Esekiele
43 Noke eye wa ngambata kombundi ya imba ovaso kutundilo.+ 2 Nda muĩlako ulamba wa Suku ya Isareli okuti, wa kala oku tunda konele yutundilo+ kuenda ondaka yaye ya soka ndocileñi colusipa luovava;+ kuenje omo liulamba waye ocinyi ca tuila kilu lieve.+ 3 Eci nda mola ca lisoka locinjonde nda* muĩle eci ndeyile oku nyõla olupale kuenda ca lisoka ndocinjonde nda muĩle kolui Kevare;+ kuenje nda petamisa ocipala cange posi.
4 Kuenje ulamba wa Yehova wa iñila vonembele* pombundi ya imba ovaso kutundilo.+ 5 Noke espiritu limue lia mbotola kuenje lia ngambata vocitali co vokati kuenda nda mola okuti onembele ya yukisiwa lulamba wa Yehova.+ 6 Noke nda yeva ulume* umue wa kala oku vangula lame oku upisa vokati konembele kuenda ulume waco weya kuenje wa talama ponele yange.+ 7 Eye wa ndi sapuila hati:
“A mõlomunu, eci ocitumãlo cocalo cange+ kuenda ocitumãlo cociliatelo colomãhi viange,+ pana ndi ka tunga pokati komanu va Isareli otembo ka yi pui.+ Onjo ya Isareli ka yi ka sepula vali onduko yange yi kola,+ ovo kumue lolosoma viavo, omo liupuepue wavo konepa yespiritu kuenda ovivimbi violosoma viavo. 8 Ovo va kapa alukuki avo ocipepi lalukuki ange kuenda ovikuli viavo viepito konele yovikuli viapito ange okuti, pokati kange lavo pa kala lika ocimano cimosi,+ ovo va sepula onduko yange yi kola lovina viavo viumbondo ovo va linga, omo liaco, nda va kundula lonyeño yange.+ 9 Cilo, ovo va siepo upuepue wavo konepa yespiritu kuenda vope ovivimbi violosoma viavo kovaso ange kuenje ame ndi ka tunga pokati kavo otembo ka yi pui.+
10 “Catiamẽla kokuove a mõlomunu, lomboluila onjo ya Isareli+ eci catiamẽla konembele oco ovo va kuate osõi omo liakulueya avo+ kuenda va kũlĩhĩse esokiyo liaco.* 11 Nda ovo va kuata osõi omo liovina viosi va linga, ove o va sapuila eci catiamẽla kesokiyo lionembele, keliangiliyo liayo, katundilo alio kuenda kapito alio.+ Lekisa kokuavo asokiyo osi kuenda oviholo vialio lasokiyo alio, lovihandeleko vialio kuenda vi sonehela kovaso avo oco okuti, va kapako esokiyo liaco liosi loku tẽlisa oviholo vialio.+ 12 Eci oco ocihandeleko conembele. Ocikanjo cosi ca ñuala kilu liomunda ci kola koku kola.+ Tala! Eci oco ocihandeleko conembele.
13 “Evi ovio oloseteko viutala kovikeya+ (kukeya lukeya kua vokiyiwa upati weka).* Ociyekelo calio ca kuata ukeya umosi kuenda ci kuete ukeya umosi vupati. Oyo yi kuete ongumbo yimue ya ñuala kongenge okuti, yi kuete esokiyo* limue liupati. Eyi oyo ya kala ociyekelo cutala. 14 Oku upisa kociyekelo ci kasi posi, toke kongenge ya ñualako, ci soka ovikeya vivali kuenda upati walio wa kala ukeya umosi. Oku upisa kongenge yi sulemo ya ñualako toke kongenge ya velapo ca soka ovikeya vikuãla kuenda upati walio wa soka ukeya umosi. 15 Iko liutala li kuete ovikeya vikuãla kuenda olombinga vikuãla via kapiwa kilu liutala.+ 16 Iko liutala li kuete olonele vikuãla via lisoka okuti, 12 kovikeya koku lepa kuenda 12 kovikeya vupati.+ 17 Olonele vikuãla viongenge via ñualako, vi kuete 14 kovikeya koku lepa kuenda 14 kovikeya vupati; ongumbo ya ñualako yi soka omeyu yimosi kuenda ociyekelo cayo ci kuete ukeya umosi kolonele viosi.
“Kuenda olosikata vialio via imba ovaso kutundilo.”
18 Noke eye wa ndi sapuila hati: “A mõlomunu, ca popia Ñala Tõlo Yehova ceci hati: ‘Evi ovio olonumbi vi kuamiwa eci utala u tungiwa, oco kutala waco ku eciwileko ovilumba vioku pia elisi kuenda oku nyĩlako osonde.’+
19 “‘Ove o sukila oku eca okangombe kopiwa vocunda cove ndocilumba cekandu+ kovitunda va Lewi ocitumbulukila ca Sadoke,+ vana va amela kokuange oku ndi vumba,’ oco Ñala Tõlo Yehova a popia. 20 ‘Ove o sukila oku upa osonde yimue kuenda oku yi kapa kolombinga vikuãla viutala, kavindi akuãla a ñuala kongenge kuenda ongumbo yosi ya ñualako, oco u yelisiwe kekandu kuenda oku tuvika ekandu lialio.+ 21 Noke tikula okangombe okuti, ocilumba cekandu, oco o ka timĩhile vocitumãlo conembele ca nõliwa kosamua yocitumãlo ci kola.+ 22 Keteke liavali, ove o ka eca ocitupi cohombo ka ci kuete etondelo ndocilumba cekandu; kuenda utala u ka yelisiwa kekandu ndeci wa yelisiwa kekandu lokangombe.’
23 “‘Eci o mala oku yelisa utala kekandu, o ka eca okangombe ka ka kuete etondelo kopiwa vocunda kuenda omeme ka yi kuete etondelo yopiwa vocunda. 24 O ka vi nena ku Yehova kuenda ovitunda vi sukila oku kapako omongua+ loku vi eca viosi ndocilumba coku pia elisi ku Yehova. 25 Vokuenda kuoloneke epanduvali o ka eca ocitupi cohombo ndocilumba cekandu ceteke leteke,+ oku kongelamo okangombe kopiwa vocunda kuenda omeme yopiwa vocunda; ove o ka eca ovinyama ka vi kuete etondelo.* 26 Vokuenda kuoloneke epanduvali va sukila oku eca ovilumba vioku tuvika akandu, va sukila oku yelisa utala loku u tumbika. 27 Eci oloneke viaco vi tẽlisiwa, oku upisa keteke liecelãla+ oku endela kovaso, ovitunda vi ka eca ovilumba viavo* viosi vioku pia elisi kuenda ovilumba viombembua kutala; kuenda ame ndi vu sanjukili,’+ oco Ñala Tõlo Yehova a popia.”