Yeremiya
43 Eci Yeremiya a mala oku vangula lomanu vosi olondaka viosi evi via Yehova Suku yavo okuti, ondaka yosi yina Yehova Suku yavo o tumile oku va sapuila, 2 Asariya omõla a Hosiaya, Yohanana+ omõla a Karea kuenda alume vosi vakuepela, va sapuila Yeremiya vati: “Eci o kasi oku popia uhembi! Yehova Suku yetu ka ku tumile oco o popie hati: ‘Ko ka endi Kegito oku ka tungako.’ 3 Pole, Baruke+ omõla a Neriya eye o kasi oku ku sosuiya oco o vangule lonjila ndeyi momo eye o yongola okuti, tu kupukila povaka a va Kaldea oco tu pondiwe ale oku ambatiwa ko Bavulono kumandekua.”+
4 Omo liaco, Yohanana omõla a Karea kuenda asongui vosi volohoka kumue lomanu vosi, va sinĩla ondaka ya Yehova yoku amamako oku kala vofeka yo Yuda. 5 Handi vali, Yohanana omõla a Karea kuenda asongui vosi volohoka, vambata ocisupe cosi co ko Yuda cina ca tiukile oco ci tunge vofeka yo Yuda oku tunda kolofeka viosi kuna ca sanduiwile.+ 6 Ovo vambata alume, akãi, omãla, omãla vakãi va soma kuenda omanu vosi vana Nevusaradana+ usongui wolondavululi a sile la Gedaliya+ omõla a Ahikama+ omõla a Siafane,+ vambatavo uprofeto Yeremiya la Baruke omõla a Neriya. 7 Ovo va enda vofeka Yegito momo ka va pokuile kondaka ya Yehova kuenda va enda toke ko Tafanese.+
8 Noke ondaka ya Yehova yeya ku Yeremiya vo Tafanese yiti: 9 “Kuata peka liove ovawe anene kuenje a soleka posi ya pangiwa latisolu, yi kasi puvelo wonjo ya Fareo ko Tafanese kuenda a sitika locikokoto kovaso yalume va Yudea. 10 Kuenje va sapuila hati: ‘Ca popia Yehova ukualohoka Suku ya Isareli ceci hati: “Ñasi oku kovonga Nevukandesa soma yo Bavulono, ukuenje wange+ kuenda ndi ka kapa ocalo caye kilu liovawe a-a nda soleka kuenje eye o ka tumbika ombalaka yaye yusoma kilu liao.+ 11 Eye o keya kuenda o ka katukila ofeka Yegito.+ Wosi o sesamẽla oku fa luvei u ponda, o ka fa luvei, wosi o sesamẽla oku ambatiwa kumandekua o kambatiwa kumandekua kuenda wosi o sesamẽla oku fa losipata o ka fa losipata.+ 12 Kuenje ame ndi ka kapa ondalu kolonjo* violosuku vio Kegito kuenda eye o ka vi timĩha+ loku vi ambata kumandekua. Eye o ka li sikĩlĩla lofeka Yegito ndeci ungombo umue a li sikĩlĩla luwalo waye kuenje o ka tundako lombembua. 13 Kuenje eye o ka teya olongunji vio Bete-Siemese* vofeka Yegito kuenda o ka timĩha londalu olonjo* violosuku vio Kegito.”’”