekua.

31 Noke kunyamo 37 wumandekua wa Soma Yehoyakini+ wo ko Yuda, kosãi 12 keteke 25 yosãi, Soma Evile-Merodake wo ko Bavulono, kunyamo a linga osoma, wa yovola* Soma Yehoyakini wo ko Yuda kuenje wo upa vokayike.+ 32 Eye wa vangula laye lohenda kuenda wo kapa kocalo ca velapo okuti, ovialo violosoma vikuavo vina via kala laye ko Bavulono vi sule. 33 Omo liaco, Yehoyakini wa lula uwalo waye wo vokayike kuenje olonjanja viosi wa lia lia komesa ya soma oloneke viosi viomuenyo waye. 34 Eye wa enda oku tambula olonjanja viosi okulia kua enda oku tunda ku soma yo Bavulono, eteke leteke, toke keteke liolofa viaye okuti, oloneke viosi viomuenyo waye.