Isaya
64 Nda ove wa tolele ovailu kuenda oku loka,
Okuti olomunda vi luluma omo liove,
2 Ndeci ondalu yi timĩha olohũi,
Kuenda ondalu yi feluisa ovava,
Onduko yove nda ya kũlĩhĩwa lovanyãli vove,
Kuenje olofeka nda via lulumĩla kovaso ove!
3 Eci ove wa linga ovina vi komõhisa vina ka tua lavokaile,+
Ove wa loka kuenda olomunda via lulumĩla kovaso yove.+
4 Tunde kosimbu lomue wa ci yeva, ale oku ci limbuka,
Ka kuli iso lia mola o Suku yimue, te lika ove,
5 Ove wa li sanga la vana va sanjukila oku linga eci ca sunguluka,+
Vana va ku ivaluka haivo va kuama olonjila viove.
Tala! Ove wa temele, osimbu tuamamako oku linga ekandu,+
Tua ci linga vokuenda kuotembo yalua.
Anga hẽ cilo tu sesamẽla oku popeliwa?
6 Vosi yetu tua linga ndomunu umue wa vĩha,
Kuenda ovilinga vietu viosi viesunga vi kasi ndonanga yimue ya lĩha.+
Vosi yetu tu ko wuka ndemẽla limue,
Kuenda akandu etu a ka tu ambata ndofela.
7 Ka kuli omunu umue o vilikiya onduko yove,
Lomue o likolisilako oku kakatela kokuove,
Momo ove wa vundisa ocipala cove kokuetu,+
8 Pole, cilo A Yehova, ove vu Isietu.+
9 Ku ka teme calua, A Yehova,+
Kuenda ku ka ivaluke eko lietu otembo ka yi pui.
Vanja kokuetu, linga ohenda, momo vosi yetu tumanu vove.
10 Alupale ove a kola a pongoloka ekalasoko.
O Siono ya linga ekalasoko,
O Yerusalãi ya linga elunda.+
11 Onjo* yetu yi kola haiyo yulamba,*
Muna vakukululu yetu va enda oku ku sivayela,
Ya timĩhiwa londalu,+
Kuenda ovina viosi tua solaile via siala ovingululu.
12 Ndaño lovina evi, anga hẽ o kamamako oku likandangiya, A Yehova?
Anga hẽ o kamamako oku ũha kuenda oku ecelela okuti, tu talisiwa ohali yalua?+