Yeremiya
16 Ondaka ya Yehova yeya vali kokuange yiti: 2 “Ku ka kuele ukãi umue kuenda ku ka citile omãla valume lomãla vakãi vofeka yilo. 3 Momo ca popia Yehova catiamẽla komãla valume kuenda komãla vakãi vana va citiwila vofeka yilo leci catiamẽla ku va ina yavo kuenda ku va isiavo ceci hati: 4 ‘Ovo va ka fa omo liovovei a ponda,+ pole, lomue o ka va lila ale oku va kenda; va ka kala ndotulumu kilu lieve.+ Ovo va ka fa losipata kuenda onjala+ kuenje atimba avo, a ka kala okulia kuolonjila viovailu kuenda kuovinyama vio kilu lieve.’
5 Ca popia Yehova ceci hati:
‘Ku ka iñile vonjo yimue yonambi,
Kuenda ku ka endemo oco o lisiõsiõle ale oku lekisa esumuo.’+
‘Momo ndopa ombembua yange komanu ava,’ oco Yehova a popia,
‘Kumue locisola cange ka ci pongoloka kuenda ohenda.+
6 Ci kaile una unene ale una utito, vosi yavo va ka fila vofeka eyi.
Ovo ka va ka kendiwa,
Lomue o ka va lila,
Lomue o ka liteta eye muẽle ale oku lipemũla esenya omo liavo.*
7 Lomue o ka angiliyila okulia vana va kasi lesumuo,
Oco a va lembeleke omo liovivimbi viavo;
Ndaño muẽle oku eca kokuavo okopo yelembeleko
Oco va nyue omo lioku fisa isiavo ale ina yavo.
8 Handi vali, ku ka iñile vonjo yocipito
Oco o tumãle lavo, oku lia loku nyua.’
9 “Momo ca popia Yehova ukualohoka Suku ya Isareli ceci hati: ‘Pocitumãlo cilo, koloneke viene kuenda kovaso yene muẽle, ndi ka malako ovileñi vionjolela haivio viesanju, ondaka ya sandombua kuenda ondaka ya ndombua.’+
10 “Eci ove o sapuila omanu ava olondaka evi viosi, ovo va ka ku pula vati: ‘Momo lie Yehova a tukuila ohali yosi eyi yalua kokuetu? Ohole yipi kuenda ekandu lipi tua lingila Yehova Suku yetu?’+ 11 Ove o sukila oku va tambulula ndoco: ‘“Momo vakukululu yene va ndi yanduluka,”+ oco Yehova a popia, “kuenda vamamako oku kuama olosuku vikuavo loku vi vumba kuenda oku vi kekamẽla.+ Pole, ovo va ndi yanduluka kuenda ka va kapeleko ocihandeleko cange.+ 12 Ene wa piãlisi ovituwa viene okuti via vakukululu yene vi sule+ kuenda omunu lomunu pokati kene o kuãi esino liutima waye wa vĩha okuti, oku pokola kokuange hacoko.+ 13 Omo liaco, ndi ka vu tundisi kofeka yilo, oco wendi vofeka yimue okuti, ci kaile ene ale vakukululu yene ka wa yi kũlĩhĩli+ kuenje kofeka yaco vu ka vumba olosuku vikuavo utanya luteke,+ momo si ka lekisa ohenda kokuene.”’
14 “‘Pole, oloneke vi kasi oku iya,’ oco Yehova a popia, ‘eci ovo ka va ka popia vali vati: “Ndeci Yehova a kasi lomuenyo una wopa omanu va Isareli vofeka Yegito!”+ 15 pole, va ka popia vati: “Ndeci Yehova a kasi lomuenyo, una wopa omanu va Isareli oku upisa kofeka yo konano kuenda oku upisa kolofeka viosi kuna a va sanduilile!” kuenje ndi ka va nena vali vofeka yavo yina nda eca ku vakukululu yavo.’+
16 ‘Ñasi oku pañinya omanu valua vakuakupipa,’ oco Yehova a popia,
‘Kuenje ovo va ka va pipa.
Noke liovina viaco, ndi ka pañinya anyanga valua,
Kuenje ovo va ka va yeva kolomunda viosi lo koviwulu viosi
Kuenda valeva osi asenje.
17 Momo ovaso ange a lete ovina viosi ovo va kasi oku linga.*
Ovo ka va vundisiwile kovaso ange,
Ndaño akulueya avo ka kua vundisiwile kovaso yange.
18 Tete, ndi ka fetuluinya olumue akulueya avo kuenda ekandu liavo,+
Momo ovo va vĩhisa ofeka yange loviñumañuma ka vi kuete omuenyo* vioviteka viavo via vĩha
Kuenje va yukisa ocipiñalo cange lovina viavo viumbondo.’”+
19 A Yehova, angusu yange kuenda aciteyuilo cange,
Acitumãlo cange coku tila keteke liohali,+
Kokuove olofeka vi keya oku upisa kasulilo o kilu lieve,
Kuenje vi ka popia viti: “Vakukululu yetu va piñala uhembi wosi,
Ovina viaño haivio ka vi kuete esilivilo okuti, ka vi kuatisa.”+
20 Anga hẽ omunu umue o pondola oku li lingila olosuku
Osimbu okuti ovio halosukuko muẽle?+
21 “Omo liaco, ndi ka lingisa okuti ovo va kũlĩha,
Kotembo yaco, ndi ka va lingisa okuti va kũlĩha unene wange kuenda ongusu yange,
Kuenje ovo va ka kũlĩha okuti, onduko yange Yehova.”