Yeremiya
6 Amãla va Benjamini, sandiliyi ocitililo ocipãla lo Yerusalãi.
Momo eyambulo li tunda konano li kasi ocipepi okuti, ocilunga cimue cinene.+
2 Omõla ukãi a Siono, wa lisetahãla lukãi umue wa fina haeye o sole ekalo liwa.+
3 Angombo kuenda oviunda viavo va keya.
4 “Lipongiyi oco* vu lingi uyaki layo!
Tu katuki kuenda tu yi katukili vekumbi pongunji!”
“Ngongo yetu we, momo eteke li kasi oku sulila,
Momo ovilembo vioñolosi vi kasi oku livokiya!”
5 “Tu katuki kuenda tu yi katukili vokuenda kuteke
Kuenje tu kunduli olosapalalo viayo vi kuete oviteyuilo.”+
6 Momo ca popia Yehova ukualohoka ceci hati:
“Teti avaya kuenda ñuali ocingonja poku katukila o Yerusalãi.+
Oluo olupale lumue lu sesamẽla oku kangisiwa;
Ka muli cimue, pole, muli lika ohali.+
7 Ndeci ocisimo camamako oku talalisa ovava,
Oluo luamamako oku talalisa evĩho liayo.
Ungangala kuenda enyõleho vi yevalela vokuayo;+
Uvei kuenda efengi, vi kasi kokuange otembo yosi.
8 Kapako elungulo, A Yerusalãi, sanga ndi kala ocipãla love kuenda ndu ku yanduluka;+
Ndi ka ku lingisa ofeka yimue yupolokoso okuti, ofeka yimue ka muli olonungi.”+
9 Ca popia Yehova ukualohoka ceci hati:
“Ovo va ka pupulula ovisupe vio Isareli, ndayuva a sulako kuti umue wayuva.
Pitisa vali eka liove ndomunu umue o kasi oku ongolola ayuva vuti umue wayuva.”
10 “Kulie ndi vanguila kuenda oku eca elungulo?
Helie o ka yevelela?
Tala! Ovatũi avo a sita,* eli olio esunga lieci ka va yevelila lutate.+
Tala! Ondaka ya Yehova yi kasi ndocina cimue ovo va sepula;+
Ovo ka va yi sanjukila.
11 Omo liaco, ndeyukisiwa lonyeño ya Yehova,
Nda kava, si tẽla vali oku ũha.”+
“Oyo yi sukumuĩla komõla o kasi vokololo,+
Kovimunga viamalẽhe va liongoluila pamosi.
12 Olonjo viavo vi ka eciwa komanu vakuavo,
Kumue lovapia avo kuenda lakãi vavo.+
Momo, ndi koluĩla eka liange poku katukila olonungi viofeka,” oco Yehova a popia.
13 “Oku upisa ku o sule toke ku wa velapo, omunu lomunu pokati kavo o linga onganyu yelimbi;+
Oku upisa kuprofeto toke kocitunda, omunu lomunu o kasi oku nyana.+
14 Ovo va seteka oku kayisa ño kilu apute* vomanu vange leselula, poku popia vati:
‘Kuli ombembua! Kuli ombembua!’
Osimbu okuti, ka kuli ombembua.+
15 Anga hẽ ovo va kuete osõi omo liovina via vĩha va linga?
Ovo ka va yevi osõi layimue!
Ndaño oku kũlĩha eci ci linga osõi!+
Omo liaco, ovo va ka kupukila pokati kava va kupuka ale.
Eci ndi ka nena ekangiso kokuavo, ovo va ka kupuka,” oco Yehova a popia.
16 Ca popia Yehova ceci hati:
“Talami panyãha kuenda vanji.
Puli eci catiamẽla kolonjila viosimbu,
Puli apa pa kasi onjila yiwa kuenje endelimo,+
Kuenda sandi epuyuko liene muẽle.”
Pole, ovo va popia vati: “Etu ka tu ka endela vonjila yaco.”+
17 “Kuenje ame nda nõla olondavululi+ via popia viti:
‘Yeveleli lutate kocileñi combinga!’”+
Pole, ovo va popia vati: “Ka tu yevelela lutate.”+
18 “Omo liaco, yeveleli Alofeka!
Kuenda ci kũlĩhi, Ene awiñi,
Ocina ci ka pita lavo.
19 Yevelela, Ove a ilu lieve!
Ndi kasi oku nena ohali komanu ava+
Ndonima yolonjanjo viavo,
Momo ovo ka va yevelela kolondaka viange
Kuenda va likala oku yevelela kocihandeleko cange.”*
20 “Esilivilo lipi ci kuete kokuange nda ove o nena onguendu yo ko Sieva
Kuenda o kalamu* oku upisa kofeka yimue ocipãla?
Ovilumba viene vioku pia elisi ka vi taviwa,
Kuenda ovilumba viene ka vi ndi sanjuisa.”+
21 Omo liaco, ca popia Yehova ceci hati:
“Ndi kapela omanu ava ovawe ocilondokua,
Kuenda omo ovo va ka kupukila,
Olonjali kumue lomãla vavo,
Omunu va lisungue kuenda ekamba liaye,
Kuenje vosi yavo va ka nyõleha.”+
22 Ca popia Yehova ceci hati:
“Tali! Omanu vamue va kasi oku iya oku upisa kofeka yo konano,
Kuenda ofeka yimue yinene yi kasi oku lavuluiwa kolonepa vio kupãla viofeka.+
23 Ovo va ka kuata ohonji kuenda unga.
Ovo olongangala kuenda ka va ka kuata ohenda.
Ondaka yavo yi kõla ndokalunga,
Kuenje ovo va ka endela kolokavalu.+
Ovo va keya ndocimunga cimue cuyaki ndalume vakuavita oco va ku katukile, Amõla ukãi wa Siono.”
24 Tua yeva esapulo liatiamẽla kondaka yaco.
25 Ko ka tundi oku enda vovapia,
Kuenda ko ka endeli vatapalo,
Momo unyãli o kuete osipata yimue;
Kolonele viosi kuli ohele.
26 Amõla ukãi vomanu vange,
Wala ocikelẽyi+ kuenda li tiñolõla vetiko.
Kala lesumuo kuenda lila loku litetela ndu okuti, wa fisa omõla wongunga.+
Momo vocipikipiki ukuakunyõla iya kokuetu.+
27 “Nda ku* lingisa ukuakukũlĩhĩsa utale pokati komanu vange,
Una o linga ekonomuiso lia suapo;
Yevelela lutate kuenda kũlĩhĩsa onjila yavo.
Va kasi ndosipi kuenda utale;
Vosi yavo vakuavitukiko.
29 Iyeveyo* via pia.
Pondalu pa tunda lika osumbu.
Ukuakuyelisa o likolisilako oku yelisa, pole, o ci linga elivova,+
Kuenda vana okuti olondigaĩvi ka vopiwile pokati komanu.+
30 Omanu va ka va tukula vati, opalata ya nyehĩwa,
Momo Yehova wa va likala.”+