Yeremiya
5 Ñuali ñuali volokololo vio Yerusalãi.
Vanji kolonele vialio kuenda kũlĩhĩsi.
Sandiliyi volokololo vialio kuenda vanji
Nda vu pondola oku sanga omunu umue o lekisa esunga,+
Umue o sandiliya oku kala ukuacili,
Kuenje nda wa sangimo umue, ame ndi ka ecela olupale.
2 Ndaño ovo va popia vati: “Ndeci Yehova a kasi lomuenyo!”
Lopo oku lisinga kuavo nda kua linga kuesanda.+
3 A Yehova, ovaso ove hẽ ka a sandi ocili?+
Ove wa va kangisa, pole, ka ca va kuatisile.*
Ove wa va nyõla, pole, ovo va likala oku tava epindiso.+
4 Pole, nda popia ame muẽle siti: “Ocili okuti ovo omanu vaño.
Ovilinga viavo viuveke, momo ka va kũlĩhĩle onjila ya Yehova,
Esombiso lia Suku yavo.
5 Ndi ka sandiliya alume va kemãla kuenda oku sapela lavo,
Momo citava okuti ovo va kũlĩha onjila ya Yehova,
Esombiso lia Suku yavo.+
Pole, vosi yavo va teya okanga
Kuenda oku tepa ovikolo.”
6 Eli olio esunga lieci ohosi yovusenge ya va katukila,
Ombinji yimue yo vekalasoko yamamako oku va nyõla,
Ongue yimue yi kasi oku lavulula valupale avo.
Omunu wosi o tundamo o liwa.
Momo akandu avo alua;
Ovilinga viavo vĩvi vialua.+
7 Ndi pondola ndati oku ku ecela omo liovina viaco?
Omãla vove va ndi yanduluka,
Kuenda va lisinga kocina cimue okuti Hasukuko.+
Nda tẽlisa olonjongole viavo,
Pole, ovo vamamako oku linga ukahokolo,
Kuenda va liongoluila konjo yocipuepue cimue.
8 Ovo va kasi ndolokavalu vi kuete onjongole yalua yoku lipekela,
Omunu lomunu enda kukãi wulume ukuavo.+
9 “Anga hẽ si sukila oku va yambula omo liovina evi?” oco Yehova a popia.
“Si sukila hẽ oku fetuluinya ame muẽle ofeka yimue ndeyi?”+
10 “Enjui loku katukila ocumbo caye cayuva, lalusoka aye kuenda oku nena ekundu,
Pole, ko ka vi nyõli viosi.+
Tukũli ovianja vialio via lisandula,
Momo ka via tiamẽlele ku Yehova.
11 Momo onjo ya Isareli lonjo ya Yuda
Via ndi lingila usuanji walua,” oco Yehova a popia.+
12 “Ovo va likala Yehova kuenda vamamako oku popia vati:
Layimue ohali yiya kokuetu;
Ka tu ka mola osipata ale onjala.’+
13 Ovaprofeto veyukisiwa lofela,
Kuenda ondaka* ka yi kasi vokuavo.
Ovina evi vi pite lavo!”
14 Omo liaco, ca popia Yehova Suku ukualohoka ceci hati:
“Omo okuti alume ava va kasi oku popia ovina evi,
Ndi ka lingisa olondaka viange ondalu yimue vomẽla wove,+
Kuenda omanu ava va ka linga olohũi,
Kuenje ondalu yi ka va lia.”+
15 “Ndi kasi oku nena kokuene ofeka yimue yocipãla, Anjo ya Isareli,”+ oco Yehova a popia.
“Ofeka yimue yi kasi tunde osimbu.
Oyo ofeka yimue yosiahũlu,
Ofeka yimue okuti, elimi liavo kua li kũlĩhĩle,
Kuenda ovina va vangula ka vi ku lomboloka.+
16 Ocilalo covisongo viavo, ci kasi ndonjembo yimue ya yikuka;
Vosi yavo asualali.
17 Ovo va ka nyõla ovina wongula kuenda ombolo yove.+
Va ka ponda omãla vove valume, lomãla vove vakãi.
Va ka kundula olongombe viove kuenda olomeme viove.
Ovo va ka nyõla oviti viove viayuva kuenda oviti viove viakuyu.
Va ka kundula losipata alupale ove a kuete oviteyuilo ana ove wa kolela.”
18 “Pole, ndaño muẽle koloneke viaco,” oco Yehova a popia, “si ka vu nyõli olumue vosi yene.+ 19 Kuenje eci ovo va pulisa vati: ‘Momo lie Yehova Suku yetu a lingila ovina viosi evi kokuetu?’ ove o sukila oku va tambulula hati: ‘Ndeci ene wa ndi yanduluki ame ndi Suku yene oco vu fendeli olosuku viñi vofeka yene, cimuamue haico vu ka fendela vakualofeka vofeka yina okuti hayeneko.’”+
20 Sapuli eci, konjo ya Yakoba,
Kuenda sandeki eci ko Yuda okuti:
21 “Yeveleli eci, ene amanu waveke haine ka vu kuete olondunge:*+
22 ‘Ene ka vu ndi sumbila?’ oco Yehova a popia,
‘Ka wa sukilili hẽ oku lulumila kovaso ange?
Ame nda kapa eseke ndongave yokalunga,
Ociholo cimue cotembo ka yi pui okuti, ka ci pitahãla ongave yalio.
Ndaño okuti akimba a ndumũha, pole, ka a ci tẽla;
Ndaño okuti õla, pole, ka a pitahãla ongave yalio.+
23 Pole, omanu ava va kuete utima wa siva haiwo wa sina;
Ovo va liyapuisa kuenda va kuama onjila yavo muẽle.+
24 Kuenje ovo ka va popi vutima wavo vati:
“Tu sumbili Yehova Suku yetu,
Una eca ombela votembo yalio
25 Akulueya ene muẽle, a tateka oku tẽlisiwa kuovina evi;
Akandu ene muẽle a ku tateki oku tambula ovina viwa.+
26 Momo pokati komanu vange pali omanu olondingaĩvi.
Ovo va lavulula ocinyama ca kuatiwa.
Va pongiya olonjanjo vi ponda.
Ovo va kuata omanu.
27 Ndocamba ceyuka olonjila,
Olonjo viavo vieyuka lelimbi.+
Eli olio esunga lieci ovo va lingila vakuonene kuenda olohuasi.
28 Ovo va lẽla kuenda ekova liavo li nina;
Ovo vamamako oku linga eci cĩvi.
29 “Anga hẽ si sukila oku va yambula omo liovina evi?” oco Yehova a popia.
“Si sukila hẽ oku fetuluinya ame muẽle ofeka yimue ndeyi?
30 Ocina cimue ci saluisa haico cĩvi, ci kasi oku pita vofeka:
31 Ovaprofeto va kasi oku imba owanji wesanda,+
Kuenda ovitunda vi tateka omanu omo liunene vi kuete.
Kuenje omanu vange muẽle va sanjukila onjila yaco.+
Pole, nye ene vu ka linga eci esulilo li keya?”