Ukundi
6 Kuli ohali yikuavo nda mola vemẽhi liekumbi kuenda ya siata pokati komanu: 2 Suku yocili eca kulume umue ukuasi kuenda ovipako lulamba okuti, ka suki cimue a yongola; pole, Suku yocili ko vetiya oku vi sanjukila, ndaño okuti ocingendeleyi ci pondola oku vi sanjukila. Cosi eci esanda kuenda ohali yalua. 3 Nda ulume umue o linga isia yocita comãla kuenda o kala anyamo alua komuenyo toke eci a kuka kuenje ka kuata esanju kovina viaye viwa osimbu ka kendiwile,* ndi popia siti, oñaña ya citiwa okuti ya fa ale, yo velapo.+ 4 Momo oñaña yeya elivova kuenje eci yi fa, yi fila vowelema. 5 Ndaño okuti oyo lalimue eteke ya muile ekumbi ale oku kũlĩha cimue, oyo handi ya velapo* ulume waco.+ 6 Esilivilo lipi li tunda koku kala olohulukãi vivali vianyamo okuti ku kuata esanju? Vosi hẽ ka va endi kocitumãlo cimuamue?+
7 Upange wosi walua womunu wenda vimo liaye;+ pole eye lalimue eteke a tẽlisa onjongole yaye yoku lia. 8 Onima yipi ukualondunge a kuete komunu eveke,+ ale esilivilo lipi omunu ohukũi a kũlĩha lioku puluka?* 9 Ca velapo oku sanjukila eci ovaso a lete okuti, oku tẽlisa olonjongole hacoko. Eci lacovo esanda, oku lupukila konyima yofela.
10 Ovina viosi vi kuete ale onduko kuenda eci omunu a tuwa, ca kũlĩhĩwa ale; kuenje ka tẽla oku yaka* lomunu umue wo velapo. 11 Nda olondaka vialua,* esanda laliovo li lua; kuenda esilivilo lipi ovio vi nena komunu? 12 Helie wa kũlĩha eci ca velapo okuti oco omunu a linga komuenyo vokuenda kuoloneke vitito viomuenyo waye wesanda u pita ndulembo?+ Helie o pondola oku sapuila omunu ovina vi ka pita vemẽhi liekumbi noke yolofa viaye?