Esekiele
27 Ondaka ya Yehova yeya vali kokuange yiti: 2 “A mõlomunu, imba ocisungo cimue celisiõsuĩlo* catiamẽla ko Turo,+ 3 kuenda sapuila o Turo hati:
‘Ove wa tunga koku iñilila kuokalunga,
Haive wukualomĩlu viomanu vo vovifuka vialua,
Ca popia Ñala Tõlo Yehova ceci hati:
“A Turo, ove muẽle wa popia hati: ‘Nda lipua keposo.’+
4 Ovikanjo viove vi kasi vokati kokalunga,
Kuenda olonungi viove via siata oku mioñolola eposo liove.
5 Ovo va panga avaya ove osi loviti viongaye vio ko Senire,+
Kuenda va tikula osedru ko Levanone oco va ku pangeleko ongunji yimue.
6 Ovo va linga ovipando viove lulemba wo ko Basiane,
Kuenda onepa yove yo kovaso ya kala yevaya liusombo wa posuisiwa lombinga yonjamba yo ko Kitimi.+
7 Ovalatanya yi kuete avala alua yo ko Egito ya kala onanga yove yoku ku songuila,
Kuenda olombalaka viove vieposo via kuata evala li tekãvelua kuenda eli li vumbula liovifuka vio ko Elisa.+
8 Olonungi vio ko Sidono levi vio ko Arewada+ ovio via kala atapi ove.
Alume vove va loñoloha, A Turo, va kala vakuanaviyu yove.+
9 Vakualondunge* kuenda alume va loñoloha vo ko Gevale+ va enda oku sitika awato ove oco ka a ka tose.+
Olonaviyu viosi vio vokalunga kuenda vakuanaviyu va enda oku iya kokuove oco va linge olomĩlu.
10 Alume vo ko Persia, vo ko Ludu kuenda vo ko Puti,+ va kala pokati kasualali vove okuti, alume vove vuyaki.
Ovo va pateka oviyepelo viavo kuenda ovikoko kokuove kuenje va ku nenela esivayo.
11 Alume vo ko Arewada vana va kala pokati kolohoka viove, va kala kolonele viovimbaka viove viosi,
Kuenje alume va pama va kala oku lava olosapalalo viove
Ovo va pateka oviyepelo kolonele viosi viovimbaka viove
Kuenda va mioñolola eposo liove.
12 “‘“Tarsisi+ wa linga olomĩlu love omo liovokuasi ove alua.+ Eye wa enda oku tolokala opalata, utale, o estanyu* kuenda osumbu omo liovina viove.+ 13 Yavane, Tuvale+ kuenda Meseke+ va linga olomĩlu love poku tolokala apika+ kuenda ovikuata viosipi omo liolomĩlu viove. 14 Vakuepata lia Togarma+ va enda oku tolokala olokavalu kuenda omula omo liovina viove. 15 Omanu vo ko Dedane+ va linga olomĩlu love; ove wa enda oku eca upange ku vakualomĩlu kovifuka vialua; ovo va eca olombinga vionjamba+ kuenda oviti vi tekãvelua ndofeto yove. 16 Edome wa linga olomĩlu love omo liovina viove vialua. Ovo va eca o turkesa, alinya ohusu, olonanga via tutiwa, onanga yovalatanya, olo koral kuenda ewe lio rubi omo lioku tolokala lovina viove.
17 “‘“O Yuda kuenda ofeka yo Isareli va linga olomĩlu love, poku eca otiliku yo ko Miniti,+ okulia kua velapo, owiki,+ ulela+ kuenda onguendu omo lioku tolokala lovina viove.+
18 “‘“O Damasko+ ya linga olomĩlu love omo liovina viove vialua kuenda ovokuasi ove osi, poku tolokala lovinyu yo ko Helebone kuenda ovonya o ko Sahara.* 19 Vedana kuenda Yavane vo ko Usale va eca utale wa yenguluiwa kuenda o kasia* kuenda o kalamu* omo lioku tolokala lovina viove. 20 Dedane+ wa ku ĩha ovowalo oku kapa volonyima viovinyama* oco a tolokale lolomĩlu viove. 21 Ove wa enda oku eca upange ku va Arabia kuenda kasongui vosi vo ko Kedare+ vana va kala oku linga olomĩlu viotulomeme, viovitupi violomeme kuenda violohombo.+ 22 Vakualomĩlu vo ko Sieva kuenda vo ko Raama+ va linga olomĩlu love; ovo va eca onguendu yosi ya velelepo yelemba liwa, ovawe a tĩla kuenda ulu oco va tolokale lovina viove.+ 23 Harane,+ Kane la Edene+ vakualomĩlu vio ko Sieva+ ko Asiure+ kuenda ko Kilumade va linga olomĩlu love. 24 Povitanda viove, ovo va enda oku landisa ovowalo a posoka, ovikutu viavala a tekãvelua kuenda olonanga via tutiwa, atapete avala alitepa okuti, viosi via kutiwa ciwa lovikolo.
25 Olonaviyu vio ko Tarsisi+ via enda oku ambata olomĩlu viove,
Omo liaco, ove wa yukisiwa* kuenda wa kapiwa ocilemo vokati kokalunga.
26 Alume vove vakuakutapula va ku ambata vakimba alua okalunga;
Ofela yo kutundilo ya ku nyõlela vokati kokalunga.
27 Ukuasi wove, ovikuata viove, olomĩlu viove, vakuanaviyu kuenda asongui vonaviyu,
Vana okuti, va enda oku sitika awato ove oco ka a ka tose, vana va enda oku linga olomĩlu viove+ kuenda alume vosi vuyaki+
Lomanu* vosi va kasi love
Vosi yavo va ka vombela vokati kokalunga keteke lioku nyõleha kuove.+
28 Eci alume vove vakuanaviyu va ka liyula, olofeka vi kasi kohulo vi ka luluma.
29 Alume vosi vakuakutapula, vakuanaviyu, vakuoloño wokalunga
Va ka loka volonaviyu viavo kuenda oku kala kongongo.
30 Ovo va ka kaluka loku litetela kualua mekonda liove+
Osimbu va imba oneketela kovitue viavo loku li tiñolola vetiko.
31 Ovo va ka li pemũla asenya kuenda va ka wala ovikelẽyi;
Va ka lila lesumuo lialua mekonda liove loku lisiõsiõla kualua.
32 Velisiõsuĩlo liavo, va ka imba ocisungo cimue cesumuo catiamẽla kokuove vati:
‘Helie wa soka nda Turo okuti, cilo wõha vokati kokalunga?+
33 Eci ovikuata viove via tunda vokalunga, ove wa kuatisa omanu valua.+
Ukuasi wove walua kuenda olomĩlu viove via lingisa olosoma oku kala olohuasi.+
34 Cilo, ove wa nyõlehela valondo okalunga okuti vovava a longa,+
Kuenda olomĩlu viove viosi kumue lomanu vove vosi va vomba kumue love.+
35 Olonungi viosi viovifuka vi ka vanja kokuove loku komõha,+
Olosoma viavo vi ka luluma lusumba walua+ kuenje usumba waco u ka limbukiwa kovipala viavo.
36 Vakualomĩlu pokati kolofeka va ka ku vanja lesepu omo liovina via pita love.
Esulilo liove li keya ocipikipiki kuenda li ka koka usumba,
Kuenje ove ku ka kalako vali otembo yosi.’”’”+