Isaya
58 Eye wa ndi sapuila hati: “Vilikiya lolukandi; ku ka likandangiye!
Votola ondaka yove ndolumbeta.
Sapuila komanu vange esino liavo,+
Konjo ya Yakoba akandu avo.
2 Ovo va ndi sandiliya eteke olio eteke,
Kuenda va popia okuti, va sanjukila oku kũlĩha olonjila viange,
Ndu okuti ovo ofeka yimue ya linga esunga
Kuenda ka va silepo esunga lia Suku yavo.+
Ovo va minga asombiso esunga
Loku sanjukila oku amela ku Suku:+
3 ‘Momo lie ku muĩla eci tu likandangiya oku lia?+
Momo lie ku limbukila eci tu liketisa etu muẽle?’+
Momo keteke lioku likandangiya kuene oku lia, vu sandi olonjongole* viene muẽle,
Kuenda vu kangisi olonalavayi viene.+
4 Oku likandangiya kuene oku lia ku sulila koku lihoya kuenda koku liyaka,
Kuenda vu li tipula lungangala omunu lukuavo.
Ene ka vu pondola oku likandangiya oku lia ndeci vu linga etaili, loku lavoka okuti ondaka yene yi yeviwa kilu.
5 Anga hẽ oku likandangiya oku lia ndi sanjukila, ku sukila hẽ oku kala
Ndeteke limue okuti omunu o likangisa eye muẽle,
Loku petamisa utue waye ndoluneva,
Kuenda oku liyala pocikelẽyi lo vetiko?
Eci hẽ oco vu tukula okuti oku likandangiya oku lia kuenda eteke liesanju ku Yehova?
6 Sio. Oku likandangiya oku lia ndi sanjukila kuoku:
Oku kutulula alienge evĩho,+
Oku kutulula ovikolo viokanga,+
Oku yovola vana va talisiwa ohali
Kuenda oku teya okanga yosi pokati;
7 Oku tepelako ombolo yove ku una o kasi lonjala,+
Oku tambula vonjo yove olohukũi kuenda vana ka va kuete ocitumãlo coku kala,
Oku eca uwalo ku una o lete okuti o kasi epõlõla,+
Kuenda oku yuvula oku imba onyima ku vamanjove.
8 Kuenje ocinyi cove ci ka nina ndoku ca kuomẽle,+
Kuenda oku kaya kuove ku iya lonjanga.
Esunga liove li ka kala kovaso yove,
Kuenda ulamba wa Yehova u ka kala konyima yove.+
9 Kuenje ove o ka vilikiya kuenda Yehova o ka ku tambulula;
O ka kaluka oku pinga ekuatiso kuenje eye o ka tambulula hati: ‘Ame ulo!’
Nda ove wopa pokati kove okanga
Loku liwekapo oku ilika omuine wove kuenda oku popia ovina vĩvi,+
10 Nda weca ku o kasi onjala eci ove muẽle o sukilavo+
Loku tekula vana va suka,
Ocinyi cove ci ka nina ndaño muẽle vowelema,
Kuenje owelema wove u ka kala ndekumbi pongunji.+
11 Yehova olonjanja viosi o ka ku songuila
Kuenda o ka ku tekula ndaño ceci o kala vofeka yimue yekango;+
Eye o ka kolisa akepa ove,
Kuenda ove o ka kala ndocumbo cimue colonelẽho ca tapeliwa ciwa,+
Ndono yimue okuti, ovava aco lalimue eteke a takata.
12 Ovingululu viosimbu vi ka tumbuluiwa mekonda liove,+
Kuenda ove o ka tumbulula oviseveto viovitumbulukila viosimbu.+
13 Nda wa lava Esambata loku likandangiya oku linga ovina viove muẽle keteke liange li kola,+
Nda ove o tukula Esambata okuti eteke limue liesanju lialua, eteke li kola ku Yehova, eteke limue lioku sivayiwa,+
Kuenda nda wa sivaya eteke liaco okuti, ku sandi ovina viove muẽle loku vangula olondaka viaño,
14 Ove o ka sanga esanju lialua ku Yehova,
Kuenje ndi ka ku lingisa okuti, endela kokavalu kovitumãlo via lepa vio kilu lieve.+