Yeremiya
21 Yeremiya wa tambula ondaka ya Yehova eci Soma Sedekiya+ a tuma kokuaye Pasihuri+ omõla a Malikiya la Sofoniya+ omõla a Maaseya ocitunda, oco va linge epingilo liokuti: 2 “Linga ohenda pula ku Yehova eci ci ka pita letu, momo Soma Nevukandesa wo ko Bavulono o kasi oku linga uyaki letu.+ Pamue Yehova o ka tẽlisa cimue pokati kovilinga viaye vi komõhisa oco a tu kuatise okuti, soma o tunda pokati ketu.”+
3 Yeremiya wa va sapuila hati: “Eci vu sukila oku sapuila Sedekiya ceci, 4 ‘Ca popia Yehova Suku ya Isareli ceci hati: “Ñasi oku vu pongoluili ovota wuyaki a kasi povaka ene muẽle, ana vu kasi oku yaka lao la soma yo Bavulono+ kuenda va Kaldea vana va kasi kosamua yocimbaka oku vu ñuali ocingonja. Kuenje ame ndi ka ongoluila ovota wuyaki vokati kolupale olu. 5 Noke ame muẽle ndi ka liyaka lene+ leka liange lia pama kuenda unene wange walua, lonyeño, lekaka kuenda oku tema kualua.+ 6 Ame ndi ka ponda olonungi violupale olu, ci kaile omanu kuenda ovinyama. Ovo va ka fa lefengi* limue linene.”’+
7 “‘“Noke liovina viaco,” oco Yehova a popia, “Ndi ka eca Soma Sedekiya wo ko Yuda kuenda akuenje vaye kumue lomanu vo volupale olu okuti, vana va puluka kefengi, kosipata kuenda konjala peka lia Soma Nevukandesa, wo ko Bavulono peka liovanyãli vavo kuenda peka lia vana va sandiliya oku va ponda.+ Eye o ka va ponda losipata. Eye ka ka va kuatela ohenda, ndaño muẽle oku lekisa ohenda ale ocikembe.”’+
8 “Ove o sukila oku sapuila komanu ava hati: ‘Ca popia Yehova ceci hati: “Ñasi oku kapa kovaso yene onjila yomuenyo kuenda onjila yolofa. 9 Vana vamamako volupale lulo, va ka fa losipata, lonjala kuenda lefengi. Pole, wosi o tunda kuenje o li eca ku va Kaldea vana va kasi oku vu ñuali ocingonja, o kamamako oku kala lomuenyo kuenje o ka puluka lomuenyo waye.”’+
10 “‘“Momo ame nda imba onyima olupale olu oco ndi nene ohali okuti, uwa hawoko,”+ oco Yehova a popia. “Oluo lu ka eciwa peka lia soma yo ko Bavulono+ kuenda eye o ka lu timĩha londalu.”+
11 “‘Ku vakuanjo ya soma yo Yuda: Yeveleli ondaka ya Yehova. 12 Anjo ya Daviti, ca popia Yehova ceci hati:
“Teyuili esunga omẽle yosi,
Kuenda yovoli vana va kasi loku nyaniwa peka lia vakuakupunda,+
Oco onyeño yange ka yi ka taime ndondalu+
Kuenje yi timĩha okuti lomue o tẽla oku yima
Omo liovilinga viene vĩvi.”’+
13 ‘Ndi ka ku yambula, Anungi yo vocimbota,*
Ove awe liofeka ya tapika,’ oco Yehova a popia.
‘Catiamẽla kokuene vu popia hati: “Helie o ka tu katukila?
Kuenda helie o ka lundula olonjo vietu?”
14 Ndi ka vu yambuli,
Ndomo vu sesamẽla omo liovilinga viene,’+ oco Yehova a popia.
‘Kuenje ndi ka kapa ondalu vusenge wene,
Kuenda oyo yi ka lia ovina viosi via ku ñuali.’”+