Yeremiya
35 Ondaka ya Yehova yeya ku Yeremiya koloneke via Yehoyakimi+ omõla a Yosiya soma yo ko Yuda yiti: 2 “Kuende konjo ya va Rekava+ kuenda sapela lavo kuenje va nena vonjo ya Yehova, vohondo yimue pokati kolohondo vioku lilamo; noke eca kokuavo ovinyu oco va nyue.”
3 Omo liaco, ndambata Yasaniya omõla a Yeremiya omõla a Havaciniya, vamanjaye, omãla vaye vosi kuenda onjo yosi ya va Rekava 4 vonjo ya Yehova. Nda va nena toke vohondo yoku lilamo yomãla va Hanana omõla a Yigidaliya, ukuenje wa Suku yocili, yina ya kala ocipepi lohondo yoku lilamo yolombuale, ya kala kilu liohondo yoku lilamo ya Maaseya, omõla a Sialume ukuakulava ombundi. 5 Kuenje nda kapa kovaso yalume vo konjo ya va Rekava olokopo kuenda olokopo via sanjavala komẽla, vieyuka lovinyu loku va sapuila hati: “Nyui ovinyu.”
6 Pole, ovo va popia vati: “Etu ka tu nyui ovinyu, momo Yehonadava*+ omõla a kukululu yetu Rekava, wa eca kokuetu ocihandeleko cokuti: ‘Ci kaile ene ale omãla vene ko ka nyui ovinyu vokuenda kuoloneke viosi viomuenyo wene. 7 Kuenje ko ka tungi onjo, oku kũla ombuto ale oku tuika pamue oku kuata ocumbo cimue cayuva. Pole, otembo yosi vu sukila oku tunga volombalaka, oco vu kali komuenyo otembo yalua vofeka muna vu kasi ndovingendeleyi.’ 8 Omo liaco, tu kasi oku amamako oku pokola kondaka ya Yehonadava omõla a kukululu yetu Rekava kovina viosi a tu handeleka okuti, ka tua la nyua ovinyu, etu, akãi vetu, omãla vetu valume kuenda omãla vetu vakãi. 9 Ka tu tungi olonjo oco tu kalemo ndaño oku kuata oviumbo viayuva ale ovapia pamue ombuto. 10 Tu kasi oku amamako oku kala volombalaka loku pokola kovina viosi Yehonadava* kukululu yetu a tu handeleka. 11 Pole, eci Soma Nevukandesa wo ko Bavulono a katukila ofeka,+ tua popia hati: ‘Enjui, tu iñili vo Yerusalãi oco tu puluki kolohoka via va Kaldea kuenda via va Suria’ kuenje cilo tu kasi vo Yerusalãi.”
12 Kuenje ondaka ya Yehova yeya ku Yeremiya yiti: 13 “Ca popia Yehova ukualohoka Suku ya Isareli ceci hati: ‘Kuende, sapuila kalume vo ko Yuda kuenda kolonungi vio Yerusalãi siti: “Ene ka wa vetiyiwili hẽ olonjanja viosi oku pokola kolondaka viange?”+ oco Yehova a popia. 14 “Yehonadava omõla a Rekava wa handeleka ovitumbulukila viaye oco ka vi ka nyue ovinyu kuenda toke etaili via siata oku pokola kolondaka viaye vioku yuvula oku yi nyua, poku pokola kolonumbi via kukululu yavo.+ Pole, nda ku sapuili olonjanja vialua,* pole, ene ka wa pokuili kokuange.+ 15 Ame ndamamako oku tumisa kokuene akuenje vange vosi ovaprofeto, poku va tuma olonjanja vialua*+ loku popia hati: ‘Lingi ohenda, tinduki kolonjila viene via vĩha+ omunu lomunu pokati kene kuenda lingi eci ca sunguluka! Ko ka kuami olosuku vikuavo ale oku vi vumba. Kuenje vu kamamako oku kala vofeka yina nda eca kokuene kuenda ku vakukululu yene.’+ Pole, ene ka wa vonguili etũi liene ale oku ndi yevelela. 16 Ovitumbulukila via Yehonadava omõla a Rekava, via kapako ocihandeleko cina kukululu yavo a eca kokuavo,+ pole, omanu ava ka va ndi yevelele.”’”
17 “Omo liaco, ca popia Yehova, Suku ukualohoka, Suku ya Isareli ceci hati: ‘Ñasi oku nena ko Yuda kuenda kolonungi viosi vio Yerusalãi ohali yosi nda va lungula,+ momo ame nda va sapuila, pole, ka va yevelele kuenda ndamamako oku va vilikiya, pole, ka va tambuluile.’”+
18 Kuenje Yeremiya wa sapuila vakuanjo ya va Rekava hati: “Ca popia Yehova ukualohoka, Suku ya Isareli ceci hati: ‘Omo okuti wa pokoli kocihandeleko ca kukululu yene Yehonadava kuenda wamamiko oku kapako olonumbi viaye poku linga muẽle eci a vu handeleki, 19 ca popia Yehova ukualohoka, Suku ya Isareli ceci hati: “Ka ku ka kambela ocitumbulukila cimue ca Yehonadava* omõla a Rekava oku vumba kovaso yange.”’”