Elivulu Liavali Lia Samuele
23 Olondaka via sulako Daviti a popia vievi:+
3 Suku yo Isareli wa vangula;
Handa yo Isareli wa ndi sapuila+ hati:
‘Nda una o viala omanu ukuesunga,+
O viala loku sumbila Suku,+
4 Uviali waco u kala ndocinyi comẽle eci ekumbi li nina,+
Omẽle ka yi kuete alende.
U kala ndocinyi ciya noke yombela,
Vi kokisa owangu oku tunda posi.’+
5 Siti onjo yange oco yi kasilili kovaso a Suku?
Momo eye wa linga lame ocisila ka ci pui,+
Wa pongiya loku ci sokiya ciwa.
Momo ci lomboloka epopelo liange liosi kuenda esanju liange,
Siti eli olio esunga lieci eye a ka tẽlisila ocisila caco?+
6 Pole, alume ka va silivila va inasiwa+ ndolosongo,
Momo ovio ka vi tava oku vi upa lovaka.
7 Omunu o yongola oku vi kuata,
O sukila oku limalẽha lutale, lombueti yevaya yunga,
Kuenda vi sukila oku timĩhiwa londalu kuosi vi kasi.”
8 Olonduko viasualali va pama va Daviti vievi:+ Yoseve-basievete u Takimoni eye usongui walume vatatu.+ Vonjanja yimosi, eye wa ponda eci ci soka 800 komanu lunga waye. 9 Noke wa kuamamo Eleasara+ omõla a Dodo+ omõla a Ahiho, eye wa kalavo la Daviti pokati kasualali vatatu va pama eci va sepula va Filisiti. Ovo va liongoluile oku liyaka kuenda eci alume vo ko Isareli va tila, 10 eye wamamako oku yaka la va Filisiti toke eci okuokuo kuaye kua kavele kuenda eka liaye ka lia ecele osipata.+ Kuenje keteke liaco, Yehova wa nena eyulo linene;*+ kuenda asualali va tiuka konyima yaye oco vope ovivimbi.
11 Noke wa kuamamo Siama omõla a Age u Harari. Va Filisiti va liongoluila pamosi ko Lehi kuna kua kala epia limue lieyukile akunde; kuenje omanu va tila omo lia va Filisiti. 12 Pole, eye wa talama pokati kepia kuenda wa li teyuila kuenje wamamako oku kundula va Filisiti, noke Yehova wa eca eyulo limue linene.*+
13 Pokati keci ci soka 30 kasongui, pa tunda vatatu va loka oku ka lisanga la Daviti veleva lio Adulama,+ kotembo yoku ungula kuenda ocimunga* ca va Filisiti ca kala oku tunga ocilombo Vocimbota* co Refayimi.+ 14 Daviti wa kala vocitumãlo ceteyuilo+ kuenda ocilombo ca va Filisiti ca kala ko Beteleme. 15 Noke Daviti wa situlula onjongole yaye poku popia hati: “Nda nda nyuile ño ovava a tunda vocisimo ci kasi ocipepi lombundi yo Beteleme, nda nda sanjuka!” 16 Omo liaco, asualali vaco vatatu va pama va iñila vocilombo ca va Filisiti kuenda vopa ovava vocisimo ca kala ocipepi lombundi yo Beteleme kuenje va a nena ku Daviti; pole, eye wa likala oku a nyua kuenda wa a pesila kovaso a Yehova.+ 17 Eye wa popia hati: “A Yehova ka ca sungulukile kokuange oku ci linga! Ndi sukila hẽ oku nyua osonde+ yalume va kapa omuenyo wavo kohele?” Omo liaco, eye wa likala oku a nyua. Evi ovio ovina asualali vaye vatatu va pama va linga.
18 Avisiai+ manji a Yoava, omõla a Seruya+ wa kala usongui wocimunga cikuavo calume vatatu; eye wa ponda eci ci soka 300 komanu lunga waye kuenda eye wa kemãlele ndalume vaco vatatu.+ 19 Ndaño okuti, eye wa kemãlelepo vali calua pokati kalume vakuavo vatatu haeye wa kala usongui wavo, pole, ka kemãlele ndalume vatatu vatete.
20 Benaya+ omõla a Yehoyada, wa kala ulume umue ukuotõi* una wa linga ovina vialua vi komõhisa ko Kavasele.+ Eye wa ponda omãla vavali va Ariyele wo ko Moavi kuenda eye wa lokila vocisimo cimue keteke limue kua kala ocikokoto kuenje wa ponda ohosi yimue.+ 21 Eye wa pondavo ulume umue unene calua u Egito. Ndaño okuti, u Egito wa kuatele unga umue peka liaye, eye wa liyaka laye lombueti yimue kuenda wa tambula unga peka liu Egito kuenje wo ponda lunga waco. 22 Evi ovio ovina Benaya omõla a Yehoyada a linga kuenda eye wa kuatele ekemãlo ndeli liasualali vatatu va pama. 23 Ndaño okuti, eye wa kemãlelepo vali calua okuti alume akũi atatu ci sule, ekemãlo liaye ka lia velelepo lialume vatatu. Pole, Daviti wo nõla oco a linge ondavululi yaye.
24 Asahele+ manji a Yoava, wa kala pokati kalume akũi atatu ndeci: Elihanana omõla a Dodo wo ko Beteleme,+ 25 Siama u Haroda, Elika u Haroda, 26 Helesi+ u Palititi,+ Ira omõla a Ikesi u Tekoa, 27 Aviyesere+ u Anatote,+ Mevunai u Husiati, 28 Salimone u Ahiho, Maharai+ u Netofa, 29 Heleve omõla a Baana u Netofa, Itai omõla a Rivai wo ko Givea ya va Benjamini, 30 Benaya+ u Piratoni, Hidai wo kakango* o ko Gasi,+ 31 Avilavoni u Aravati, Asimawete u Baharumi, 32 Eliava u Sialavoni, omãla va Yasiene, Yonatão, 33 Siama u Harari, Ahima omõla a Siarara u Harari, 34 Elifelete omõla a Ahasavi omõla u Maakati, Eliama omõla a Ahitofele+ u Gilo, 35 Hesero u Karimele, Parari u Arabia, 36 Yigala omõla a Natana wo ko Sova, Bani u Gadi, 37 Seleki u Amoni, Naharai u Berote okuti, ukuavimalẽho viuyaki via Yoava omõla a Seruya, 38 Ira u Itiri, Gareve u Itiri,+ 39 kuenda Uriya+ u Hiti, vocosi ca tẽla 37 komanu.