Yeremiya
18 Ondaka ya Yehova yina yeya ku Yeremiya yeyi yokuti: 2 “Katuka lokila konjo yukuakutalavaya lotuma+ kuenda oko ame ndi ka vanguila love.”
3 Omo liaco, nda enda toke konjo yukuakutalavaya lotuma kuenda eye wa kala oku talavaya valola oku talavaya lotuma. 4 Pole, ocikuata cotuma cina ukuakutalavaya lotuma a kala oku tunga, ca nyõlehela peka liaye. Omo liaco, ukuakutalavaya lotuma, wa ci tungulula kuenda wa tunga ocikuata cikuavo, ndomo eye a yonguile.*
5 Noke ondaka ya Yehova yeya kokuange yiti: 6 “‘Anjo ya Isareli, anga hẽ ame si pondola oku vu lingi ndeci ukuakutalavaya lotuma a linga?’ oco Yehova a popia. ‘Tali! Ndeci ci kasi otuma peka liukuakutalavaya lotuma, haico ene vu kasi peka liange, Anjo ya Isareli.+ 7 Olonjanja viosi eci ndi popia catiamẽla koku tukũla loku nyõla kuenda oku kundula ofeka yimue ale usoma umue,+ 8 kuenje ofeka yaco yi siapo evĩho lialio nda vangula, ame ndi ka pongololavo ocisimĩlo cange catiamẽla* kefengi nda yonguile oku nena poku u katukila.+ 9 Pole, olonjanja viosi eci ndi vangula catiamẽla koku tunga kuenda koku kũla ofeka yimue ale usoma umue, 10 kuenje oyo yi linga eci cĩvi kovaso ange kuenda ka yi pokola kondaka yange, ndi ka pongolola ocisimĩlo cange catiamẽla* kuwa nda yonguile oku yi lingila.’
11 “Cilo, linga ohenda, sapuila omanu va Yuda lolonungi vio Yerusalãi okuti, ‘Ca popia Yehova ceci hati: “Ñasi oku pongiya* ohali yimue kuenda ñasi oku sokolola ndomo ndu ku yambuli. Lingi ohenda, tinduki volonjila viene vĩvi kuenda pongololi olonjila viene lovilinga viene.”’”+
12 Pole, ovo va popia vati: “Eci ka ci kuete esilivilo!+ Momo etu tu ka endela vovisimĩlo vietu muẽle kuenda omunu lomunu pokati ketu, o ka linga ndomo ci likuata lesino liutima waye ũvi.”+
13 Omo liaco, ca popia Yehova ceci hati:
“Lingi ohenda, puli ene muẽle pokati kolofeka.
Helie wa yevele ale ocina cimue ndeci?
Ufeko wosombo wa Isareli wa linga ocina cimue cĩvi calua.+
14 Anga hẽ ocikokoto co Levanone ci takata vasenje koviwulu vialio?
Ale ovava a talala ana a tunda ocipãla a ka takata?
15 Pole, omanu vange va njivala.+
Momo ovo va eca ovilumba* koviteka ka vi kuete esilivilo,+
Kuenda ovo va kokela omanu ocilondokua volonjila viavo, olonjila viosimbu,+
Oco va endele vatapalo año okuti, ka a suñamele kuenda ka a tapikile,*
16 Oco va lingise ofeka yavo ocikuata coku yokoka+
Kuenda ocina cimue coku sika ovilua otembo ka yi pui.+
Omunu wosi o pita ocipepi layo o ka yi vanja locinjoko loku puka puka kutue waye.+
17 Ndofela yo kutundilo, ndi ka va sanduila kovaso yovanyãli.
Ame ndi ka va imba onyima yange okuti, ocipala cange hacoko keteke liavo liohali.”+
18 Kuenje ovo va popia vati: “Enjui, tu sokiyili ongombo yimue Yeremiya,+ momo ocihandeleko* covitunda vietu, elungulo liomanu va loñoloha kuenda ondaka yovaprofeto vetu ka vi ka imũha. Enjui, tu u lundili* kuenda ka tu ka yeveleli kueci a popia.”
19 A Yehova, njevelele,
Kuenda yevelela kueci ovanyãli vange va kasi oku vangula.
20 Anga hẽ eci ciwa ci fetuluinyiwa leci cĩvi?
Momo ovo va fẽlela omuenyo wange ocitunu cimue.+
Ivaluka ndomo nda talamele kovaso yove oku vangula eci ciwa catiamẽla kokuavo,
Oco onyeño yove yi kale ocipãla lavo.
21 Omo liaco, ecelela okuti omãla vavo va fa lonjala,
Kuenda va eca kunene wosipata.+
Akãi vavo va fise omãla vavo kuenda va linge ovimbumba.+
Alume vavo va pondiwe luvei u ponda,
Amalẽhe vavo valume, va pondiwe losipata kuyaki.+
22 Oku lila ku yevalele kolonjo viavo
Eci o nena kokuavo ovingumba ocipikipiki.
Momo ovo va fẽla ocitunu cimue oco va ndi kuate
Kuenda va petuila olomãhi viange oviliva.+
23 Pole, ove, A Yehova,
Wa kũlĩha ciwa ongombo yavo yosi yoku ndi katukila oco va ndi ponde.+
Ku ka ecele okulueya kuavo,
Kuenda ku ka imũle ekandu liavo kovaso yove.