Yeremiya
40 Yeremiya wa tambula ondaka ya Yehova noke ya Nevusaradana+ usongui wolondavululi oku u wecelela oku enda oku upisa ko Rama.+ Eye oko o tumile okuti, wa kutiwa lalienge kovoko kuenda wa kala pokati kolomandekua viosi vio ko Yerusalãi levi vio ko Yuda vina via kala oku ambatiwa ko Bavulono. 2 Noke usongui wolondavululi, wambata Yeremiya kuenda wo sapuila hati: “Yehova Suku yove wa sapula ohali eyi yatiamẽla kocitumãlo eci, 3 kuenje Yehova wa yi nena ndomo a ci popele, momo ene amanu, wa lingili Yehova ekandu kuenda ka wa pokuili kondaka yaye. Eli olio esunga lieci ovina evi via pitila lene.+ 4 Kaliye, etaili ñasi oku ku yovola kalienge ana a kala kovoko ove. Nda ca sunguluka kokuove oku enda lame ko Bavulono, enju kuenje ndi ka ku tata. Pole, nda ove ku yongola oku enda lame ko Bavulono, ku keye. Tala! Ofeka yosi yi kasi kovaso yove. Kuende oku kua ku sungulukila.”+
5 Osimbu handi Yeremiya ka nõlelepo oku enda, Nevusaradana wa popia hati: “Tiukila ku Gedaliya+ omõla a Ahikama,+ omõla a Siafane+ una soma yo Bavulono a nõla oco a songuile alupale o Yuda kuenda kala laye pokati komanu; ale kuende oku kua ku sungulukila.”
Usongui wolondavululi wa eca kokuaye okulia kuenda ombanjaile yimue kuenje wo wecelela oku enda. 6 Omo liaco, Yeremiya wa enda ku Gedaliya omõla a Ahikama ko Misipa+ kuenda wa kala laye pokati komanu vana va supile vofeka.
7 Vokuenda kuotembo, asongui vosi volohoka vana va kala vepia lalume vavo, va yeva okuti soma yo Bavulono wa nõla Gedaliya omõla a Ahikama oco a songuile ofeka kuenda wo nõlavo oco a songuile alume, akãi kuenda omãla pokati komanu olohukũi vio vofeka okuti, vana ka vambatiwile ko Bavulono.+ 8 Omo liaco, ovo veya ku Gedaliya ko Misipa.+ Ovo va kala Isameli+ omõla a Netaniya, Yohanana+ la Yonatão okuti, omãla va Karea, Seraya omõla a Tanihumete, omãla va Efai u Netofa kuenda Yisiniya+ omõla a Maakatita kumue lalume vavo. 9 Gedaliya omõla a Ahikama omõla a Siafane, wa linga ocisila cimue lavo kumue lalume vavo cokuti: “Ko ka kuati usumba woku talavayela va Kaldea. Kali vofeka kuenda talavayeli soma yo Bavulono kuenje ovina viosi vi ka enda ciwa lene.+ 10 Catiamẽla kokuange, ndi ka kala ko Misipa oco ndi kale onumiwa yene ku* va Kaldea vana veya kokuetu. Pole, ene vu sukila oku ongolola ovinyu, apako ondombo kuenda ulela kuenje vu vi soleka vasanga ene kuenda kali valupale ana wa nõli.”+
11 Kuenje va Yudea vosi va kala vo Moavi, vo Amoni kuenda vo Edome oku kongelamo vana va kala kolofeka viosi vikuavo, va yevavo okuti soma yo Bavulono wa sile ocisupe cimue vo Yuda kuenje eye wa va nõlela Gedaliya omõla a Ahikama omõla a Siafane oco a va songuile. 12 Omo liaco, va Yudea vosi va fetika oku tunda kovitumãlo viosi kuna va sanduiwile kuenje veya vofeka yo Yuda ku Gedaliya ko Misipa. Kuenje vongolola ovinyu kuenda apako ondombo volonjongo vialua.
13 Yohanana omõla a Karea kuenda asongui vosi volohoka vana va kala vusenge, veya ku Gedaliya ko Misipa. 14 Ovo vo sapuila vati: “Kua kũlĩhĩle hẽ okuti Baalise soma ya va Amoni+ wa tuma Isameli omõla a Netaniya oco a ku ponde?”+ Pole, Gedaliya omõla a Ahikama ka tavele kokuavo.
15 Noke Yohanana omõla a Karea wa vangula la Gedaliya vuyombeki ko Misipa hati: “Ndi yongola oku enda oku ka ponda Isameli omõla a Netaniya kuenje lomue o ka ci kũlĩha. Eye o ku pondela nye kuenda momo lie omanu vosi vo ko Yuda vana va likongela kokuove va sanduiwila kuenda ovisupe vio Yuda vi kunduiwila?” 16 Pole, Gedaliya+ omõla a Ahikama wa sapuila Yohanana omõla a Karea hati: “Ku ka ci linge, momo eci o kasi oku vangula catiamẽla ku Isameli, uhembi.”